သျှမ်းပြည်တောင်ပိုင်း တောင်ကြီးမြို့ ကျောင်းကြီးစုရပ်ကွက် သပြေလမ်း၊ နယ်မြေ(၂)ရှိ စစ်ကောင်စီလက်အောက်ခံ သျှမ်းပြည် စည်ပင်သာယာရေးဌာန၏ ညွှန်ကြားရေးမှူး ဦးစိုင်းထွန်းထွန်း၏ နေအိမ် ဗုံးပေါက်ကွဲမှုဖြစ်ပွားကြောင်း သိရသည်။
ယနေ့ အောက်တိုဘာလ (၂၈)ရက် နေ့လယ် (၁၂)နာရီကျော်အချိန်က ပေါက်ကွဲမှု ဖြစ်ပွားခဲ့ပြီး ထိခိုက်ဒဏ်ရာရရှိမှု ရှိ မရှိကိုတော့ မသိရသေးကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“ပေါက်ကွဲသံကတော့ အကျယ်ကြီးပဲ ကြားလိုက်ရတယ်၊ ဆင်ထားတဲ့ဗုံးလား ဘာလားတော့ မသိရသေးဘူး၊ ထိခိုက်ပျက်စီးမှု ရှိ မရှိလည်း မသိရသေးဘူး၊ အခုလည်း ရဲနဲ့ စစ်သားတွေရောက်လာပြီး စစ်နေကြတယ်” ဟု အနီးပတ်ဝန်းကျင်တွင် နေထိုင်သည့် ပြည်သူတစ်ဦးက ပြောသည်။
ပေါက်ကွဲမှု ဖြစ်ပွားပြီးနောက် မကြာခင်တွင် စစ်သားနှင့် ရဲများ ရောက်ရှိလာပြီး ဦးစိုင်းထွန်းထွန်း၏ နေအိမ်ဝန်းအပြင် အနီးပတ်ဝန်းကျင်ရှိ ပြည်သူများကိုလည်း စစ်ဆေးမှုများ ပြုလုပ်သည်ဟု သိရသည်။
သျှမ်းပြည် စည်ပင်သာယာရေးဌာနမှ ညွှန်ကြားရေးမှူး ဦးစိုင်းထွန်းထွန်းသည် စည်ပင်ဝန်ထမ်း အသိုင်းအဝန်းမှ လက်အောက်ဝန်ထမ်းများကို ဖိအားပေးသူတစ်ဦးဖြစ်သည့်အပြင် တခြားသော ဌာနများမှ CDM လုပ်သည့် ဝန်ထမ်းများကိုလည်း ခြိမ်းခြောက်မှုများ ပြုလုပ်နေသူ ဖြစ်ကြောင်းလည်း သတင်းများထွက်ပေါ် နေကြောင်း သိရသည်။
Leave a Comments