အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နှင့် နိုင်ငံတော်သမ္မတ ဦးဝင်းမြင့် တို့ကို စစ်ကောင်စီက နေပြည်တော် ဇမ္ဗူသီရိမြို့နယ် တရားရုံးတွင် ထောင်ဒဏ် ၄ နှစ် အမိန့်ချမှတ်လိုက်ကြောင်း စုံစမ်းသိရသည်။
အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် နှင့် နိုင်ငံတော်သမ္မတ ဦးဝင်းမြင့်တို့ကို စစ်ကောင်စီမှ စွဲဆိုထားသည့် အမှုများအနက် နိုင်ငံတော်အကြည်ညိုပျက်စေမှု ဥပဒေ ပုဒ်မ ၅၀၅ (ခ) အမှုအတွက် ထောင်ဒဏ် ၂ နှစ်စီနှင့် သဘာဝဘေးအန္တရာယ်ဆိုင်ရာ စီမံခန့်ခွဲမှု ဥပဒေ ပုဒ်မ ၂၅ အတွက် ထောင်ဒဏ် ၂ နှစ်၊ စုစုပေါင် တစ်ဦးလျှင် ထောင်ဒဏ် ၄ နှစ်စီ အမိန့်ချမှတ်လိုက်ကြောင်း သိရသည်။
နိုင်ငံတော် သမ္မတ၊ အတိုင်ပင်ခံပုဂ္ဂိုလ်တို့နှင့်အတူ နိုင်ငံတော်အကြည်ညိုပျက်စေမှု ဥပဒေပုဒ်မ ၅၀၅ (ခ) အမှုတွဲတွင် ပါဝင်သော နေပြည်တော်ကောင်စီဥက္ကဋ္ဌ ဒေါက်တာ မျိုးအောင် ကိုလည်း ၅၀၅ (ခ) အတွက် ထောင်ဒဏ် ၂ နှစ် ယနေ့အမိန့်ချမှတ်လိုက်ကြောင်း သိရသည်။
ထို့ကြောင့် ယနေ့ (ဒီဇင်ဘာ ၆ ရက်) တစ်ရက်တည်းတွင် အာဏာသိမ်း စစ်ကောင်စီသည် နိုင်ငံတော် သမ္မတနှင့် အတိုင်ပင်ခံ ပုဂ္ဂိုလ် တို့ကို ထောင်ဒဏ် ၄ နှစ်နှင့် ဒေါက်တာ မျိုးအောင် ကို ထောင်ဒဏ် ၂ နှစ် အမိန့် ချမှတ်လိုက်ခြင်းဖြစ်သည်။
နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် အာဏာသိမ်းစစ်ကောင်စီ မတရားစွဲဆိုထားသည့် နှစ်ရှည်ထောင်ဒဏ်များချမှတ်နိုင်သည့် စုစုပေါင်း အမှု ၁၂ ခု အတွက် တရားရင်ဆိုင်နေရကြောင်းလည်း သိရသည်။
Leave a Comments