သျှမ်းပြည်တောင်ပိုင်း တောင်ကြီးမြို့နယ် အေးသာယာမြို့မ ဈေးရှေ့တွင် ယနေ့ (နိုဝင်ဘာ ၂၂)ရက် နေ့လည် ၂ နာရီခွဲဝန်းကျင်တွင် Mask (နှားခေါင်းစည်း )မတပ်သူ များကို စစ်ကောင်စီတပ်သားများက တုတ်ဖြင့် လိုက်ရိုက်နေကြောင်း ဒေသခံများက ပြောသည်။

ယနေ့( နိုဝင်ဘာလ ၂၂) ရက် နေ့လည်ပိုင်း ၂ နာရီခွဲဝန်းကျင်ခန့်တွင် Mask မတပ်ဘဲ အပြင်ထွက်လာသည့် ပြည်သူများကို စစ်ကောင်စီတပ်သားများက မဖွယ်မရာများ ဆဲဆိုပြီး တုတ်ဖြင့် လိုက်ရိုက်ခဲ့ကြောင်း သိရသည်။

“ကျနော့်ရှေ့မှာတင် နှစ်ယောက်က အရိုက်ခံရတယ်၊ Mask မတပ်လို့တဲ့၊ သူတို့ကိုယ်တိုင်လည်း Mask မတပ်ပါဘူး၊ သူတို့ကို ရပ်မပေးရင်လည်း လိုက်ရိုက်တယ်၊ ရပ်ပေးတော့ ခြေသလုံးတို့ တင်ပါးတို့ကို တုတ်နဲ့ရိုက်တာ၊ တစ်ယောက်ကို ၁ ချက် ၂ ချက်ရိုက်ကြတယ်” ဟု မြင်တွေ့ခဲ့သည့် ပြည်သူတစ်ဦးက ပြောသည်။

စစ်ကောင်စီတို့သည် လမ်းသွားလမ်းလာပြည်သူများကို ယင်းကဲ့သို့ မဖွယ်မရာများ ပြောဆိုကြိမ်းမောင်းသည့် အပြင် ၎င်းတို့ ကိုယ်တိုင်လည်း Mask မတပ်ထားကြောင်း သိရသည်။

“သူတို့ (တပ်သား)တွေလည်း Mask မတပ်ဘူး။ လူပုံအလယ်မှာ ဒီလိုလုပ်တာတော့ မကောင်းဘူးပေါ့၊ လူ့ဂုဏ် သိက္ခာကျဆင်းစေတဲ့ လုပ်ရပ်မျိုးလို့ မြင်မိတယ်။ တခြားနည်းနဲ့ အရေးယူတာလုပ်လို့ရပါတယ်” ဟု အထက်ပါ ပုဂ္ဂိုလ်က ပြောသည်။

ကိုဗစ် – ၁၉ ကို အကြောင်းပြပြီး ရောဂါကို ထိန်းချုပ်ရန် ကြိုးစားနေသော်လည်း လူ့ကျင့်ဝတ်တွေကို လေးစားလိုက်နာသင့်ကြောင်းလည်း ၎င်းကပြောသည်။

စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် ကိုဗစ် – ၁၉ ကို အကြောင်းပြပြီး ဥပဒေအမျိုးမျိုး ထုတ်ပြန်ကာ ပြည်သူလူထုတို့၏ သွားလာရေးများကို ထိန်းချုပ်တင်းကြပ်ထားကြောင်းသိရသည်။