သျှမ်းပြည်မြောက်ပိုင်း ကျောက်မဲမြို့နယ် ဗူးခါးကျေးရွာ အနီးတွင် အမည်မသိသည့် လူငယ် (၂)ဦးမှ လမ်းသွား လမ်းလာ ကားများကို ကျောက်ခဲဖြင့် ပစ်ပေါက်မှု ဖြစ်ပွားခဲ့ကြောင်း သတင်းသိရသည်။
ယမန်နေ့ နိုဝင်ဘာလ ၂၉ ရက်နေ့ ည ၁၀ နာရီဝန်းကျင် အချိန်တွင် ကျောက်မဲမြို့နယ် ဗူးခါးကျေးရွာအနီးတွင် အမည်မသိ လူငယ်(၂)ဦးမှ မန္တလေး – လားရှိုး ပြည်ထောင်စုကားလမ်းမကြီးတစ်လျှောက် သွားလာနေသည့် ကား/ယာဥ်များကို ကျောက်ခဲများဖြင့် ပစ်ပေါက်ခဲ့သဖြင့် ကား ၈ စီးခန့် မှန် ထိခိုက်ပျက်စီးခဲ့ရကြောင်း သိရသည်။
“မနေ့က ည ၁၀ နာရီ ဝန်းကျင်ကနေ စပြီးတော့ ဆိုင်ကယ်နဲ့ လူငယ်နှစ်ယောက်က လမ်းမကြီးက ကားတွေကို ကျောက်ခဲတွေနဲ့ ပစ်ပေါက်တယ်တဲ့၊ ကားသမားတွေက သူတို့နောက်ကိုလိုက်တော့ ကျနော်တို့ ရွာ (ဗူးခါးကျေးရွာ) ဘက် ကွေ့ဝင်လာတာ၊ ကျိန်ဆဲနေတာလည်း ကြားတယ်ဆိုပဲ” ဟု ဗူးခါးကျေးရွာမှ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ကားများကို ကျောက်ခဲဖြင့် ပစ်ပေါက်သည့် လူငယ်နှစ်ဦးသည် ဦးထုပ်များဆောင်းထားပြီး ကားသမားများ နောက်မှလိုက်သောအခါ ကားလမ်းမကြီးမှ ဗူးခါးကျေးရွာသို့ ဝင်သည့် လမ်းအတိုင်း မောင်းဝင်သွားသဖြင့် ကားသမား များက ဗူးခါးရွာသားထင်ပြီး ရွာထဲသို့ လာရောက်မေးမြန်းသွားကြောင်း သိရသည်။
“သူတို့ကို ပစ်တာက ကားလမ်းမကြီးမှာပါ၊ ဒါပေမယ့် ပစ်ပြီး ကျနော်တို့ရွာဘက်ကို မောင်းပြေးလာတော့ ကျနော်တို့ ရွာသားဖြစ်မယ်ထင်ပြီးတော့ လာရှာတာ၊ သူတို့လည်း ဒေါသထွက်နေချိန် ဆိုတော့ တော်တော်နဲ့ ရှင်းမရဘူး၊ လာလုပ် တဲ့ လူငယ်တွေက ဗမာလိုလည်း ကျိန်ဆဲသွားတယ်တဲ့၊ ဒါပေမယ့် ကျနော်တို့ရွာမှာ ဗမာလူငယ် မရှိသလောက်ပဲ၊ ပြီး တော့ ည ၇ နာရီကျော်တာနဲ့ အရေးမကြီးရင် ဘယ်သူမှ အပြင်မထွက်ဖို့ ကျနော်တို့ရွာက စည်းကမ်းထုတ်ထားတယ်” ဟု ဗူးခါးကျေးရွာမှ အမျိုးသားတစ်ဦးက ပြောသည်။
ယင်းကဲ့သို့ ကျောက်ခဲများဖြင့် အပစ်ခံရသည့် ကားများသည် ၈ စီးရှိပြီး ရှေ့မှန်များနှင့် နောက်ကြည့်မှန်များ ကွဲအက် ပျက်စီးခဲ့ရကြောင်း သိရသည်။
“ဘယ်သူ ဘယ်ဝါလုပ်မှန်းတော့ မသိရဘူး၊ ကားသမားတွေတော့ တော်တော်ကို နစ်နာပါတယ်၊ ပျက်စီးသွားတာ တွေအတွက် ကုန်ကျမယ့်စရိတ်လည်း နည်းတာမဟုတ်ဘူး၊ အဲ့ကြောင့် ကိုယ်ချင်းစာမိပါတယ်၊ ဒီလို ဖြစ်စဥ်မျိုးလည်း ထပ်မဖြစ်စေချင်ဘူး” ဟု လည်း အထက်ပါ ပုဂ္ဂိုလ်က ပြောသည်။
ဗူးခါးကျေးရွာသည် ကျောက်မဲမြို့နယ်နှင့် ၅ မိုင်ကျော်သာ ကွာဝေးပြီး လက်ရှိ ဖြစ်ပေါ်နေသည့် နိုင်ငံရေး ပဋိပက္ခနှင့် ကိုဗစ် – ၁၉ ကြောင့် ည ၇ နာရီ နောက်ပိုင်း ရွာသူ/ရွာသားများ အပြင်မထွက်ကြရန်လည်း စည်းကမ်းထုတ်ထားကြောင်း သိရသည်။
Leave a Comments