သျှမ်းပြည်တောင်ပိုင်း လားရှိုးမြို့နယ်တွင် စစ်ကောင်စီမှ လိုင်စင်မဲ့ ယာဉ်(ဆိုင်ကယ်၊ ကား)များကို စစ်ဆေးပြီး သိမ်းယူနေကြောင်း စုံစမ်းသိရှိရသည်။

စစ်ကောင်စီလက်အောက်ခံ ယာဉ်ထိန်းရဲနှင့် စစ်ကောင်စီ တပ်သားတို့က နိုဝင်ဘာ ၃ ရက်မှစပြီး လိုင်စင်မဲ့ ယာဉ်များကို စစ်ဆေးပြီး ဆိုင်ကယ်သိမ်းယူမှုနှင့် ငွေကြေးတောင်းယူမှုများ ပြုလုပ်ခဲ့ကြောင်း သိရသည်။

“လိုင်စင်တွေ၊ ဆိုင်ကယ်ဦးထုပ်တွေစစ်တယ်။ ယာဉ်လိုင်စင်တွေလည်း စစ်တယ်။ မပါဘူးဆိုရင် တစ်ချို့က ငွေတောင်းတယ်။ ငွေတောင်းလို့ မပေးနိုင်ရင် သူတို့က ဆိုင်ကယ်ကိုယူသိမ်းလိုက်တာ” ဟု လားရှိုးမြို့ဒေသခံ အမျိုးသမီးတစ်ဦးက ပြောသည်။

ထို့အပြင် စစ်ကောင်စီတပ်သားများက ယာဉ်မောင်းလိုင်စင်များကို စစ်ဆေးသည့်အပြင် ကိုဗစ်- ၁၉ ကာကွယ်ဆေးထိုးပြီးကြောင်းနှင့် အပြင်ထွက် သွားလာခွင့် ထောက်ခံစာ ရှိ၊ မရှိကိုပါ စစ်ဆေးပြီး မပါရှိပါက ဆိုင်ကယ်၊ ကားများကို လားရှိုးမြို့တော်ခန်းမတွင် (၁၇)ရက် သိမ်းယူထားကြောင်း သိရသည်။

“အကုန်စစ်တာပဲ။ တစ်ခုပြီးတစ်ခု ထုတ်ထုတ်စစ်တယ်။ ယာဉ်မောင်းလိုင်စင် စစ်တယ်။ အဲဒါတွေရှိလည်း ကိုဗစ် ကာကွယ်ဆေးထိုးပြီးလား။ အပြင်ထွက်စာပါလား။ အဲဒါတွေ အကုန်စစ်တယ်။ တစ်ခုမှမပါဘူးဆိုရင် သူတို့က ကား၊ ဆိုင်ကယ်တွေကို မြို့တော်ခန်းမမှာ ၁၇ ရက်သိမ်းထားမယ်လို့တော့ပြောတာပဲ” ဟု အသက် ၃၀ ဝန်းကျင်ရှိ အမျိုးသားတစ်ဦးက ပြောသည်။

စစ်ကောင်စီ၏ စစ်ဆေးမှု တင်းကြပ်လာသောကြောင့် ဒေသခံပြည်သူများက နေအိမ်မှ အပြင်ထွက် သွားလာရန်အတွက် ခက်ခဲမှုနှင့် စိုးရိမ်မှုများရှိနေကြောင်း သိရသည်။

“သူတို့ ဒီလိုစစ်တော့ အပြင်သွားလာရတာ ခက်တာပေါ့။ သူတို့နဲ့ သွားတွေ့မိမလား၊ တွေ့ရင် ကိုယ်တွေ ဆိုင်ကယ်သိမ်းသွားမလား စိုးရိမ်တာပေါ့။ တစ်ခါတစ်လေ အပြင်သွားဝယ်စရာရှိရင်လည်း ဆိုင်ကယ်နဲ့သွားဖို့က ခက်လာပြီးလေ” ဟု အထက်ပါ အမျိုးသမီးတစ်ဦးက ထပ်လောင်းပြောသည်။

စစ်ကောင်စီ တပ်သားများသည် လားရှိုးမြို့ တွင် နေ့စဉ် စောင့်ပြီး စစ်ဆေးလျက်ရှိကြောင်း သိရသည်။