သျှမ်းပြည် မြောက်ပိုင်း လားရှိုးမြို့နယ် မိုင်းယော်တိုက်နယ် အတွင်း စစ်ကောင်စီနှင့် မြောက်ပိုင်းမဟာမိတ်တို့ တိုက်ပွဲဖြစ်ပွားမှုကြောင့် ပြည်သူများ လယ်ယာသွားရန်အတွက် အခက်အခဲများစွာ ကြုံနေရကြောင်း သတင်းသိရသည်။

စစ်ကောင်စီနှင့် မြောက်ပိုင်းမဟာမိတ်တို့ ပစ်ခတ်မှုဖြစ်ပြီး နေ့စဥ်ရက်ဆက်ကြားနေရသည့် ပစ်ခတ်သံများနှင့် ရွာနားစပ်သို့ မကြာခဏကျလေ့ရှိသည့် အမြောက်ကျည်ဆံများကြောင့် လယ်ယာများကိုပင် ပြည်သူများ မသွား ရဲကြောင်း မိုင်းယော်တိုက်နယ် ဒေသခံတစ်ဦးက ပြောသည်။

“သူတို့ပစ်ခတ်မှုတွေက နေ့တိုင်းရှိနေတယ်၊ မဟာမိတ်ဘက်က ချောင်းပြီးတိုက်ရင် စစ်ကောင်စီဘက်က ပြန် လိုက်ပစ်ပြီးတော့ လက်နက်ကြီးနဲ့ ပြန်ချတာ၊ တချို့နေ့တွေက ပစ်ခတ်မှုတွေပြင်းတယ်၊ အဲ့ကြောင့် ရွာသားတွေလည်း ရွာပြင် မထွက်ရဲကြဘူး” ဟု မိုင်းယော်တိုက်နယ် ဒေသခံ အမျိုးသားတစ်ဦးက ပြောသည်။

စစ်ကောင်စီ တပ်နှင့် မြောက်ပိုင်းမဟာမိတ်တပ်တို့သည် မိုင်းယော်တိုက်နယ် မိုင်းယန်းကျေးရွာအုပ်စုအတွင်းတို့ တိုက်ပွဲဖြစ်ပွားနေလျက်ရှိပြီး ပြည်သူများသည် မြို့တက်ပြီး စားနပ်ရိက္ခာများ ဝယ်ခြမ်းရန်အတွက်နှင့် လယ်ယာ ခြံများကို သွားကြည့်ရန်အတွက် အခက်အခဲရှိနေကြောင်း သိရသည်။

“အခက်အခဲကတော့ ရှိတာပေါ့၊ ရွာထဲမှာနေပြီးတော့ ပစ်ခတ်သံတွေကြားနေရတာလည်း ကြောက်ရတယ်လေ၊ ကိုယ့်နား မရောက်လာနိုင်ဘူးလို့ မပြောနိုင်ဘူး၊ မြို့တက်ပြီး ဆန်ဆီဆားတွေ ဝယ်ဖို့လည်း မလွယ်တော့ဘူး၊ အခုဆို ရိတ်ထားတဲ့စပါးတွေကလည်း ဒီအတိုင်း ပုံထားရတယ်၊ သွားမကြည့်နိုင်သေးဘူး” ဟု မိုင်းယန်းကျေးရွာ အုပ်စုအတွင်းမှ ဒေသခံ တစ်ဦးက ပြောသည်။

အာဏာသိမ်း စစ်ကောင်စီတပ်နှင့် မြောက်ပိုင်းမဟာမိတ်တပ်ဖွဲ့တို့သည် ပြီးခဲ့သည့် အောက်တိုဘာလ နှောင်းပိုင်းမှ စတင်ကာ ယနေ့ နိုဝင်ဘာလ ၂၄ ရက်နေ့အထိ မိုင်းယော်တိုက်နယ်အတွင်း ထိပ်တိုက် တိုက်ပွဲများ စတင်ခဲ့ခြင်း ဖြစ်သည်။

အဆိုပါ မိုင်းယော်တိုက်နယ်အတွင်းမှ မြောက်ပိုင်းမဟာမိတ်များကို ထိုးစစ်ဆင်နေသော စစ်ကောင်စီတပ်ဖွဲ့ သည် တပ်မ ၉၉၊ ခြေမြန်တပ်ရင်း (ခမရ ၃၃၆)တပ်ဖွဲ့ ဖြစ်ပြီး ၎င်းတို့၏ ရမ်းသမ်းပစ်ခတ်မှုကြောင့် မိုင်းယော်တိုက်နယ်မှ ရွာခံအမျိုးသမီးတစ်ဦး သေဆုံးပြီး ၂ ဦး ထိခိုက်ဒဏ်ရာ ရရှိခဲ့ကြောင်းလည်း သိရသည်။