သျှမ်းမြောက် ကျောက်မဲမြို့နယ်တွင် ယမန်နေ့ (ဒီဇင်ဘာ ၇ ရက်) တစ်ရက်တည်း မိုင်းနင်းမိမှု (၂)ကြိမ် ဖြစ်ပွားခဲ့ပြီး (၂)ဦး သေဆုံးကာ (၃)ဦး ဒဏ်ရာရရှိခဲ့ကြောင်း သတင်းသိရသည်။
ကျောက်မဲမြို့နယ် ပန်ဆန် ကျေးရွာနှင့် မန်ပင့်ကျေးရွာဒေသခံတို့ မိုင်းနင်းမိခဲ့တာဖြစ်ပြီး ပန်ဆန် ဒေသခံ တစ်ဦးနှင့် မန်ပင့် ဒေသခံ တစ်ဦး သေဆုံးခဲ့ကြောင်း ဒေသခံ ထံမှ သိရသည်။
“သူတို့ ၄ ယောက် နွားသွားရှာရင်း မိုင်းနင်းမိတာ။ မန်ပင့်ရွာနားက လက်ဖက်ခြံမှာဖြစ်သွားတာပါ။ ခွေးက ရှေ့ကနေ အရင်သွားပြီး နင်းမိတာ။ တစ်ယောက်က ဒဏ်ရာရပြီး ရွာကို သယ်လာတဲ့ချိန် ဆုံးသွားတယ်။ နောက်တစ်ယောက်ကလည်း ဒဏ်ရာပြင်းတယ်။ ကျန်တဲ့ ၂ ယောက်ကတော့ ရှပ်ထိရုံလောက်ပဲ။ ညနေ ၃ နာရီဝန်းကျင်လောက်မှာ ဖြစ်သွားတာ” ဟု မန်ပင့်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ မိုင်းနင်းမိသည့် လက်ဖက်ခြံသည် မန်ပင့်ရွာနှင့် ၂ မိုင်ခန့် ကွာဝေးပြီး ထို ၄ ဦးထဲမှ လုံးနောင့် ဆိုသူက ခန္ဓာကိုယ်အောက်ပိုင်း ဒဏ်ရာရရှိခဲ့ကာ ရွာသို့ သယ်လာစဥ် လမ်းတဝက်တွင် သေဆုံးသွားခဲ့တာဖြစ်ကြောင်း အဆိုပါ ဒေသခံ ထံမှ သိရသည်။
ထို့အပြင် မန်ပင့်ဒေသခံ အသက် (၃၂)နှစ်အရွယ် အမျိုးသားတစ်ဦးမှာ ခြေထောက်တွင် မိုင်းစ စိုက်ဝင်ဒဏ်ရာ ရရှိထားပြီး ခွဲစိတ်ကုသရန်အတွက် လားရှိုးဆေးရုံသို့ ပို့ဆောင်ထားရကြောင်း သိရသည်။
“တစ်ယောက်က ညာဘက် ဒူးခေါင်းအထက်နားမှာ ဒဏ်ရာ ရထားတယ်။ မိုင်းစ စိုက်ဝင်နေတာ။ အဲ့တာ ခွဲထုတ်ရမယ်လို့ ပြောတယ်။ ပြီးတော့ ဘယ်ဖက် ခြေဖျားမှာလည်း ဒဏ်ရာ ရထားတယ်။ ကျောက်မဲဆေးရုံက ခွဲစိတ်ဖို့ အဆင်မပြေလို့ လားရှိုးကို ပို့လိုက်ပြီ” ဟု ၄င်းနှင့် နီးစပ်သူတစ်ဦးက ပြောသည်။
ထို့အပြင် ယမန်နေ့ မနက်ပိုင်းက ပန်ဆန်ကျေးရွာ ဒေသခံ အသက် (၄၀)အရွယ် အမျိုးသား တစ်ဦး ရွာအပြင်ဘက်သို့ သွားစဥ် မိုင်းနင်းမိကာ ရရှိသောဒဏ်ရာဖြင့် သေဆုံးသွားခဲ့ကြောင်း သိရသည်။
ကျောက်မဲမြို့နယ်တွင် တိုင်းရင်းသားလက်နက်ကိုင်တပ် တိုက်ပွဲဖြစ်ပွားသည့် ကျေးရွာအနီးပတ်ဝန်းကျင်တွင် ယခုနှစ်အတွင်း မိုင်းပေါက်ကွဲမှု လတိုင်းနီးပါး ဖြစ်နေပြီး နေရပ်ပြန် စစ်ဘေးရှောင်များလည်း မိုင်းအန္တရာယ်ကို စိုးရိမ်ထိတ်လန့်နေရကြောင်း စစ်ရှောင် တစ်ဦးက ပြောသည်။
“ခုဆို ရွာပြန်ပြီး ထင်းခွေသွားမယ်၊ လက်ဖက်ခူးသွားမယ်ဆိုလည်း သူတို့တွေ(လက်နက်ကိုင်တပ်) မိုင်းထောင်ထားမှာကို အရမ်းကြောက်တယ်။ မိုင်းထိတဲ့သူလည်း ရှိခဲ့တယ်လေ၊ ဒဏ်ရာရတာတွေရော ရှိတယ်” ဟု လွယ်ကုန်ကျေးရွာမှ အသက် ၁၀၁ နှစ်အရွယ်ရှိ အဘွားကမ်က ပြောသည်။
