သျှမ်းပြည်အတွင်း တိုင်းရင်းသားလက်နက်ကိုင်အချင်းချင်း တိုက်ပွဲ ရပ်တန့်ရန် စွမ်း တိုက်တွန်း

0

သျှမ်းပြည်အတွင်း ဖြစ်ပွားနေသည့် တိုင်းရင်းသား လက်နက်ကိုင်အဖွဲ့အစည်းများ အချင်းချင်း ပစ်ခတ်တိုက်ခိုက်နေမှုများ ရပ်တန့်ရန် ရှမ်းအမျိုးသမီးရေးရာ ဆက်သွယ်လှုပ်ရှားဆောင်ရွက်ရေးအသင်း (စွမ်း) မှ တိုက်တွန်းလိုက်ကြောင်း သိရသည်။

ထို တိုက်တွန်းချက်ကို နိုဝင်ဘာလ ၂၅ ရက်တွင် ကျရောက်သော အမျိုးသမီးများအပေါ် အကြမ်းဖက်မှု ပပျောက်ရေးနေ့တွင် ရှမ်းအမျိုးသမီးရေးရာ ဆက်သွယ်လှုပ်ရှားဆောင်ရွက်ရေးအသင်း (စွမ်း) ၏ ထုတ်ပြန်ချက်တွင် ရေးသားထားသည်။

သျှမ်းပြည်အတွင်း တိုင်းရင်းသားလက်နက်ကိုင် အဖွဲ့အစည်းအချင်းချင်းကြား မကြာခဏဖြစ်ပွားသည့် တိုက်ပွဲများကြောင့် သျှမ်းပြည်သူ၊ ပြည်သား တစ်သောင်းနီးပါး လယ်ယာမြေနှင့် အိုးအိမ် စွန့်ခွာရပြီး စစ်ပြေးရှောင်ဘဝအဖြစ် ထွက်ပြေးတိမ်းရှောင်နေကြရသည်။

“စစ်ဘေးရှောင်တွေ အထူးသဖြင့် အမျိုးသမီးတွေရဲ့ အနာဂတ်ဟာ ဒီတိုက်ပွဲတွေကြား ပြေးရင်းလွှားရင်းနဲ့ပဲ ဘဝ မပြီးစေချင်ဘူး၊ စစ်ပဋိပက္ခဖြစ်တဲ့ဒေသတွေမှာ အမျိုးသမီးတွေရဲ့ အခွင့်အရေးတွေကို ကာကွယ်ပေးဖို့ဆိုတာ လက်နက်ကိုင်အဖွဲ့အစည်းတိုင်း လိုက်နာဆောင်ရွက်ရမယ် Military Code of Conduct တွေကို သေချာလိုက်နာ ဖို့လိုတယ်လေ” ဟု စွမ်း၏ ပြောရေးဆိုခွင့်ရှိသူက ပြောသည်။

နိုင်ငံရေး ရှုပ်ထွေးမှုနှင့် သျှမ်းပြည်တွင်း လက်နက်ကိုင်များကြား ဖြစ်ပွားနေသော စစ်ပဋိပက္ခများသည် အမျိုးသမီးများနှင့် ကလေးသူငယ်များ၏ ဘဝလုံခြုံရေးကို ခြိမ်းခြောက်နေကြောင်း၊ စစ်ပွဲအတွင်း စစ်ဘေးရှောင်ကိုယ်ဝန်သည်များ မွေးဖွားရန် အခက်အခဲရှိနေပြီး မွေးကင်းစ ကလေးနှင့် မိခင်များအတွက် နေရာထိုင်ခင်း ခက်ခဲကျပ်တည်းမှုနှင့် ရင်ဆိုင်နေကြကြောင်း စွမ်း၏ ထုတ်ပြန်ချက်တွင် ရေးသားထားသည်။

ထို့အပြင် နိုဝင်ဘာ ၂၅ ရက် အမျိုးသမီးများအပေါ် အကြမ်းဖက်ခံရမှု ပပျောက်ရေးနေ့ တွင် စွမ်းမှ ဦးဆောင်ပြီး အမျိုးသမီးအပေါ် အကြမ်းဖက်မှုနှင့် ခွဲခြားဆက်ဆံမှုများ ရပ်တန့်အောင် ရည်ရွယ်သည့် အွန်လိုင်းလှုပ်ရှားမှုများလည်း ပြုလုပ်ခဲ့ကြောင်း သိရသည်။

“ဒီနှစ်မှာ စွမ်း အနေနဲ့ အခမ်းအနားတွေ စကားဝိုင်းတွေ မလုပ်ဖြစ်ဘူး၊ ဒါပေမဲ့ အမျိုးသမီးတွေအပေါ် နည်းမျိုးစုံနဲ့ ခွဲခြားဆက်ဆံတာတွေ၊ အကြမ်းဖက်မှုတွေအားလုံး ရပ်တန့် ပပျောက်သွားအောင် ရည်စူးပြီးတော့ နိုဝင်ဘာ ၂၅ ရက်ကနေ ဒီဇင်ဘာ ၁၀ ရက်နေ့အထိ အွန်လိုင်းကနေ လှုပ်ရှားမှုတွေရှိပါတယ်” ဟု စွမ်း၏ ပြောရေးဆိုခွင့်ရှိသူက ပြောသည်။

သျှမ်းပြည်တွင်းနှင့် အခြားပြည်နယ်အတွင်း ဖြစ်ပွားနေသော စစ်ပဋိပက္ခများ အထူးသဖြင့် တိုင်းရင်းသားလက်နက်ကိုင် အဖွဲ့အစည်းများ အချင်းချင်းကြား ဖြစ်ပွားနေသော တိုက်ပွဲများ ရပ်တန့်ရန်လည်း ထုတ်ပြန်ချက်တွင် ဖော်ပြထားသည်။

ထို့အပြင် အမျိုးသမီးများ အကြမ်းဖက်ခံရမှုနှင့် ပတ်သက်ပြီး စွမ်း၏ ထုတ်ပြန်ချက်တွင် စစ်တပ်မှ နိုင်ငံတော်အာဏာ သိမ်းယူပြီးနောက်ပိုင်း အကြမ်းဖက်နည်းမျိုးစုံဖြင့် အသတ်ခံရသည့် မြန်မာပြည်မှ အမျိုးသမီး ၁၀၀ ကျော် ရှိနေကြောင်းလည်း ရေးသားဖော်ပြထားသည်။

Leave a Comments