သျှမ်းပြည်မြောက်ပိုင်း ကျောက်မဲမြို့နယ် စခန်းသာကျေးရွာတွင်နေထိုင်သည့် အမျိုးသမီးတစ်ဦး တရုတ်နိုင်ငံတွင် ၆ လကျော်ကြာ ဖမ်းဆီးခံထားရပြီးနောက် နိုဝင်ဘာ ၁၄ ရက်နေ့က ပြန်လည်လွတ်မြောက်လာခဲ့ကြောင်း စုံစမ်းသိရှိရသည်။

ထိုအမျိုးသမီး နန်းဆိုင်ပွဲ သည် တရုတ်နိုင်ငံထဲသို့ တရားမဝင် ဝင်ရောက်ပြီး အလုပ်သွားရောက်လုပ်ကိုင်ရာမှ ဖမ်းဆီးခံရကြောင်း သိရသည်။

“သူအခုတော့ အိမ်ပြန်ရောက်လာပါပြီ။ တရားမဝင် ဝင်ရောက်လို့ဆိုပြီး ဖမ်းခံရတာပါ။ ၆ လလောက် ထောင်ကျခံရတယ်။ အိမ်နဲ့လည်း သူတို့ အဆက်အသွယ် မပေးလုပ်ဘူး။ တစ်ချို့ပစ္စည်းတွေလည်း မရလာဘူး။ အိမ်ရောက်လာလို့တော့ ဝမ်းသာပါပြီ” ဟု နန်းဆိုင်ပွဲ၏ မိခင်ဖြစ်သူက ပြောသည်။

နန်းဆိုင်ပွဲသည် တရုတ်နိုင်ငံမှာ ထောင်ကျနေချိန်တွင် ညှင်းပန်းနှိပ်စက်ခံရခြင်းမရှိသော်လည်း ထောင်မှပြန်ထွက်လာချိန်တွင် သူမ၏ ငွေနှင့် အဝတ်စားများကို ပြန်လည်ရရှိခြင်း မရှိကြောင်း သိရသည်။

“ထောင်ထဲမှာတော့ နှိပ်စက်ခံရတာတွေတော့မရှိပါဘူး။ ဖမ်းခံရတဲ့သူ အများစုက မြန်မာနိုင်ငံသားတွေပါ။ ဒါပေမဲ့ ကျမပြန်ထွက်လာတော့ ကျမရဲ့ ပိုက်ဆံတွေပြန်မရဘူး။ အဝတ်အစားလည်း မရဘူး။ ထောင်ကနေထွက်လာတာ ဖုန်း ပြန်ရခဲ့တယ်” ဟု နန်းဆိုင်ပွဲက ပြောသည်။

နန်းဆိုင်ပွဲသည် ဧပြီ ၁၉ ရက်နေ့တွင် တရုတ်နိုင်ငံ စန်တုံမြို့ တွင် ဖမ်းဆီးခံရကြောင်း သိရသည်။

စစ်အာဏာသိမ်းပြီးနောက်ပိုင်း မြန်မာနိုင်ငံမှ ပြည်သူများက နေ့စဉ် မြန်မာ – ထိုင်း၊ မြန်မာ – တရုတ် နယ်စပ်တွင် တရားမဝင် ခိုးဝင်လျက်ရှိကြောင်း သိရသည်။