သျှမ်းပြည်တောင်ပိုင်း ဆီဆိုင်မြို့နယ်အတွင်း ကိုဗစ်-၁၉ ကူးစက်မှုနှုန်း များပြားသည့်အတွက် Semi – lockdown တစ်ပတ် ထပ်မံတိုးမြင့်လိုက်ကြောင်း စုံစမ်းသိရှိရသည်။

ဆီဆိုင်မြို့နယ်အတွင်း နိုဝင်ဘာ (၁၆ မှ ၂၂)ရက်ထိ မွန်းလွဲ ၂ နာရီမှ နောက်နေ့ နံနက် ၄ နာရီအထိ Semi – lockdown ပြုလုပ်ထားကြောင်း သိရှိရသည်။

“ကိုဗစ်-၁၉ ကူးစက်မှုများတာကို အကြောင်းပြုပြီး ဒီလို lockdown ခနခန လုပ်တာ သူတို့ဘက်က တစ်ခုခု စိုးရိမ်နေကြသလိုပဲ။ ဘာလို့လဲဆိုတော့ ဆီဆိုင်က ဖယ်ခုံမြို့နဲ့ ကယားပြည်နယ်တွေနဲ့ ထိစပ်နေတော့ တိုက်ပွဲတွေ ပွားလာမှာကို စိုးရိမ်နေလို့ထင်တယ်။ ဒါမှမဟုတ် စစ်ရှောင်တွေ ကျနော်တို့ဘက် ရောက်လာမှာကို စိုးရိမ်နေတာလဲ ဖြစ်နိုင်တယ်” ဟု ဆီဆိုင်ဒေသခံ အမျိုးသားတစ်ဦး က သျှမ်းသံတော်ဆင့်ကို ပြောသည်။

ဖယ်ခုံမြို့နယ်သည် စစ်ကောင်စီ နှင့် PDF တို့ နေ့စဉ်နှင့်အမျှ တိုက်ပွဲဖြစ်ပွားပြီး စစ်ရှောင်များလည်း ရှိနေသည်။ ဖယ်ခုံမြို့နယ်နှင့် ဆီဆိုင်မြို့နယ်သည် (၈၂)ကီလိုမီတာ သာ ကွာဝေးသည်။

ယခုလို ထပ်မံပြီး Semi-lockdown ပြုလုပ်ခြင်းသည် ဒေသခံများအတွက် စားဝတ်နေရေး အခက်ခဲများစွာ ကြုံတွေ့နိုင်ကြောင်း သိရှိရသည်။

“ကျနော်တို့ စားဝတ်နေရေးအခက်ခဲတွေ ကြုံတွေ့နေရတယ်။ မနက် ၅ နာရီကနေ ညနေ ၂ နာရီထိပဲ ဆိုင်တွေ ရောင်းခွင့်ရှိတော့ ညပိုင်းဈေးသည်တွေအတွက်က အခက်ခဲတွေဖြစ်တယ်။ ဥပမာ အကင်ဆိုင်ဆိုတော့ ညမှ ရောင်းရတော့ ခုမရောင်းရတော့ဘူး” ဟု ဆီဆိုင်မှ ဈေးသည် အမျိုးသားတစ်ဦးက ပြောသည်။

ဆီဆိုင်မြို့နယ်အတွင်း သက်ဆိုင်ရာဌာနများ ကိုဗစ် – ၁၉ ရှိ မရှိ ကွင်းဆင်းစစ်ဆေးမှုများ ယခင်ကထက် ပိုမို စစ်ဆေးလာကြောင်း စုံစမ်းသိရှိရသည်။