သျှမ်းပြည်အရှေ့ပိုင်း မိုင်းဆတ်ခရိုင်၊ မိုင်းတုံမြို့ တပ်မတော်ထောက်ခံပွဲအတွက် စစ်ကောင်စီမှ အတင်းအဓမ္မ ခေါ်ပြီး ပါဝင်သည့် ပြည်သူများ တစ်ဦးလျှင် (၅၀၀၀)ကျပ်ပေးသည်ဟု စုံစမ်းသိရှိရသည်။
မိုင်းတုံမြို့တွင် ယနေ့ (အောက်တိုဘာ ၂၆) မနက် ၉ နာရီဝန်းကျင်တွင် တပ်မတော်ထောက်ခံပွဲပြုလုပ်ကြပြီး ဒေသခံ ပြည်သူများက မဖြစ်မနေ လိုက်ပါ ဆန္ဒပြရကြောင်း သိရသည်။
“သူတို့ မဖြစ်မနေသွားခိုင်းတာ။ မသွားရင် မရဘူးတဲ့။ အပေါ်ကနေပြီးတာ့ အုပ်ချုပ်ရေးမှူးကို ပြောလာတာ။ သွားတဲ့သူက တစ်ရက် (၅၀၀၀)ရတယ်လို့ပြောတယ်။ ကျနော်တို့တော့ လိုက်မသွားတော့ မရဘူး” ဟု မိုင်းတုံဒေသခံ တဦးက ပြောသည်။
မိုင်းတုံမြို့တွင် တပ်မတော်ထောက်ခံပွဲကို တက်ရောက်ခဲ့သူ (၆၀၀)ကျော်ရှိပြီး အများစုသည် လားဟူတိုင်းရင်းသားများဖြစ်ကာ စစ်ကောင်စီမှ အတင်းအဓမ္မခေါ်ယူခြင်းကြောင့် လိုက်ပါရခြင်းဖြစ်သည်ဟု မိုင်းတုံ ဒေသခံတစ်ဦး က ပြောသည်။
“သူတို့မဖြစ်မနေသွားခိုင်းတာလေ။ အကုန်လုံးသွားရတယ်။ အင်အား (၆၄၀)လောက်ရှိတယ်။ အများစုကတော့ ဘာမှ သိပ်မသိတဲ့သူတွေပေါ့။ နိုင်ငံရေးပိုင်း နားမလည်တဲ့သူတွေ များတယ်။ လားဟူလူမျိုးတွေကို အများစုခေါ်သွားတယ်” ဟု မိုင်းတုံမြို့ ဒေသခံတဦးက ပြောသည်။
သျှမ်းပြည်တွင် တပ်ထောက်ခံပွဲကို လားရှိုးမြို့၊ တန့်ယန်းမြို့၊ လွိုင်လင်မြို့၊ မိုင်းတုံမြို့တို့တွင် ပြုလုပ်နေကြရကြောင်း သိရသည်။
ဖေဖော်ဝါရီ (၁)ရက် စစ်အာဏာသိမ်းယူပြီးနောက်ပိုင်း စစ်ကောင်စီက ပြည်သူ (၁၁၉၉)ဦးကို သတ်ဖြတ်ခဲ့ကြောင်း နိုင်ငံရေးအကျဉ်းသားများကူညီစောင့်ရှောက်ရေး (AAPP)က အောက်တိုဘာ (၂၅)ရက်နေ့တွင် ထုတ်ပြန်ထားသည်။
Leave a Comments