သျှမ်းပြည်တောင်ပိုင်း မိုင်းပန်မြို့တွင် လယ်ကွင်းအတွင်းအလုပ်လုပ်နေသည့် ကျေးလက်ဒေသခံ နှစ်ဦးအား သျှမ်းပြည်တပ်မတော် RCSS/SSA တပ်ဖွဲ့ဝင်ဟု ဆိုကာ အစိုးရတပ်မတော် မှ ပြီးခဲ့သည့် သောကြာနေ့က ညလုံးပေါက် ဖမ်းဆီးစစ်ဆေးသည်ဟု သတင်းရရှိသည်။

လင်းခေးခရိုင် မိုင်းပန်မြို့နယ် နောင်လွမ် ရွာသား စိုင်းစိတ္တ အသက် ၂၀ နှစ် နှင့် စိုင်းစိန္န အသက် ၄၀ တို့ လယ်ကွင်းအတွင်း အလုပ်လုပ်နေစဉ်အစိုးရတပ်မတော် ခလရ ၂၉၆ က လာရောက်ဖမ်းဆီးခြင်းဖြစ်ကြောင်း၊ သြဂုတ် လ ၃ ရက်နေ့ မွန်းလွဲပိုင်းတွင် ဖမ်းဆီးခေါ်ဆောင်သွားပြီး သြဂုတ်လ ၄ ရက်နေ့မှ ပြန်လွတ်ပေးကြောင်း ရွာသူ ကြီး အသိုင်းအဝိုင်းပြောပြချက်အရသိရသည်။

“ဒီဘက်က ဖုန်းလိုင်းသိပ်မကောင်းဘူးလေ ၊ စကားပြောစက် ခေတ်စားနေကြတာ။ ဖုန်းဖိုးလဲ မကုန်ဘူးဆိုတော့ လေ။ ရပ်ရွာအတွင်းဝိုင်းဝန်းကူညီဖို့အုပ်စုလိုက် အဲ့လက်ကိုင်စကားပြောစက်တွေသုံးကြတာ။ သူတို့နှစ်ယောက်လဲ ကိုင်တယ်။ ဒါကိုတပ်မတော် က RCSS ရဲ့ လူဆိုပြီး တိုက်ရိုက်သွားဖမ်းတာ သူတို့နှစ်ယောက်ကို။ လယ်ထဲဝင်လာတာနဲ့ သေနတ် ထောက်ပြီး ဖမ်းချုပ်တော့တာဘဲ။ ရွာသူကြီး သွားထောက်ခံမှ နောက်တရက် ပြန်လွှတ်ပေးတာ”- ဟု ပြောသည်။

၄င်း ၂ ဦးအား ခေါင်းစွပ်အမည်းဖြင့်စွပ်ကာ ဖမ်းဆီးခေါ်ဆောင်သွားပြီး မိုးလင်းချိန်အထိ စစ်ဆေးသော်လည်း တစုံတရာ ရိုက်နှက်သည်ဆိုသည့် အချက်၊ တစုံတရာ ၀န်ခံကတိပေးချက် ပေးရသည် ဆိုသည့် အကြောင်းများ မကြားသိရပေ။

ရွာသားနှစ်ဦးအား ဖမ်းဆီးသွားသည့် အစိုးရတပ်မတော် ခလရ ၂၉၆ သည် လွိုင်လင်ခရိုင် ကွန်ဟိန်းမြို့နယ် ကာလိမြို့နယ်ခွဲတွင် အခြေစိုက်ကြောင်း၊ အဆိုပါ တပ်သည် ခိုလမ်အခြေစိုက်အရှေ့အလယ်ပိုင်းတိုင်း စစ်ဌာနချုပ် လက်အောက်ရှိ အမှတ် ၁၇ စစ်ဆင်မှုကွပ်ကဲရေးဌာနချုပ် ၏ လက်အောက်ခံတပ်ရင်းတခုဖြစ်ကြောင်းသိရသည်။

သျှမ်းပြည်တပ်မတော် RCSS/SSA မှာမူ နေပြည်တော် အစိုးရနှင့် တနိုင်ငံလုံး အပစ်အခတ်ရပ်စဲရေးစာချုပ် NCA လက်မှတ်ရေးထိုးထားသည့် သျှမ်းလက်နက်ကိုင်တပ်မတော် တခုဖြစ်သည်။