သျှမ်းပြည်တောင်ပိုင်း တောင်ကြီးမြို့ရှိ KTV ဆိုင် တစ်ဆိုင် စစ်အာဏာပိုင် ဝင်ရောက်ဖမ်းဆီးခဲ့ရာ လူ (၃၀)ဦး ဖမ်းဆီးခံရကြောင်း စုံစမ်းသိရှိရသည်။
အောက်တိုဘာ (၂၆)ရက် မနက် (၁)နာရီအချိန်က တောင်ကြီး အဝေရာမီးပုံးပျံကွင်းရှေ့ရှိ (100)% ဆိုင်ကို သက်ဆိုင်ရာ အုပ်ချုပ်ရေးမှူး၊ စစ်လက်အောက်ခံ ရဲများ၊ တပ်သားများ လူအင်အား (၅၀)ခန့် သွားရောက်ဖမ်းဆီးခဲ့ကြောင်း စုံစမ်းသိရှိရသည်။
“ကိုဗစ် စည်းကမ်းနဲ့ မညီလို့ ဝင်ဖမ်းတာ။ ဆိုင်မန်နေဂျာ အပါအဝင် ဆိုင်က လူ (၃၀)ကျော် လောက်ပါသွားတယ်” ဟု တောင်ကြီးဒေသခံ တစ်ဦးက သျှမ်းသံတော်ဆင့်ကို ပြောသည်။
ကိုဗစ် – ၁၉ ကာကွယ်တားဆီးသည့်အနေဖြင့် တောင်ကြီးမြို့မှာ နေ့လယ် (၁၂)နာရီနောက်ပိုင်း စစ်ကောင်စီမှ ဆိုင်များ ဖွင့်ခွင့်မပြုထားကြောင်း စုံစမ်းသိရှိရသည်။
“ဘာအမှုဖွင့်ထားလဲတော့ မသိရဘူး။ အမှတ် (၁) ရဲစခန်းမှာ ရှိထားတယ်လို့တော့ ကြားတယ်” ဟု နီးစပ်သူ တစ်ဦး က ပြောသည်။
တောင်ကြီးမြို့တွင် ကိုဗစ်ကူးစက်မှုနှုန်းမြင့်တက်လာပြီး သေဆုံးမှုလည်းရှိနေသောကြောင့် လူစုလူဝေး မဖြစ်စေရန်အတွက် ဈေးဝယ်ခွင့်လက်မှတ်များ ကိုင်ဆောင်မှသာ အပြင်သို့ ထွက်ခွင့်ပြုထားကြောင်း သိရှိရသည်။
တောင်ကြီးမြို့တွင်းသာမက တောင်ကြီးခရိုင်အတွင်းရှိ မြို့နယ်များလည်း ကိုဗစ်-၁၉ ဆိုင်ရာ စည်းမျဉ်းစည်းကမ်းများ၊ Stay at Home စည်းမျဉ်းစည်းကမ်းများ မလိုက်နာသူများကို သဘာဝ ဘေးအန္တရာယ် စီမံခန့်ခွဲမှု ဥပဒေအရ အရေးယူ ဆောင်ရွက်မည်ဖြစ်ကြောင်း သိရှိရသည်။
