သျှမ်းပြည်မြောက်ပိုင်း မိုင်းရယ်မြို့တွင် ကျောင်းများဖွင့်လှစ်ပြီး တစ်ပတ်ကျော်အတွင်း ကျောင်းဆရာမ အပါအဝင် ကျောင်းသား ၂၆ဦး ကိုဗစ်ပိုးတွေ့ကြောင်း သတင်းသိရသည်။
စစ်ကောင်စီက နိုဝင်ဘာ ၁ ရက်နေ့မှစတင်ကာ စာသင်ကျောင်းများကို ပြန်လည်ဖွင့်လှစ်ခဲ့ပြီး တစ်ပတ်ကျော် ကာလအတွင်း ပညာရေး ဝန်ထမ်းနှင့် ကျောင်းသား စုစုပေါင်း (၂၆)ဦး ကိုဗစ် – ၁၉ ရောဂါပိုး တွေ့ရှိခဲ့ကြောင်း မိုင်းရယ်မြို့ ဟိတဓရ လူမှုကူညီရေးအသင်းထံမှ သိရသည်။
“RDT နဲ့ စစ်ကြည့်ရင်း တွေ့တာပါ၊ ကျောင်းကနေ ပိုးတွေ့လူနာက ဒီနေ့ထိဆို ၂၆ ဦး ရှိပါတယ်၊ ကျောင်းသူ/ ကျောင်းသားတွေက များတယ်၊ ဆရာမက ၁ ဦးပဲ” ဟု အမည်မဖော်လိုသည့် မိုင်းရယ်မြို့မှ ဟိတဓရလူမှုကူညီ ရေးအသင်းဝင် တစ်ဦးက ပြောသည်။
လက်ရှိတွင် ကျောင်းပြန်ဖွင့်သည့် စာသင်ကျောင်းများအနက် အထကကျောင်းမှ ကျောင်းသား/သူ ၇ ဦး၊ ဟိုရ အထက (ခွဲ)မှ ၇ ဦး၊ အလကမှ ၂ ဦး၊ မူလွန်ကျောင်းမှ ၁ ဦး၊ အမက ၂ မှ ၈ ဦးနှင့် ကျောင်းဆရာမ ၁ ဦးတို့ထံမှ ကိုဗစ်ပိုးတွေ့ခဲ့ခြင်းဖြစ်ကြောင်း သိရသည်။
“ဒီနေ့ထိ စာသင်ကျောင်းတွေက ဖွင့်ထားနေတုန်းပဲ၊ ဆေးဖျန်းပြီးတော့ ကလေးတွေကို ကျောင်းတက်ခိုင်းတယ်ပေါ့၊ ကိုဗစ်ရောဂါနဲ့ ပတ်သက်လို့ ဘာစည်းကမ်းသတ်မှတ်ချက်မှ မရှိပါဘူး” ဟု အထက်ပါ ပုဂ္ဂိုလ်က ပြောသည်။
အဆိုပါ စာသင်ကျောင်းမှ ကိုဗစ်ပိုး ကူးစက်ခံရတဲ့ ဆရာမနှင့် ကျောင်းသူ၊ ကျောင်းသားများကို မိုင်းရယ်မြို့ ပြည်သူ့ဆေးရုံသို့ ပို့ဆောင်ထားပြီးဖြစ်ကြောင်းလည်း ဟိတဓရ အသင်းဝင်တစ်ဦးက ပြောသည်။
“အခုလို စာသင်ကျောင်းတွေ ပြန်ဖွင့်တာကလည်း မဖွင့်မနေရဆိုတဲ့သဘောမျိုးနဲ့ဖွင့်ရတာရှိတယ်၊ ဆိုတော့ ကျနော်တို့ ပရဟိတအနေနဲ့ ပြောရမယ်ဆိုရင် ကလေးတွေ ဒီလောက်ထိ ရောဂါကူးစက်ခံနေရတဲ့အတွက် ကျောင်းတွေကို ခေတ္တဆက်ပိတ်ထားစေချင်တယ်” ဟု ၎င်းကပြောသည်။
မိုင်းရယ်မြို့နယ် အပါအဝင် သျှမ်းပြည်အတွင်း တစ်ချို့မြို့နယ်ရှိ စာသင်ကျောင်းများကိုလည်း စစ်ကောင်စီ လက်အောက်ခံ ပညာရေးဝန်ကြီးဌာနက ပြီးခဲ့သည့် နိုဝင်ဘာ ၁ ရက်မှစတင်ပြီး ပြန်လည် ဖွင့်လှစ်စေခဲ့သည်။
Leave a Comments