သျှမ်းပြည် တောင်ပိုင်း တောင်ကြီးမြို့တွင် ဌားရမ်းဖွင့်လှစ်ထားသည့် ကုန်စုံဆိုင်ခန်းပိုင်ရှင် ၂ ဦး ကို စစ်ကောင်စီမှ ဖမ်းဆီးခေါ်ဆောင်သွားကြောင်း သတင်းသိရသည်။

တောင်ကြီးမြို့ ဟော်ကုန်းရပ်ကွက်တွင် ယနေ့ (ဒီဇင်ဘာ ၁၀ ရက်) နေ့လည် ၁၂ နာရီခွဲအချိန်က စစ်ကောင်စီတပ်သားနှင့် အရပ်ဝတ်လူတစ်စုတို့က ကားဖြင့် ရောက်လာပြီး ဆိုင်ပိတ်ထားသည့် ကုန်စုံဆိုင်နှင့် မုန့်ဆိုင် ဆိုင်ခန်းပိုင်ရှင်များကို ဖုန်းဆက်ခေါ် ခိုင်းကာ ဖမ်းဆီးခေါ်ဆောင်သွားခဲ့ကြောင်း မျက်မြင်တွေ့ရှိသူများက သျှမ်းသံတော်ဆင့်ကို ပြောသည်။

“ဒီနေ့ ၁၂ နာရီခွဲဝန်းကျင်လောက်မှာပါ။ သေနတ်ပါတဲ့ ရဲနဲ့ စစ်သားက ၁၀ ယောက်လောက်ရှိတယ်၊ ပြီးတော့ အရပ်ဝတ်နဲ့ လူတွေလည်းပါတယ်၊ အိမ်စီးကား ၄ စီး၊ စစ်စိမ်းရောင် ဂျစ်ကားတစ်စီးနဲ့ လာတာ၊ ဒီဆိုင်တွေ ဘာလို့ ပိတ်ထားသလဲ၊ ပိုင်ရှင်က ဘယ်မှာနေလဲ ဆိုပြီး ဖုန်းတွေခေါ်လိုက်တာ၊ ပိုင်ရှင်နှစ်ယောက်ရောက်လာတော့ ဖမ်းခေါ်သွားတယ်” ဟု မြင်တွေ့ခဲ့သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ ဆိုင်ခန်းပိုင်ရှင်များသည် ရိုးရိုးပြည်သူများသာဖြစ်ပြီး ယနေ့မှ ဆိုင်ပိတ်ထားခြင်း မဟုတ်ဘဲ သုံးလေးရက်ကတည်းက ဆိုင်များ ပိတ်ထားကြောင်းလည်း ၎င်းက ပြောသည်။

“ဒီနေ့က Silent Strike မို့လို့ ဆိုင်ပိတ်တာလည်း ဟုတ်ချင်မှ ဟုတ်ပါမယ်လေ၊ ဘာကြောင့်ဖမ်းသွားလဲ ဘယ်ကို ဖမ်းသွားမလဲ ဆိုတာ မပြောသွားဘူး၊ ဒီလို ဆိုင်ပိတ်တိုင်းသာ ဖမ်းမယ်ဆိုရင်တော့ ဒီနေ့ တောင်ကြီးက ၉၀ % က ဆိုင်တွေပိတ်ထားပါတယ်” ဟု ၎င်းက ပြောသည်။

ယနေ့ ဒီဇင်ဘာလ ၁၀ ရက်နေ့တွင် ကျရောက်သော နိုင်ငံတကာ လူ့အခွင့်အရေးနေ့ အထိမ်းအမှတ်နှင့် အာဏာရှင်ကို ဆန့်ကျင်သည့် အနေဖြင့် ပြည်သူများက အသံတိတ် သပိတ် Silent Strike ကို ပြုလုပ်ပြီး အပြင်မထွက်၊ ဆိုင်ခန်းမဖွင့် ခြင်းဖြင့် ဆန္ဒထုတ်ဖော်ခဲ့ကြသည်။

ယင်းကဲ့သို့ အသံတိတ်သပိတ် Silent Strike နှင့် အပြင်မထွက်ပဲ နေအိမ်ထဲ နေထိုင်ခြင်းဖြင့် ဆန္ဒထုတ်ဖော်သည့် ပြည်သူများကို အပြင်ထွက်လာစေရန်နှင့် ဆိုင်ခန်းများ ဖွင့်လှစ်ရန် အမျိုးမျိုး ဖိအားပေး ဆော်သြခဲ့တာလည်း ရှိနေကြောင်း သိရသည်။