သျှမ်းပြည်နယ်တောင်ပိုင်း မိုင်းပန်မြို့နယ် ၃ မိုင်အကွာရှိ ဝိုးလိုင်း ကျေးရွာတွင် နေထိုင်သည့် ပြည်သူနေအိမ်တချို့ ကို စစ်တပ်မှ အတင်းအဓမ္မပြောင်းရွှေ့ခိုင်းကြောင်း သတင်းရရှိသည်။
မိုင်းပန်မြို့နယ် ၃ မိုင်အကွာရှိ ဝိုးလိုင်းကျေးရွာရှိ နေအိမ် တချို့ကို မတ် (၁၄)ရက်တွင် အလယ်ပိုင်းတိုင်းစစ်ဌာနချုပ် လက်အောက်ခံ ခြေလျင်တပ်ရင်း အမှတ်(၁၇) က စစ်တပ်ပိုင်နယ်မြေဖြစ်သည့်အတွက် အမြန်ဆုံးပြောင်းရွှေ့ပေးရန် အတင်းအကြပ် လက်မှတ်ရေးထိုးခိုင်းကြောင်း မိုင်းပန်ဒေသခံ ပြည်သူများပြောပြချက် အရသိရသည်။
“ တပ်နယ်မြေဆိုပြီးတော့ပြောင်းရွေ့ခိုင်းနေတာ။ သူတို့ပြောတာ ကျနော်တို့ ပြည်သူတွေက တပ်နယ်မြေကို ကျော်လာတယ်ဆိုတဲ့ အကြောင်းပြချက်နဲ့ပြောင်းခိုင်းတာပါ။ ဒီနေရာက ကျနော်တို့ လုပ်ကိုင်စားသောက်နေတာ နှစ်ပေါင်းများစွာရှိပါပြီ” မိုင်းပန်ဒေသခံ အမျိုးသား တဦးက ပြောသည်။
မိုင်းပန် စကခ -၁၇ မှ ၃မိုင် ဝိုးလိုင်း ကျေးရွာသည် တပ်မြေပေါ်တွင် တည်ရှိနေသည် ဟု အကြောင်းပြပြီး ကျေးရွာ ပြည်သူများကို လက်မှတ်ရေးထိုးခိုင်းသော်လည်း ပြည်သူများက လက်ရှိအချိန်ထိ လက်မှတ်ရေးထိုးပေးခြင်း မရှိသေးကြောင်း သိရသည်။
“ ဒီကျေးရွာက ရှိလာတာကြာပြီ။ သူတို့စခန်းလာမချကတည်းက ကျနော်တို့ နေတာကျနော်တို့က။ သူတို့လာနေတာ မကြာသေးဘူး” ဟု မိုင်းပန် ဒေသခံတစ်ဦးကပြောသည်။
ထိုကျေးရွာသည် လီဆူတိုင်းရင်းသားများ နေထိုင်ပြီး မိုင်းပန်မြို့မှ မိုင်တုံသို့ သွားသည့် လမ်းပေါ်တွင် တည်ရှိပြီး ၊အိမ်ခြေ ၆၀ ကျော်သာရှိကြောင်းသိရသည်။
Leave a Comments