သျှမ်းပြည်မြောက်ပိုင်း နမ့်လန်မြို့တွင် (၅)လကြာ ကိုဗစ်ကြောင့် ပိတ်ခံထားရသည့် မြို့မဈေးကို ဒီဇင်ဘာ ၁ ရက်နေ့မှစပြီး ပြန်လည်ဖွင့်လှစ်ပေးသွားမည်ဖြစ်ကြောင်း စုံစမ်းသိရှိရသည်။
နမ့်လန်မြို့တွင် ကိုဗစ် – ၁၉ ပိုးတွေ့လူနာ လျော့ကျလာပြီး ပြည်သူများက ကိုဗစ် ၁၉ ကာကွယ်ဆေး သွားရောက်ထိုးနှံကြသောကြောင့် ပြန်လှည်ဖွင့်ပေးမည်ဖြစ်ကြောင်း သိရသည်။
“ဒီဇင်ဘာ ၁ ရက်နေ့က စပြီး ပြန်ဖွင့်ပေးသွားမှာပါ။ နမ့်လန်မှာက ခုတလော ကိုဗစ် ပိုးတွေ့လူနာ လျော့ကျလာတယ်။ ပြည်သူတွေလည်း ကာကွယ်ဆေးသွားထိုးကြတယ်” ဟု နမ့်လန်မြို့ တက်ကြွလှုပ်ရှားသူ အမျိုးသားတစ်ဦးက ပြောသည်။
နမ့်လန်မြို့မဈေးကို ကိုဗစ် – ၁၉ တတိယလှိုင်း ဇွန်လကစပြီး ပိတ်ထားခဲ့ကြောင်း သိရသည်။
လက်ရှိတွင် ဒေသခံပြည်သူများက ဈေးကို ပြန်လည်ဖွင့်ပေးသင့်ကြောင်း၊ ဈေးပိတ်ခဲ့သောကြောင့် စားဝတ်နေရေးအတွက် ခက်ခဲမှုများစွာ ရှိလာခဲ့ကြောင်း သိရသည်။
“ဈေးတော့ ပြန်ဖွင့်ပေးသင့်တယ်လို့ ကျမထင်တယ်။ ၅ လကြာတောင် ပိတ်ထားခဲ့ပြီးပြီလေ။ ဈေးပိတ်ခဲ့တာကြောင့် ကျမတို့လည်း စားဝတ်နေရေး ခက်ခဲမှုတွေ ရှိလာတယ်။ အခုလို ပြန်ဖွင့်ပေးမယ်ဆိုတော့လည်း ကောင်းတယ်” ဟု နမ့်လန်မြို့ ဒေသခံ အမျိုးသမီးတစ်ဦးက ပြောသည်။
နမ့်လန်မြို့တွင် ဒေသခံပြည်သူများ ၈၀ ရာခိုင်နှုန်းလောက်ထိက ကိုဗစ် – ၁၉ ကာကွယ်ဆေး ထိုးပြီးကြသူများ ဖြစ်ကြောင်း သိရသည်။
ထို့အပြင် နိုဝင်ဘာ ၃၀ ရက်နေ့တွင် မြို့မဈေး တံခါးကို ဖွင့်ထားပေးမည်ဖြစ်ပြီး ဈေးရောင်းသူများအနေဖြင့် လာရောက်သန့်ရှင်းရေးလုပ်နိုင်ကြောင်း သိရသည်။
Leave a Comments