သျှမ်းပြည်မြောက်ပိုင်း သီပေါမြို့နယ် ဆင်ကျော့ကျေးရွာအုပ်စုထဲတွင် ယမန်နေ့( နိုဝင်ဘာ ၂၃) မှစပြီး စစ်ကောင်စီ လက်အောက်ခံ လဝက ရုံးများက ပြည်သူများကို မှတ်ပုံတင်လုပ်ပေးပြီး တစ်ဦးလျှင် ငွေကျပ် ၁ သောင်းခွဲ ပေးဆောင်ရကြောင်း စုံစမ်းသိရှိရသည်။
မှတ်ပုံတင်လုပ်သူများအပြင် အိမ်ထောင်စု အသစ်လုပ်သူများ၊ အိမ်ထောင်စုထဲတွင် လူသစ်ထပ်မံဆွဲထည့်သူများလည်း ငွေပေးဆောင်ရကြောင်း သိရသည်။
“သွားလုပ်တဲ့သူတွေက တစ်ယောက်ကို ၁ သောင်းခွဲ ပေးရတယ်။ မှတ်ပုံတင်လုပ်ရင် ၁ သောင်းခွဲ၊ အိမ်ထောင်စု လုပ်ရင်လည်း ပေးရတယ်။ လူသစ်ထပ်ဆွဲထည့်ရင်လည်း ပေးရတယ်။ အကုန်လုံးက ၁ သောင်းခွဲစီ ပေးရတာ“ ဟု မှတ်ပုံတင်သွားလုပ်သူ အမျိုးသားတစ်ဦးက ပြောသည်။
လက်ရှိ မြန်မာနိုင်ငံတွင် နိုင်ငံရေးအခြေနေနှင့် ကိုဗစ် – ၁၉ ကြောင့် စီးပွားရေးရှာဖွေစားသောက်ရန် ခက်ခဲနေချိန်မှာ သက်ဆိုင်ရာအနေဖြင့် ငွေကျပ် ၁ သောင်းခွဲ တောင်းနေသည့်အပေါ် အဆင်မပြေကြောင်းလည်း ဒေသခံ တစ်ဦး ကပြောသည်။
“အခုလက်ရှိအချိန်နဲ့ဆို ဈေးကြီးတာပေါ့။ အခုတော့ နိုင်ငံရေးလည်း မကောင်းဘူး။ စီးပွားရေးလည်း မရှိဘူး။ ကျမတို့ စားဝတ်နေရေးအတွက်တောင် မနည်းရှာရတာလေ။ အကုန်လုံးက ဈေးကြီးပေးဝယ်နေရတာ။ စိုက်ပျိုးရေးတွေလည်း မဖြစ်ဘူး” ဒေသခံအမျိုးသမီး တစ်ဦးက ဆိုသည်။
အဆိုပါ ငွေပမာဏ ၁ သောင်းခွဲသည် မှတ်ပုံတင်လုပ်ပေးသည့် လဝက ရုံးက သတ်မှတ်ထားကြောင်း ကျေးရွာအုပ်ချုပ်ရေးမှူက သျှမ်းသံတော်ဆင့်ကို ပြောသည်။
“သူတို့ရုံးက သတ်မှတ်ထားတာလေ။ ကျနော်တို့လည်း ကျေးရွာ လူထုကို အစည်းဝေးခေါ်ပြောတယ်။ တစ်ချို့လည်း လာလုပ်ကြတယ်။ ငွေတောင်းတာက ကျနော်တို့ကနေ တောင်းတာတော့ မဟုတ်ဘူး။ လဝကရုံးကနေ တစ်ဆင့် ဈေးသတ်မှတ်ထားတာဖြစ်လို့ ကျနော်တို့လည်း တောင်းတယ်” ဟု ဆိုင်ကျော့ ကျေးရွာအုပ်ချုပ်ရေးမှုက ပြောသည်။
အဆိုပါ မှတ်ပုံတင်ခကို ဆိုင်ကျော့ကျေးရွာအုပ်စု တစ်ခုထဲပေးဆောင်ရတာ မဟုတ်ကြောင်း၊ သီပေါမြို့နယ်ရှိ ကျေးရွာများအားလုံးက ပေးဆောင်ရသည်ဟု အုပ်ချုပ်ရေးမှူးက ထပ်လောင်းပြောသည်။
“ကျနော်တို့ ကျေးရွာအုပ်စုပဲပေးရတာမဟုတ်ဘူး။ တခြားကျေးရွာအုပ်စုတွေလည်း ပေးရပါတယ်။ မြို့မှာသွားလုပ်ရင် ဒီထက်တောင် ပိုကုန်နိုင်သေးတယ်။ ဒါတွေကိုတော့ ကျနော်တို့ ပြည်သူတွေကိုလည်း သိစေချင်တယ်” ဟု အထက်ပါ ကျေးရွာအုပ်ချုပ်ရေးမှူးက ထပ်လောင်းပြောသည်။
ယခင်က NLD အစိုးရလက်ထက်တွင် ဒေသခံများ မှတ်ပုံတင်လုပ်ရာတွင် စာရွက်စာတမ်းကြေး ၂ ထောင် ၃ ထောင်သာ ပေးရပြီး အာဏာသိမ်းပြီးနောက် မှတ်ပုံတင်လုပ်ရာတွင် ၁ သောင်းကျော်ထိ ပေးဆောင်လာရကြောင်း သိရသည်။
