သျှမ်းပြည်တောင်ပိုင်း ဖယ်ခုံမြို့နယ် ညောင်ပင်သာရပ်ကွက်တွင် စစ်ကောင်စီတပ်ဖွဲ့များ ရမ်းသမ်း ပစ်ခတ်နေပြီး ဒေသခံပြည်သူ (၂)ဦး ယမ်းစထိမှန်ပြီး ဒဏ်ရာရရှိခဲ့ကြောင်း စုံစမ်းသိရသည်။
ညောင်ပင်သာရပ်ကွက်တွင် ယနေ့ အောက်တိုဘာ (၂၆)ရက် မနက် ၁၀ နာရီဝန်းကျင်အချိန်တွင် စစ်ကောင်စီက တဖက်သတ် ရမ်းသမ်းပစ်ခတ်မှုကြောင့် ဒေသခံ (၂)ဦး ဒဏ်ရာရရှိခဲ့ကြောင်း သိရသည်။
“ဒီနေ့ မနက် စစ်ကောင်စီတွေက ညောင်ပင်သာ ရပ်ကွက်ထဲဝင်ပြီးတော့ လက်နက် လျှောက်ပစ်နေတာ။ (၂) ယောက် ထိခိုက်ဒဏ်ရာရတယ်။ အဲ့ဘက်က ရေကမ်းစပ်နဲ့နီးတယ်။ ရပ်ကွက်ထဲမှာ စစ်ကောင်စီ တပ်တွေ အပြည့်ပဲ” ဟု ဖယ်ခုံမြို့ ဒေသခံတဦးက သျှမ်းသံတော်ဆင့်ကို ပြောသည်။
ထိုပစ်ခတ်မှုကြောင့် ဒေသခံ (၂)ဦး ဒဏ်ရာရရှိခဲ့ပြီး ဒဏ်ရာပြင်းထန်သူကို တောင်ကြီးဆေးရုံသို့ ပို့ဆောင်လိုက်ပြီး ဖြစ်ကြောင်း သိရသည်။
“(၂) ယောက်ထိတယ်။ ယမ်းစမှန်သွားတာ။ တယောက်ကတော့ ဒဏ်ရာသိပ်မပြင်းထန်ဘူး။ ကျန်တစ်ယောက် ကိုတော့ တောင်ကြီးဆေးရုံကို ပို့လိုက်တယ်။ သူက ဒဏ်ရာနည်းနည်း ပြင်းထန်တယ်” ဟု ဒေသခံတဦးက ပြောသည်။
အောက်တိုဘာ (၂၄)ရက်နေ့တွင်လည်း ဖယ်ခုံမြို့တွင် စစ်ကောင်စီများ ရမ်းသမ်းပစ်ခတ်မှုကြောင့် ဒေသခံ ပြည်သူအိမ်များ ပျက်စီးသွားရကြောင်း သိရသည်။
Leave a Comments