သျှမ်းပြည်မြောက်ပိုင်း သီပေါမြို့နယ်တွင် တိုင်းရင်းသားလက်နက်ကိုင်တိုက်ပွဲကြောင့် ဒေသခံ (၃၀၀)ကျော် ထွက်ပြေးတိမ်းရှောင်ခဲ့ရပြီး စားနပ်ရိက္ခာများ လိုအပ်နေကြောင်း စုံစမ်းသိရှိရသည်။
နိုဝင်ဘာ (၇)ရက်က မြောက်ပိုင်း တပ်ပေါင်းစုနှင့် ( RCSS/SSA) တို့သည် သီပေါမြို့နယ် ဟာလျံကျေးရွာ၊ ဆွန်လုံကျေးရွာ၊ ချောင်းဆုံကျေးရွာအနီး တိုက်ပွဲဖြစ်ပွားမှုကြောင့် ဒေသခံများ ထွက်ပြေးတိမ်းရှောင်ခဲ့ရကြောင်း သိရှိရသည်။
“ထွက်ပြေးလာတာ (၃၀၀)ကျော်ရှိနေပြီ။ တစ်ချက်တစ်ချက် တိုက်ပွဲဖြစ်ပွားသံ ကြားနေရသေးတယ်။ ခုလောလောဆယ်တော့ နေ့တိုင်းစားဖို့အတွက် ဟင်းရွက်တွေ လိုအပ်တယ်” ဟု စစ်ရှောင်များကို ကူညီပေးနေသူ တစ်ဦးက သျှမ်းသံတော်ဆင့်ကို ပြောသည်။
ထိုထွက်ပြေးလာသည့် ဒေသခံများသည် နမ့်မရေချောင်းဘေးတစ်လျှောက် နေထိုင်သည့် ကျေးရွာများဖြစ်ပြီး ပြီးခဲ့သည့် မတ်လ ကတည်းက တိုင်းရင်းသားလက်နက်ကိုင်အချင်းချင်းတိုက်ပွဲကြောင့် ထွက်ပြေးတိမ်းရှောင်ခဲ့ရသည့် ဒေသခံများ ဖြစ်ကြသည်။
“ပြည်သူတွေက အရမ်းဒုက္ခရောက်နေပြီ။ တပေါင်းလ ကတည်းက ဒီအဖွဲ့တွေပဲ စစ်ဘေးတိမ်းရှောင်ခဲ့ရတယ်။ အဲ့ချိန်ကတည်းက ထွက်ပြေးရတော့ ဝင်ငွေမရှိဘူး။ လှေတွေနဲ့ သွားလာရတော့ သူတို့အတွက် အခက်ခဲတွေဖြစ်တယ်။ ပြန်သွားတော့လဲ စားနပ်ရိက္ခာတွေအတွက် အခက်ခဲဖြစ်လို့ လိုက်လံ ထောက်ပံ့ပေးရတာတွေရှိတယ်။ အခုလည်း ထွက်ပြေးရပြန်ပြီ။ နှစ်ပူဆင့် ဖြစ်နေတယ်” ဟု စစ်ရှောင်များကို ကူညီပေးနေသူ တစ်ဦးက ပြောသည်။
လက်ရှိ ထွက်ပြေးလာသည့် စစ်ရှောင် (၃၀၀)ကျော်သည် သီပေါမြို့ပေါ်ရှိ အောင်မင်္ဂလာဘိုးတော်ကျောင်းတွင် ရှိနေကြောင်း သိရှိရသည်။
“သူတို့ ထွက်ပြေးလာချိန်တုန်းက အခက်ခဲတွေဖြစ်တယ်။ သူတို့က လှေတွေနဲ့ ထွက်ပြေးလာရတော့ တစ်ခါ တင်လာရင် လူက နည်းနည်းပဲရလာတယ်။ ရောက်လာတဲ့သူရှိသလို မရောက်လာတဲ့သူတွေလည်း ရှိတယ်။ ရောက်လာသူ တစ်ချို့လည်း ဘာမှ မရလာတာလဲရှိတယ်” ဟု အမည်မဖော်လိုသူ တစ်ဦးက ပြောသည်။
ကိုဗစ်-၁၉ ကူးစက်ရောဂါ မြင့်မားနေသည့်အတွက် စစ်ရှောင်များကို ကိုဗစ်-၁၉ စစ်ဆေးရန်အတွက် သီပေါမြို့နယ် အုပ်ချုပ်ရေးမှူးမှ အကြောင်းကြားလာခြင်းများလည်း ရှိနေကြောင်း သိရှိရသည်။
မြောက်ပိုင်း တပ်ပေါင်းစုနှင့် RCSS တို့ တိုက်ပွဲကြောင့် သျှမ်းပြည်မြောက်ပိုင်း ကျောက်မဲမြို့နယ်တွင်လည်း စစ်ရှောင်(၁၀၀၀)ကျော် ထွက်ပြေးတိမ်းရှောင်ခဲ့ရပြီး လက်ရှိချိန်ထိ နေရပ်သို့ မပြန်နိုင်သေးပေ။
Leave a Comments