တောင်ကြီးတက္ကသိုလ် သျှမ်းစာပေနှင့်ယဉ်ကျေးမှုအသင်းမှ ဦးစီးဦးဆောင်ပြုလုပ်ကာ သျှမ်းကျောင်းသား မောင်မယ်သစ်လွင်ကြိုဆိုပွဲနှင့် နောက်ဆုံးနှစ်ကျောင်းသားများအား နှုတ်ဆက်ပွဲအခမ်းအနားတရပ်ကို တောင်ကြီးမြို့ တက္ကသိုလ်တွင်ကျင်းပခဲ့သည်။

နံနက် ၉ နာရီတွင် အခမ်းအနားစတင်ကျင်းပ ရာ ၂၀၁၇-၂၀၁၈ ခုနှစ်အတွင်း ထူးချွန်ထက်မြက်သောကျောင်းသားများအား ဆုပေးခြင်းအခမ်းအနားပါ ပြုလုပ်ခဲ့ကြောင်းသိရသည်။

ဧည့်သည်တော်များအဖြစ် သျှမ်းပါတီများ ၊ မြို့နယ်အသီးသီးမှ သျှမ်းစာပေယဉ်ကျေးမှုအဖွဲ့ကိုယ်စားလှယ်များ တက္ကသိုလ်အသီးသီးမှ သျှမ်းကျောင်းသားလူငယ်မောင်မယ်ကိုယ်စားလှယ်များစုစုပေါင်း ၁၀၀၀ နီးပါးတက်ရောက်ကြကြောင်းသိရသည်။

အခမ်းအနားဖြစ်မြောက်ရေးအဖွဲ့မှအလုပ်အမှုဆောင်စိုင်းလောဝ်ဖှက – သျှမ်းပြည်တွင်းက တက္ကသိုလ်ကျောင်းသားများကိုယ်စားလှယ်သာမက တခြားပြည်နယ်နဲ့တိုင်း က တက္ကသိုလ် အသီးသီးက သျှမ်းကျောင်းသားများကိုယ်စားလှယ်အဖွဲ့ကလည်း လာပြီးတော့ တက်ရောက်အားပေးပါတယ်။ ကျနော်တို့ရည်ရွယ်ချက်ကတော့ ကျောင်းသားအချင်းချင်းချိတ်ဆက်အလုပ်လုပ်သွားနိုင်အောင်ဖြစ်ပါတယ်။ ပြီးတော့ မိမိတို့နဲ့သက်ဆိုင်တဲ့လူမှုအသိုင်းအဝိုင်းအသီးသီးမှာ ဦးဆောင်ဦးရွက်လုပ်သွားနိုင်အောင်ရည်ရွယ်ပါတယ် – ဟုသျှမ်းသံတော်ဆင့်အားပြောသည်။

ဆုဆွတ်ခူးရရှိသော ထူးချွန်ကျောင်းသား ၁၅ ဦးမှာ တက္ကသိုလ်ဝင်တန်းအောင်ထူးချွန်သောကျောင်းသားများနှင့် မဟာတန်းတက်ရောက်မည့် ထူးချွန်ကျောင်းသားများဖြစ်ကြောင်းသိရသည်။

ဆုလက်ခံရရှိသော တက္ကသိုလ်ကျောင်းသူ နန်းသင်ဇာဦးက- ကျောင်းသားကျောင်းသူလေးတွေ ပိုမိုကြိုးစားမှုရှိလာအောင် အားပေးသလိုဖြစ်ပါတယ်။ ဒီလိုအခမ်းအနားလေးတွေကျင်းပပေးတဲ့အတွက် တက္ကသိုလ်သျှမ်းစာပေယဉ်ကျေးမှုအဖွဲ့ကိုကျေးဇူးတင်ပါတယ်။ အဖွဲ့ရဲ့ရည်မှန်းချက်အတိုင်းပါဘဲ ကျမတို့ကျောင်းပြီးရင် လူမှုအသိုင်းအဝိုင်းမှာပါ၀င်အားဖြည့်ပြီးလှုပ်ရှားသွားမှာပါ။ မောင်ညီမလေးတွေကိုလည်း စာကြိုးစားဖို့တိုက်တွန်းပါတယ်။ စာတခုတည်းမဟုတ်ပါဘူး။ အဘက်ဘက်က ဗဟုသုတရနိုင်တာတွေကိုလည်းလေ့လာဖို့တိုက်တွန်းပါတယ်- ဟု ပြောဆိုသည် ။

လာမည့်နှစ်အတွင်းကျင်းပမည့် မောင်မယ်သစ်လွင် သျှမ်းကျောင်းသားများအားကြိုဆိုပွဲတွင် ရိုးရာယဉ်ကျေးမှု နှင့် စာပေကိုသုတေသနပြုသည့်အစီအစဉ်ပါ ထည့်သွင်းကာပြုလုပ်သွားမည်ဖြစ်ကြောင်းသိရသည်။