သျှမ်းမြောက် ကျောက်မဲမြို့နယ်တွင် တိုင်းရင်းသားလက်နက်ကိုင်တပ်အကြား တိုက်ပွဲ ဆက်လက်ပြင်းထန်နေမှုကြောင့် စစ်ရှောင်များ မြို့ပေါ်သို့ ထပ်မံပြောင်းရွေ့လာရကြောင်း စုံစမ်းသိရသည်။
ယနေ့ (နိုဝင်ဘာ ၄ ရက်) နေ့လည်ပိုင်းတွင် ဟူးဆွန်ကျေးရွာအုပ်စုအတွင်း စစ်ရှောင်နေကြသည့် ဒေသခံများသည် မြို့ပေါ်ရှိ မန်ခါစစ်ရှောင်စခန်းနှင့် သျှမ်းစာ/ယဥ်ခန်းမသို့ ပြောင်းရွှေ့လာခဲ့ကြောင်း စစ်ရှောင်ကူညီသူများထံမှ သိရသည်။
“ခုက (၂၀၀)ကျော် ရောက်လာတယ်၊ ပထမ အသုတ်ပါ၊ ဟူးဆွန်၊ ဗြိန်းဆိုင်း ဒေသခံတွေလို့ ပြောတယ်၊ နောက်ထပ် သွားကြိုနေတုန်းပဲ၊ ပရဟိတအဖွဲ့တွေ စုပြီး သွားကြိုတာ၊ မိုးကလည်း ရွာနေတော့ အရမ်းကို ဒုက္ခရောက်ကြတယ်” ဟု စစ်ရှောင်ကူညီသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့နယ် ဟူးဆွန်ကျေးရွာအုပ်စုတွင် စစ်ဘေးရှောင် (၁၅၀၀)ကျော် ရှိနေပြီး စစ်ရှောင်နေရသည်မှာ (၂)လကျော် ကြာမြင့်နေပြီဖြစ်ကြောင်း သိရသည်။
ထိုဒေသအနီးတွင် တိုင်းရင်းသားလက်နက်ကိုင်များဖြစ်သည့် RCSS/SSA နှင့် တပ်ပေါင်းစု အကြား တိုက်ပွဲဖြစ်ပွားမှု ဆက်လက်ပြင်းထန်နေသည့်အတွက် စစ်ရှောင်ခိုလုံနေသည့် အဆိုပါဒေသခံများ မြို့ပေါ်သို့ ထံမံ ပြောင်းရွှေ့လာခဲ့ရခြင်းဖြစ်ကြောင်း ဒေသခံများထံမှ သိရသည်။
“တိုက်ပွဲက ပြင်းထန်နေတုန်းပဲ၊ လက်နက်ကြီးသံတွေလည်း ကြားနေရတယ်၊ ဒီ တစ်ရက် နှစ်ရက်အတွင်း ပိုကြားရတယ်၊ အရမ်းနီးလာသလိုပဲ၊ မနေရဲလို့ ပြောင်းလာတာ” ဟု စစ်ရှောင် အမျိုးသမီးတစ်ဦးက ပြောသည်။
လက်ရှိ မန်ခါစစ်ရှောင်စခန်းတွင်လည်း စစ်ရှောင် (၁၀၀)ကျော် ရှိနေသည့်အတွက် နောက်ထက် (၁၀၀)ဝန်းကျင်ခန့်သာ ဆံ့တော့မှာ ဖြစ်ကြောင်း၊ ထပ်မံရောက်ရှိလာမည့် စစ်ရှောင်များအား သျှမ်းစာပေနှင့် ယဥ်ကျေးမှု ခန်းမသို့ ပို့ဆောင်သွားမှာဖြစ်ကြောင်း သိရသည်။
ထို့အပြင် လက်ရှိတွင် အလှူရှင်များ အလွန်နည်းပါးသွားသည့်အတွက် စစ်ရှောင် စားနပ်ရိက္ခာများ အလွန်ခက်ခဲနေပြီဖြစ်ကြောင်း စစ်ရှောင်ကူညီသူများထံမှ သိရသည်။
“အဓိက ခက်ခဲတာတော့ စားနပ်ရိက္ခာပေါ့၊ ခု စစ်ရှောင်ပိုများလာတော့ ပိုပြီးခက်ခဲနေပါပြီ၊ အလှူရှင်က အရမ်းကို နည်းသွားပြီလေ၊ ကိုဗစ်ကာလလည်းဖြစ်တော့ အလုပ်အကိုင်ကလည်း အဆင်မပြေကြဘူး” ဟု ကျောက်မဲ သျှမ်းစာပေနှင့် ယဥ်ကျေးမှုအသင်း ဥက္ကဌ လုင်းလျန်းဟန်က ပြောသည်။
ကျောက်မဲမြို့နယ်အတွင်း မန်ခါ၊ မိုင်းတင်း၊ နမ့်ဆော့၊ ဗြိန်းခါး၊ နားမွန်း၊ ကြူရှောနှင့် မိုင်းငေါ့စစ်ရှောင်စခန်းအပါအဝင် လက်ရှိအချိန်ထိ တိုင်းရင်းသားလက်နက်ကိုင်တိုက်ပွဲကြောင့် စစ်ဘေးရှောင်နေရသူ (၂၅၀၀)ဝန်းကျင်ထိ ရှိနေကြောင်း သိရသည်။
Leave a Comments