သျှမ်းမြောက် ကျောက်မဲမြို့နယ်တွင် တိုက်ပွဲ ဆက်ဖြစ်နေပြီး လက်နက်ကြီးကျမှာ စိုးရိမ်သည့်အတွက် နားမွန်းစစ်ရှောင်များ စခန်းပြောင်းရွှေ့နေထိုင်ရကြောင်း သတင်းရရှိသည်။
နားမွန်းစစ်ရှောင်စခန်းတွင် ကိုယ်ဝန်သည် တစ်ဦး အပါအဝင် စစ်ရှောင် (၃၀)ကျော် ရှိနေပြီး ယခုရက်ပိုင်း တိုက်ပွဲပြင်းထန်နေသည့်အတွက် ရွာဘုန်းကြီးကျောင်းသို့ ပြောင်းရွှေ့နေထိုင်ရတာဖြစ်ကြောင်း သိရသည်။
“အရင်က စာသင်ကျောင်းမှာနေတာ၊ ချိုင့်ဝှမ်းနေရာဖြစ်တော့ ကြောက်ရတယ်၊ ပြီးခဲ့တဲ့ ၂ ရက်က တိုက်ပွဲပြင်းထန်တယ်လေ၊ လက်နက်ကြီးတွေ ကျမှာစိုးရိမ်လို့ နေရာပြောင်းလိုက်ရတယ်၊ ရွာဘုန်းကြီးကျောင်းက ဇရပ်ထဲ ပြောင်းနေကြတာ” ဟု စစ်ရှောင်များကို ကူညီနေသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့နယ် မိုင်းတင်းကျေးရွာအုပ်စုထဲတွင် နားမွန်း၊ ဗြိန်းခါး၊ မိုင်းတင်းနှင့် နမ့်စော့စစ်ရှောင်စခန်းတို့ ရှိပြီး စစ်ရှောင် (၃၀၀)ကျော် ခိုလှုံနေတာဖြစ်သည်။
ထိုဒေသတွင် ပြီးခဲ့သည့် အောက်တိုဘာလ (၂၂)ရက်နေ့မှ စပြီး တိုင်းရင်းသားလက်နက်ကိုင်တပ်များ အကြား တိုက်ပွဲ ဆက်လက်ပြင်းထန်လာခဲ့တာဖြစ်ကြောင်း သိရသည်။
“မနေ့ကတော့ အသံမကြားရဘူး၊ ဒီနေ့ ပန်စလော့ အပေါ်ပိုင်းမှာ ပစ်ကြတယ်လို့ ကြားတယ်၊ မနက် ၇ နာရီ လောက်မှာ ပစ်တဲ့အသံ ကြားရတာ” ဟု မိုင်းတင်း ဒေသခံတစ်ဦးက ပြောသည်။
ယနေ့ အောက်တိုဘာ (၂၇)ရက် မနက်အစောပိုင်းက နောင်ပစ်ကျေးရွာအုပ်စုအနီးတဝိုက်တွင် တိုင်းရင်းသားလက်နက်ကိုင်တပ်ဖြစ်သည့် RCSS နှင့် တပ်ပေါင်းစုတို့ တိုက်ပွဲဖြစ်ပွားခဲ့တာဖြစ်ကြောင်း ဒေသခံများထံမှ သိရသည်။
ပြီးခဲ့သည့် (၂)လဝန်းကျင်ကတည်းက နောင်စိန်၊ ပန်လင်၊ လွယ်ကုန်၊ မောက်ငါးစန့်၊ ပန်စလော့၊ ဟူးကွက်၊ ကြိမ်းလောနှင့်အခြားကျေးရွာ အနီးတဝိုက်တို့တွင် တိုက်ပွဲပြင်းထန်ခဲ့မှုကြောင့် ဒေသခံ ထောင်ချီ ထွက်ပြေးတိမ်းရှောင်ခဲ့ရပြီး ယနေ့အချိန်ထိ နေရပ် မပြန်နိုင်သေးပေ။
“သူတို့က အိမ်အရမ်းပြန်ချင်နေပြီ၊ စစ်ရှောင်လာတာ (၂)လကျော်ရှိပြီလေ၊ ပြန်ချင်တယ် ဆိုပြီး ပြောတယ်၊ တစ်ချို့ဆို မျက်ရည်တောင်ကျတယ်” ဟု စစ်ရှောင်ကူညီသည့် ကျောက်မဲ ဒေသခံ တစ်ဦးက ပြောသည်။
ယနေ့ တိုက်ပွဲဖြစ်ပွားသည့်နေရာနှင့် နီးသည့် ကြူရှောနှင့် ဟူးဆွန်ကျေးရွာအုပ်စုတွင် စစ်ရှောင် (၁၆၀၀)ကျော် ရှိနေကြောင်း သိရသည်။
Leave a Comments