“စိုးရိမ်တာပေါ့။ ကျမတို့ ဒေသမှာ အသက် (၆၂)နှစ်အရွယ် အမျိုးသမီး အဓမ္မပြုကျင့်ခံရတာ တစ်ခါမှ မကြားဖူးဘူး” လို့ ဒေါ်လွမ်းရယ်က စိတ်မကောင်းစွာနဲ့ ပြန်ပြောပြနေပါတယ်။

နိုဝင်ဘာ ၇ ရက် နေ့က သျှမ်းပြည်မြောက်ပိုင်း ကွတ်ခိုင်မြို့နယ်၊ နမ့်ဖလွန်ကျေးရွာ အုပ်စု၊ ဖားခတ်ကျေးရွာမှာ အသက် ၆၂ နှစ်အရွယ် အဘွားအိုတစ်‌ယောက်ကို စစ်ကောင်စီ တပ်သားတစ်ယောက်က မုဒိမ်းပြုကျင့်ခဲ့တာနဲ့ပတ်သက်ပြီး ဒေါ်လွမ်းရယ်က ပြောတာပါ။

“အဖွားက ဒီနေ့ထိ ထမင်းကောင်းကောင်းစားလို့မရသေးဘူး။ ပါးစပ်တွေ ယောင်ပြီးနာနေတယ်။ မျက်နှာတစ်ခုလုံး ဒဏ်ရာတွေနဲ့” လို့ အသက် (၆၂)နှစ် အရွယ် အတင်းအဓမ္မပြုကျင့်ခံရတဲ့ အဖွားကို ကူညီဆောင်ရွက်ပေးနေတဲ့ ဒေါ်လွမ်းရယ်က ဆိုပါတယ်။

လက်ရှိမှာတော့ အဖွားဟာ ခြံအကျယ်ကြီးထဲမှာ တစ်ယောက်တည်း ရှိနေချိန်ဆို စိတ်ခြောက်ခြားမှုတွေဖြစ်နေပြီး ထမင်းကိုလည်း ကောင်းမွန်စွာ မစားနိုင်သေးကြောင်းလည်း ဒေါ်လွမ်းရယ် က ပြောပါတယ်။

“အဘွားကို တစ်ယောက်တည်း ထားနေရင်လည်း မရဘူး၊ ကြောက်နေတယ်။ ပြီးတော့ သူက ရှက်တယ် ဆိုပြီး ငိုပြီးပြောတယ်” လို့ ဒေါ်လွမ်းရယ်က လက်ရှိ အဖွားဖြစ်ပျက်နေတာကို ပြန်ပြောပြပါတယ်။

မုဒိမ်းမှု ကျူးလွန်တဲ့ မင်းမင်းစိုး ဟာ စစ်ကောင်စီ တပ်ရဲ့ လက်အောက်ခံ ဖယ်ခုံတပ်ရင်း ခမရ ၃၃၆ က တပ်သားတစ်ဦးဖြစ်ပါတယ်။

ဒီကိစ္စနဲ့ပတ်သက်ပြီး စစ်ကောင်စီရဲ့ တပ်မတော် ကာကွယ်ရေး ဦးစီးချုပ်ရုံးက နိုဝင်ဘာ ၁၁ ရက်နေ့မှာ ဝန်ခံထုတ်ပြန်ခဲ့ ပါတယ်။

ပြစ်မှုကျူးလွန်တဲ့ တပ်သားကိုလည်း စစ်ဖက်ဆိုင်ရာ ပြစ်မှုနဲ့ရော၊ နယ်ဖက်ဆိုင်ရာ ပြစ်မှုနဲ့ပါ အရေးယူသွားမယ် လို့လည်း စစ်ကောင်စီ က ထုတ်ပြန်ကြေညာထားပါတယ်။

