သျှမ်းပြည်တောင်ပိုင်း မိုင်းကိုင်မြို့ နယ် ပန်ကေတု ကျေးရွာအုပ်စုထဲတွင် လာရောက်ခိုးလှုံနေသည့် စစ်ဘေးရှောင် ၃၀၀ ကျော်က နေရပ်ကို မပြန်ရဲသေးကြောင်း စုံစမ်းသိရှိရသည်။
ယမန်နေ့ (နိုဝင်ဘာ ၁၀)တွင် တိုက်ပွဲအသံငြိမ်နေသည့် ကျေးရွာမှ စစ်ဘေးရှောင် (၁၀၅) ဦး နေရပ် ပြန်သွားခဲ့ကြသော်လည်း ကုန်လျန်းကျေးရွာ ဒေသခံ ၃၂၇ ဦးက နယ်မြေ ငြိမ်းချမ်းမှု မရှိသေးသည့်အတွက် ကြောင့် မပြန်ရဲသေးကြောင်း စစ်ဘေးရှောင် ကူညီသူများက ပြောသည်။
“ တချို့ကတော့ ပြန်သွားပြီ။ အခုက ကုန်လျန်ကျေးရွာကလူတွေ ကျန်နေသေးတယ်။ မပြန်ရဲကြသေးဘူး။ အဲနားမှာ တိုက်ပွဲပြင်းထန်းနေသေးတယ်” ဟု စစ်ဘေးရှောင်များကို ကူညီပေးနေသည့် သူက ပြောသည်။
နေရပ်ပြန်သွားသည့် စစ်ရှောင်များသည်လည်း လက်ရှိမှာ စိုးရိမ်ထိတ်လန့်မှုဖြင့်သာ ပြန်သွားရသဖြင့် လုံခြုံစိတ်ချမှု မရှိသေးကြောင်း သိရသည်။
“ တိုက်ပွဲတော့ နေ့တိုင်းလိုလိုဖြစ်နေတယ်။ မနေ့ကတော့ တချက်ငြိမ်းသွားသေးတယ်။ တိုက်ပွဲက ဆက်ပြင်းထန်းနေသေးတယ်။ တချို့က ပြန်သွားလည်း နေထိုင်ရတာ စိတ်မလုံခြုံသေးဘူး။ တိုက်ပွဲကို ကြောက်နေရသေးတယ်” ဟု မိုင်းကိုင်မြို့ ဒေသခံတဦးက ပြောသည်။
လက်ရှိတွင်လည်း ဆောင်းရာသီဝင်ရောက်လာသည့် ဖြစ်သည့်အတွက်ကြောင့် စစ်ရှောင်များအတွက် အနွေးထည်၊ စောင်များ လိုအပ်နေလျက်ရှိကြောင်းသိရသည်။
သျှမ်းတောင် မိုင်းကိုင်မြို့နယ် တိုင်းရင်းသားလက်နက်ကိုင် အချင်းချင်းကြား ယနေ့ထိတိုင်း စစ်ရေး တင်းမာနေဆဲ ရှိနေသေးကြောင်းသိရသည်။
Leave a Comments