သျှမ်းမြောက် ကျောက်မဲမြို့နယ်တွင် ယမန်နေ့(နိုဝင်ဘာ ၁၄ ရက်) တစ်ရက်တည်း ယာဥ်မတော်တဆမှု (၃)ကြိမ်ဖြစ်ပွားခဲ့ပြီး (၂)ဦး သေဆုံးခဲ့ကြောင်း စုံစမ်းသိရသည်။
ယမန်နေ့ မနက် (၅)နာရီကျော် အချိန်တွင် ဂုတ်တွင်းအဆင်း ကျောက်မဲဘက်အခြမ်းတွင် တွဲကားတစ်စီးမှ နံရံကို ဝင်တိုက်မိခဲ့ပြီး ယာဥ်မောင်း ခြေထောက်ဒဏ်ရာရရှိခဲ့ကြောင်း သိရသည်။
“မနေ့က (၃)နေရာဖြစ်တယ်၊ မနက် (၅)ကျော်က ဂုတ်တွင်းမှာ ဖြစ်တာ၊ အဲ့ချိန်က နှင်းလည်း မကွဲသေးဘူးလေ၊ ကွေ့ရမယ့် နေရာမှာ သတိမထားပဲ ဆွဲကွေ့လိုက်သလိုပဲ၊ ကမ်းပါးယံ ဝင်ဆောင့်ပြီး အောက်ပိုင်း ညှပ်သွားတာ၊ ကားဆရာခြေထောက် အရိုးထိသွားတယ်” ဟု သွားရောက်ကူညီသည့် ကမ်းလင့်လက်များ လူမှုကူညီရေး အသင်းဝင်တစ်ဦးက သျှမ်းသံတော်ဆင့်ကို ပြောသည်။
ထို ယာဥ်မတော်တဆမှု ဖြစ်ပြီးနောက် မနက် (၈)နာရီအချိန်တွင်လည်း ဂုတ်တွင်းအဆင်း Aမိုင်းကွင်း အနီးတွင် Hide Ace ကားတစ်စီး ဘရိတ်ပေါက်တိမ်းမောက်ကာ ယာဥ်မောင်း သေဆုံးခဲ့ကြောင်း သိရသည်။
“Aမိုင်းကွင်း အနီးမှာဖြစ်တာက Hide Ace ကား မောက်တာပါ၊ ဘရိတ်ပေါက်တယ်လို့ ပြောတာပဲ၊ ထိန်းမရတော့လို့ ကားသမားရော၊ စပယ်ယာရော ခုန်ချတာ၊ ကားသမားက ပွဲချင်းပြီးသေသွားတယ်၊ ဗိုက်ပေါက်ပြီး အူထွက်သွားတယ်၊ ကားကြိတ်ပြီး သေသွားတဲ့ အနေအထားပဲ၊ စပယ်ယာတော့ ဘာမှမဖြစ်ဘူး” ဟု အဆိုပါ ပရဟိတ အသင်းဝင်က ပြောသည်။
ထို့အပြင် ညနေ (၄)ကျော်အချိန်တွင်လည်း ပင်တိန်ကျေးရွာအနီး မန္တလေး − မူဆယ် ပြည်ထောင်စု လမ်းမကြီးပေါ်တွင် ဆိုင်ကယ်နှင့် တွဲကား ပွတ်တိုက်မိခြင်းကြောင့် ကွန်ကော်ကျေးရွာနေ ဆိုင်ကယ်မောင်းနှင်သူ အသက် (၂၂)နှစ်အရွယ် လူငယ်အမျိုးသားတစ်ဦး ပွဲချင်းပြီး သေဆုံးသွားကြောင်း သိရသည်။
ယမန်နေ့တွင် ကျောက်မဲမြို့နယ်အတွင်း မိုးသည်းထန်စွာရွာသွန်းခဲ့ပြီး ယခုလို ရာသီဥတုမျိုးတွင် ယာဥ်မောင်းများ အနေဖြင့် ပိုမိုသတိထားပြီး မောင်းနှင်သင့်ကြောင်း ဒေသခံတစ်ဦးက ပြောသည်။
“မနေ့ကဆို တစ်ရက်လုံး မိုးရွာတယ်၊ လမ်းမြင်ကွင်းလည်း မရှင်းဘူး၊ ဒီလိုအချိန်ဆို ပုံမှန်မောင်းတဲ့ အရှိန်ထက် ရှော့ပြီး မောင်းသင့်တယ်၊ ဒီလမ်းကြောက ယာဥ်တိုက်မှုတွေ ခဏခဏဖြစ်နေတော့ ပိုပြီးသတိထားသင့်တယ်” ဟု အဆိုပါဒေသခံက ပြောသည်။
Leave a Comments