သျှမ်းပြည် အရှေ့ပိုင်း တာချီလိတ်မြို့နယ် တာလေမြို့တွင် ကိုဗစ် – ၁၉ ကူးစက်မှု ဆက်လက်မြင့်တက်နေသည့်ကြား စစ်ကောင်စီမှ စာသင်ကျောင်းများကို အတင်းဖွင့်လှစ်ကြောင်း ဒေသခံများက ပြောသည်။
တာချီလိတ်မြို့နယ် တာလေမြို့တွင် အောက်တိုဘာလ (၃၁)ရက်နေ့ တစ်ရက်တည်းတွင် ကိုဗစ် – ၁၉ ကူးစက်ခံရသူ (၁၁၈) ဦးအထိ စံချိန်တင် စစ်ဆေးတွေ့ရှိခဲ့သော်လည်း နိုဝင်ဘာလ (၁)ရက်နေ့မှာ စာသင်ကျောင်းကို အတင်းဖွင့်လှစ်ခဲ့ကြောင်း ဒေသခံများက ပြောသည်။
“မနေ့တစ်နေ့ကမှ ကိုဗစ် ၁၀၀ ကျော်တွေ့တာ နောက်တစ်နေ့ရောက်တော့ ကျောင်းတွေကို အတင်းဖွင့်ခိုင်းပြီး ကျောင်းအပ်ခိုင်းတယ်၊ အာဏာကို ကြောက်တဲ့မိသားစုနဲ့ ထောက်ခံတဲ့သူတွေက ကျောင်းအပ်ကြတာတွေ့တယ်” ဟု တာလေမြို့နေ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် အောက်တိုဘာလ ၃၁ ရက်နေ့တွင် တာလေမြို့ရှိ ဝမ်ဆာကျေးရွာတွင် ကိုဗစ်ပိုးတွေ့လူနာ (၁၁၈)ဦး စစ်ဆေး တွေ့ရှိရပြီးနောက် နိုဝင်ဘာလ ၁ ရက်နေ့မှာတော့ စစ်ကောင်စီညွှန်ကြားချက်အတိုင်း ကျောင်းများ တက်နေကြရကြောင်း သိရသည်။
လက်ရှိတွင် ဝမ်ဆာကျေးရွာအတွင်း အရေးပေါ် ကိစ္စမှလွှဲ၍ ကျေးရွာပြင်ပသို့ ဝင်ထွက်သွားလာခြင်း မပြုလုပ်ရန်နှင့် အခြားကျးရွာမှ ရွာသူ ရွာသားများလည်း ဝမ်ဆာကျေးရွာသို သွားလာခြင်းမပြုကြရန် ကျေးရွာတာဝန်ရှိသူများက အသိပေးထားသော်လည်း အာဏာပိုင်တို့၏ ကျောင်းတက်ခိုင်းသည့် အမိန့်လည်းရှိနေသည့်အတွက် အခက်အခဲ ကြုံနေရကြောင်း ဝမ်ဆာရွာဒေသခံ တစ်ဦးက ပြောသည်၊၊
“ကျနော်တို့ရွာကတော့ ကျောင်းအပ်တဲ့ မိဘ မများပါဘူး၊ တစ်ရွာလုံး ၁၀ ယောက်တောင် မရှိဘူး၊ မြို့ပေါ်ကလည်း ကျောင်းတက်တဲ့သူမရှိဘူး ကြားတယ်၊ ကြောက်တယ်လေ၊ တစ်ဖက်က အာဏာ တစ်ဖက်က ရောဂါဆိုတော့ ကျောင်းတက်တဲ့လူက နည်းနည်းပဲ ရှိတယ်” ဟု ၎င်းက ပြောသည်၊၊
လက်ရှိဖြစ်ပေါ်နေသည့် အာဏာသိမ်းအဖွဲ့တို့ကြား ပဋိပက္ခများနှင့် ကိုဗစ် – ၁၉ ကာကွယ်ထိန်းချုပ်ရေး မလုပ်နိုင်သည့် အခြေအနေများကြောင့် ကျောင်းသားမိဘများအနေဖြင့် အာဏာသိမ်း စစ်ကောင်စီ လက်အောက်တွင် ကျောင်းမအပ်လိုသူ၊ ကျောင်းမတက်လိုသူများလည်း ရှိနေကြောင်း သိရသည်။
