သျှမ်းပြည်အရှေ့ပိုင်း တာချီလိတ်မြို့မိုင်းဖုန်း(ခ)ရပ်ကွက် နေအိမ်တစ်လုံး ဓားပြတိုက်ခံရပြီး ထိုင်းဘတ်ငွေ ၇ သိန်းခန့် ပါသွားကြောင်း စုံစမ်းသိရသည်။

ဖြစ်စဉ်မှာ ပြီးခဲ့သည့် နိုဝင်ဘာလ ၁၃ ရက် နေ့လည်ပိုင်း ၁ နာရီဝန်းကျင်တွင် ဆိုင်ကယ်ဖြင့်လာသော အမျိုးသား ၂ ဦးသည် တာချီလိတ်မြို့ မိုင်းဖုန်း (ခ)ရပ်ကွက်ရှိ လုံးစိုင်းဆမ်၊ ပါနန်းမားတို့၏ နေအိမ်ကို ဝင်ရောက် ဓားပြတိုက်သွားကြောင်း သတင်းသိရသည်။

“အဲ့နေ့မှာ လူကြီးတွေက အိမ်မှာ မရှိဘူး၊ ကျနော်တို့ တူလေး ကိုရင်တစ်ပါးက နေအိမ်ကို ပြန်လာတဲ့ချိန် လူဆိုး တွေက ရောက်လာတာတဲ့၊ အိမ်ထဲဝင်လာပြီး တစ်ယောက်က ကိုရင်လေးကို သေနတ်ထောက်ထားတယ်၊ နောက် တစ်ယောက်က အိမ်ထဲကိုဝင်မွှေသွားတာ၊ ထိုင်းဘတ်ငွေ ၇ သိန်းကျော်၊ ရွှေတုံး ၁၂ တုံးနဲ့ ဒင်္ဂါးပြား ၃၀ ကျော်ကို ယူသွားတယ်၊ စုစုပေါင်း တန်ဖိုးက ဘတ်ငွေ ၁၂ သိန်းလောက်ရှိမယ်” ဟု လုံးစိုင်းဆမ်၏ သားဖြစ်သူက သျှမ်းသံတော်ဆင့်ကို ပြောသည်။

အဆိုပါ ဓားပြလာတိုက်သည့် သူနှစ်ဦးသည် မျက်နှာတစ်ခုလုံးဖုံးထားပြီး ရုပ်ဖျက်ထားသည့်အတွက် မည်သူမည်ဝါဖြစ်သည်ကို မသိရကြောင်းလည်း အထက်ပါ ပုဂ္ဂိုလ်က ပြောသည်။

“သူတို့ မျက်နှာဖုံးစွပ်ထားတာ၊ ပြီးတော့ ကိုရင်လေးကိုလည်း သေနတ်ထောက်ထားတော့ သူကလည်း ဘယ်လိုမှ အော်ဟစ်အကူအညီတောင်းလို့လည်း မရဘူးလေ၊ အဲ့ကြောင့် ဘယ်သူလာလုပ်သွားမှန်းမသိရဘူး” ဟု လုံးစိုင်းဆမ်၏ သားဖြစ်သူက ပြောသည်။

အလားတူပင် ပြီးခဲ့သည့် တစ်ပတ်ကလည်း တာချီလိတ်မြို့နယ် ဆွတ်ဆိုင်ကျေးရွာမှာ နေအိမ်ထဲထိ ဓါးပြတိုက်ခြင်းခံလိုက်ရကြောင်း ဒေသခံအမျိုးသားတစ်ဦးက ပြောသည်။

“လဆန်းပိုင်းတုန်းက ဆွတ်ဆိုင်ရွာဘက်မှာလည်း ဓားပြတိုက်ခံရတာ ရှိတယ်၊ အဲ့မှာလည်း ထိုင်းဘတ်ငွေ ၂ သိန်းကျော်နဲ့ ရွှေတုံး ၂၀ ကျော် ပါသွားတယ်၊ နေ့ဘက်မှာပဲ ဓားပြတိုက်ကြတာ၊ လူကို ဘာမှမလုပ်သွားတာ ကံကောင်းတယ်ပြောရမလိုပဲ” ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်တပ်မှ နိုင်ငံတော်အာဏာသိမ်းယူပြီးနောက်ပိုင်းတွင် ပြည်တွင်းနိုင်ငံရေး မငြိမ်မသက်မှုနှင့် သျှမ်းပြည်အရှေ့ပိုင်း တာချီလိတ်မြို့နယ်အတွင်းမှာလည်း ခိုးဆိုးလုယက်မှုများအပြင် လက်ရှိတွင် နေ့ခင်းပိုင်းလည်းမရှောင် ဓါးပြတိုက်မှုများရှိနေသည့်အတွက် ပြည်သူများ စိုးရိမ်ထိန်လန့်နေကြကြောင်း သိရသည်။