သျှမ်းပြည်တောင်ပိုင်း ပင်လောင်းမြို့နယ်တွင် စစ်ကောင်စီလက်အောက်ခံက ကျောင်းပြန်ဖွင့်ရန် ပြင်ဆင်နေသောကြောင့် ဒေသခံ ပရဟိတအဖွဲ့တချို့ စိုးရိမ်လျက်ရှိကြောင်း စုံစမ်းသိရှိရသည်။

ပင်လောင်းမြို့တွင် ယနေ့ (နိုဝင်ဘာ ၃၀)တွင် ကျောင်းပြန်ဖွင့်ရန်အတွက် စစ်ကောင်စီ လက်အောက်ခံ ပညာရေးဝန်ထမ်းများက ကျောင်းသို့ သွားရောက်ဆွေနွေးလျက်ရှိကြောင်း ဒေသခံ တစ်ဦးက ပြောသည်။

“ပင်လောင်းမှာ ပြန်ဖွင့်တော့မယ်။ ဒီနေ့ ဆရာမတွေတောင် ကျောင်းသွားနေကြပြီ။ ဘယ်နေ့ ကလေးတွေ ပြန်ခေါ်မလဲတော့ မသိဘူး။ ကျောင်းဖွင့်တော့မယ်ဆိုတော့ ကိုဗစ် လူနာ ပိုများလာမှာ စိုးရိမ်တယ်” ဟု ပင်လောင်းမြို့ ဒေသခံ အမျိုးသမီး တစ်ဦးက ပြောသည်။

လက်ရှိ ပင်လောင်းမြို့တွင် ကိုဗစ် ၁၉ ပိုးတွေ့လူနာ ကျဆင်းလာသော်လည်း နေအိမ်တွင် ကြိတ်ကုနေသူများ ဆက်လက်ရှိနေကြောင်း၊ ထိုသို့ ကျောင်းပြန်ဖွင့်ပါက ပိုးတွေ့လူနာ ပိုများလာမှာကို စိုးရိမ်လျက်ရှိကြောင်း သိရသည်။

“စိုးရိမ်တာပေါ့။ မြို့ပေါ်မှာ ပိုးတွေ့လူနာမရှိတော့ဘူးဆိုပေမယ့် အိမ်မှာ ကြိတ်ကုနေတဲ့သူတွေရှိတယ်လေ။ ဆေးရုံမှာတော့ ၁ ရောက်ကျန်တယ်။ ဒါပေမယ့် အိမ်မှာ ကြိတ်ကုနေတဲ့သူတွေ ရှိသေးတယ်။ ကျောင်းပြန်ဖွင့်မယ်ဆိုတော့ ပိုးတွေ့လူနာတွေ ပိုးများလာမှာကို ကြောက်ရတယ်” ဟု ပင်လောင်းမြို့ ပရဟိတအဖွဲ့ က ပြောသည်။

စစ်ကောင်စီလက်အောက်ခံ ပညာရေးဝန်ကြီးဌာနက သျှမ်းပြည်အတွင်းရှိ မြို့နယ် ၁၄ ခုကို ကျောင်းဖွင့်ရန်အတွက် ပြင်ဆင်နေလျက်ရှိကြောင်း ယမန်နေ့ နိုဝင်ဘာ ၂၉ က ထုတ်ပြန်ခဲ့သည်။