ဒါ့အပြင် စစ်ကောင်စီ တပ်အရာရှိတွေက မိသားစုထံ သွားရောက်တောင်းပန်ပြီး ဆေးဝါးကုသဖို့အတွက် ငွေကျပ် (၁၀)သိန်းကို ပေးခဲ့ကြောင်းလည်း ဒေါ်လွမ်းရယ်က ပြောပြပါတယ်။

“သူတို့(ဗမာစစ်တပ်) ဘက်က တာဝန်ရှိသူတွေကတော့ သူ့တပ်သားတွေကလည်း သွေးနဲ့သားနဲ့ကိုယ်ဖြစ်နေတော့ စိတ်မထိန်းနိုင်လို့ ဖြစ်သွားရတယ် ဆိုပြီး သူကိုယ်တိုင် ရိုးရာအရ လာပြီး တောင်းပန်သွားတယ်။ အဖွားအတွက် ဆေးဖိုးဝါးခ ပေးသွားပါတယ်” လို့ ဒေါ်လွမ်းရယ်က ဆိုပါတယ်။

နိုဝင်ဘာ ၁၁ ရက် ည ၁၁ နာရီ ကျော်မှာလည်း စစ်ကောင်စီ တပ်သားတွေဟာ ချင်းပြည်နယ် တီးတိန်မြို့နယ် အပ်လွယ်ရွာမှာနေထိုင်တဲ့ ကလေး(၄)ဦးမိခင် မီးနေသည်ကို မုဒိမ်းကျင့်ခဲ့တယ်လို့ အမျိုးသမီးများအဖွဲ့ချုပ် (မြန်မာနိုင်ငံ) WLB က ထုတ်ပြန်ထားပါတယ်။

မြန်မာစစ်တပ်ဟာ နှစ်ပေါင်း (၇၀)ကျော်ကြာ ပြည်တွင်းစစ် ပဋိပက္ခဖြစ်ပွားတဲ့ တိုင်းရင်းသားဒေသတွေမှာ တိုင်းရင်းသူ အမျိုးသမီးတွေကို မုဒိမ်းကျင့်တာတွေ လိင်ပိုင်းဆိုင်ရာ အကြမ်းဖက်မှုတွေကို စစ်လက်နက်သဖွယ် အသုံးပြုပြီး ကျူးလွန်ခဲ့ကြောင်း WLB ရဲ့ ထုတ်ပြန်ချက်မှာ ဖော်ပြထားပါတယ်။

အမျိုးသမီးနဲ့ မိန်းကလေးငယ်တွေအပေါ် ကျူးလွန်လျက်ရှိတဲ့ လိင်ပိုင်းဆိုင်ရာ အကြမ်းဖက်မှုတွေကို စစ်ကောင်စီဘက်က ထိရောက်စွာ စုံစမ်းစစ်ဆေးဖို့နဲ့ ချက်ချင်း အရေးယူဆောင်ရွက်ပေးဖို့လည်း WLB က တောင်းဆိုလိုက်ပါတယ်။

“စစ်ကောင်စီ တက်လာပြီးနောက်ပိုင်းမှာတော့ အမျိုးသမီးတွေကို နည်းမျိုးစုံ လိင်ပိုင်းဆိုင်ရာအကြမ်းဖက်မှုတွေ တော်တော်များများတွေ့လာရတယ်။ နိုဝင်ဘာလမှာ စစ်ကောင်စီက မုဒိမ်းမှုတွေတိုးလာတယ်” လို့ WLB ရဲ့ အထွေထွေအတွင်းရေးမှူး နော်ဆဲဆဲ က ပြောပါတယ်။

