သျှမ်းပြည်တောင်ပိုင်း ဖယ်ခုံမြို့ တိုးချဲ့ရပ်ကွက်တွင် နေထိုင်သည့် အရပ်သား (၆)ဦးကို စစ်ကောင်စီတပ်ဖွဲ့က PDF နှင့် ပတ်သက်သူဟု စွတ်စွဲပြီး ဖမ်းဆီးသွားကြောင်း စုံစမ်းသိရှိရသည်။
ယမန်နေ့ နိုဝင်ဘာ (၈)ရက် နေ့လည် ၁၂ နာရီဝန်းကျင်က ဆိုင်ကယ်သွားပြင်သည့် လူငယ် (၂)ဦးကို စစ်ကောင်စီက စစ်ဆေးပြီးနောက် နေအိမ်တွင် လိုက်သွားပြီး အိမ်တွင် ရှိနေသည့် လူငယ်တစ်ဦးကိုပါ ဖမ်းဆီးသွားကြောင်း သိရသည်။
“ကလေးတွေက ဆိုင်ကယ်ပျက်လို့သွားပြင်တာ။ စစ်တပ်နဲ့တွေ့ပြီးစစ်ဆေးခံရတာ။ လူငယ်တစ်ယောက်ရဲ့ ဖုန်းထဲမှာ PDF နဲ့ ပုံရိုက်ထားတယ်ဆိုပြီး ခေါ်သွားတာ။ အိမ်ကိုလည်း လိုက်လာသေးတယ်။ အိမ်မှာ ကျန်နေတဲ့ လူငယ်တစ်ယောက်ကိုလည်း ခေါ်သွားတာ။ သူတို့ (စစ်ကောင်စီ)က ပါလာတဲ့ PDF ဝတ်စုံကို လူငယ်တွေကို ဝတ်ခိုင်းပြီး ဖမ်းသွားတယ်။” ဟု ဖယ်ခုံမြို့ ဒေသခံတစ်ဦးက ပြောသည်။
စစ်ကောင်စီ တပ်ဖွဲ့များသည် နေအိမ်သို့ လာရောက်စစ်ဆေးဖမ်းဆီးချိန်တွင် လူငယ်များ၏ ဖခင်ဖြစ်သူ အသက်အန္တရာယ်ကိုပါ ခြိမ်းခြောက်သွားသေးကြောင်း သိရသည်။
“သူတို့အဖေက ကလေးတွေ စစ်နဲ့ ဘာမှမပတ်သက်ဘူး။ တောင်ယာတွေပဲ လုပ်ကြတယ်။ သူတို့က စစ်နဲ့ ဘာမှ မပတ်သက်ကြဘူး။ အဲလိုပြောတော့ စစ်သားတွေက သူ့အဖေကို “မင်းသေချင်နေလား၊ မသေချင်ရင် ပါးစပ်ပိတ်ထား” ဆိုပြီး အဲလို ခြိမ်းခြောက်သွားသေးတယ်” ဟု အမည်မဖော်လိုသည့် ဒေသခံတစ်ဦးက ပြောသည်။
လူငယ် (၃)ဦးကို စစ်ကောင်စီက အကြမ်းဖက် ဖမ်းဆီးသွားပြီးနောက် ည သန်းခေါင်ယံ ၁၂ နာရီဝန်းကျင်တွင် ထိုလူငယ်၏ ဖခင်ကို ထပ်မံလာရောက်ဖမ်းဆီးသွားကြောင်း သိရသည်။
ထို့အပြင် ဘေးအိမ်တွင် ရှိနေသည့် အသက် (၁၈)နှစ် မပြည့်သေးသည့် လူငယ် (၂)ဦးကိုပါ ဖမ်းဆီးသွားကြောင်း သိရသည်။
“ဟုတ်တယ်။ ညအချိန်မှာ သူ့အဖေကို ထပ်လာဖမ်းတာ။ သူ့အဖေကို သေနတ်ရှိတယ် စွတ်စွဲပြီးတော့ ဖမ်းတာ။ ပြီးတော့ဘေးအိမ်က လူငယ် (၂)ယောက်ကိုလည်း ဖမ်းသွားတယ်။ အဲ့လူငယ်တွေက ဘာမှမသိဘူး။ အသက် ၁၆ ၊ ၁၇ ဘဲ ရှိသေးတယ်။ အဲ့ကလေးတွေက အိမ်မှာ မိဘမရှိဘူး။ အိမ်မှာ သူတို့ ၂ ယောက်ဘဲရှိနေတာ။” ဟု ဒေသခံတစ်ဦးက ပြောသည်။
အဆိုပါ ဖမ်းဆီးခံရသူများကို အမြန်ဆုံး ပြန်လွှတ်ပေးရန်နှင့် နေအိမ်တွင် ကျန်ရှိနေသည့် မိဘများက စိုးရိမ်နေကြရကြောင်း သိရသည်။
“ခုချိန်ထိ ဘယ်နားရှိလဲ မသိရသေးဘူး။ သူတို့တစ်ခြားအဖွဲ့စည်းတွေကိုလည်း အကူညီလိုက်တောင်းတယ်။ ဒါပေမဲ့ ဘယ်သူမှ မကူညီပေးနိုင်ဘူးတဲ့။ သူ့မိဘတွေက တော်တော်လေးစိုးရိမ်နေကြတယ်။ ကလေးတွေကို ယုတ်မာမှာကို စိတ်ပူနေရတယ်” ဟု နီးစပ်သူက ပြောသည်။
ထိုဖမ်းဆီးခံရသည့် လူ(၆)ဦးသည် သာမန် တောင်ယာလုပ်ငန်းသာ လုပ်ကိုင်နေကြသူများဖြစ်ကြောင်း သိရသည်။
Leave a Comments