စစ်အာဏာသိမ်းပြီးနောက်ပိုင်းမှာ စစ်ကောင်စီ အဖွဲ့ဝင်တွေဟာ အမျိုးသမီးတွေအပေါ် အကြမ်းဖက်မှုက သိသိသာသာ တိုးလာတာကို တွေ့ရကြောင်း၊ လက်ရှိအချိန် ပြည်တွင်းမှာတော့ တရားမျှတမှုကို မရရှိနိုင်ပေမယ့် နိုင်ငံတကာ တရားမျှတမှု ရရှိဖို့အတွက်တော့ ချိတ်ဆက်ပြီး လုပ်ဆောင်သွားမယ်လို့ နော်ဆဲဆဲက ဆိုပါတယ်။

“ကျမတို့ WLB အနေနဲ့ စစ်ကောင်စီ က အမျိုးသမီးတွေကို အကြမ်းဖက်တာတွေ မုဒိမ်းကျင့်တာတွေကို ရနိုင်သလောက်ကောက်ယူမယ်။ နိုင်ငံတကာနဲ့ချိတ်ဆက်ပြီးတော့ တရားမျှတမှုရအောင် ဆောင်ရွက်သွားမယ်” လို့ နော်ဆဲဆဲက ပြောဆိုလိုက်ပါတယ်။

တိုင်းရင်းသားဒေသ အထူးသဖြင့် ဒီလို စစ်ရေးနဲ့ နိုင်ငံရေး ပဋိပက္ခတွေရှိနေတဲ့ ဒေသတွေမှာ အမျိုးသမီးထုတွေရဲ့ လုံခြုံရေးရော ဖွံ့ဖြိုးတိုးတက်ရေးရော မရှိကြောင်း ကွတ်ခိုင်မြို့ အမျိုးသမီးအရေး ဆောင်ရွက်နေသူတစ်ဦးက ပြောပါတယ်။

“စစ်သားတွေ ရှိတဲ့နေရာ အမျိုးသမီးတွေ လုံခြုံမှုမရှိဘူး ဆိုသလိုပဲ။ ကျမတို့ နယ်ဘက်မှာဆိုရင် ပြီးခဲ့တဲ့လက ဆရာလေးတစ်ပါး (မယ်သီလရှင်) ကလည်း စစ်သားတွေ မုဒိမ်းကျင့်တာ ခံလိုက်ရတယ်” လို့ အမျိုးသမီးအရေး ဆောင်ရွက်သူက ဆိုပါတယ်။

စစ်အာဏာသိမ်းပြီးနောက်ပိုင်းမှာ အမျိုးသမီးတွေ ဘဝလုံခြုံရေးက တစ်နေ့တခြား ပိုပြီး ယိုယွင်းလာကြောင်း၊ လက်နက်ကိုင်တိုင်းဟာ အမျိုးသမီး အရေးကိစ္စ ဝိုင်းဝန်းကူညီပေးရန်လိုအပ်ကြောင်းလည်း ၎င်းက ဆိုပါတယ်။

စစ်တပ်ရဲ့ တပ်သားမှ မုဒိမ်းမှုကျူးလွန်ခဲ့တဲ့ အသက် (၆၂)ရွယ် အဘွားဟာ လက်ရှိမှာတော့ ရုပ်ပိုင်းဆိုင်ရာ သာမက စိတ်ပိုင်းဆိုင်ရာ ထိခိုက်မှုတွေရှိနေပြီး သူစိမ်းလူကိုမြင်ရင် ကြောက်စိတ်တွေဖြစ်နေပြီး နေအိမ်ထဲမှာ တယောက်တည်း မနေရဲတဲ့ အခြေအနေဖြစ်နေပါတယ်။

လက်ရှိ အဘွားရဲ့ အခြေအနေကိုတော့ “ အခုဆိုအဘွားက လူတွေကြောက်နေတယ်။ နဂိုကတည်းက ကျန်းမာရေး မကောင်းတဲ့ အဘွားက အရှက်ပါရနေတော့ သူ့ကျန်းမာရေး အတွက် ကျမတို့ စိုးရိမ်းနေရတယ်”လို့ ဒေါ်လွမ်းရယ်က အခုလို ပြောပြပါတယ်။