ကရင်နီပြည် (ကယားပြည်) ဒီးမော့ဆို ၆ မိုင် စံပြကျေးရွာရှိ ဖွင့်ပွဲမလုပ်ရသေးသည့် ကက်သလစ် ဘုရားကျောင်း အသစ်ကို စစ်ကောင်စီတပ်ဖွဲ့မှ ပစ်ခတ်ဖျက်ဆီးခဲ့ကြောင်း သတင်းသိရသည်။
ယမန်နေ့ အောက်တိုဘာလ ၂၅ ရက်နေ့ ည ၉ နာရီဝန်းကျင် အချိန်တွင် ဒီးမော့ဆိုမြို့ ၆ မိုင် စံပြကျေးရွာအတွင်းသို့ စစ်ကောင်စီတို့မှ သေနတ်ဖြင့် ဝင်ရောက်ပစ်ခတ်ခြင်းများပြုလုပ်ပြီး ကက်သလစ် ဘုရားကျောင်းအသစ်ကိုလည်း ပစ်ခတ်ဖျက်ဆီးသွားကြောင်း ဒေသခံများက ပြောသည်။
“ဘုရားကျောင်းက ဖွင့်ပွဲတောင်မလုပ်ရသေးဘူး၊ အသစ်စက်စက် ဆောက်ပြီးထားတာ၊ အစက အပြင်ကနေ သေနတ်နဲ့ လှမ်းပစ်တာ၊ နောက်တော့ လက်နက်ကြီးရဲ့ ယမ်းစတွေလည်း ထိမှန်တယ်၊ တော်တော်ကို ပျက်စီးသွားပြီ” ဟု ၆ မိုင် စံပြကျေးရွာမှ ဒေသခံ တစ်ဦးက သျှမ်းသံတော်ဆင့်ကို ပြောသည်။
ယမန်နေ့ ညအချိန် ဒီးမော့ဆိုမြို့ အားကစားကွင်းအနီးတွင် အာဏာသိမ်း စစ်ကောင်စီတပ်တို့နှင့် ဌာနေပြည်သူ့ ကာကွယ်ရေး ပူးပေါင်းတပ်ဖွဲ့တို့ ထိပ်တိုက်တွေ့ဆုံကာ တိုက်ပွဲဖြစ်ပွားပြီး စစ်ကောင်စီဖက်မှ လက်နက်ကြီး၊ လက်နက်ငယ်တို့ဖြင့် ပစ်ခတ်ခဲ့ကြောင်း သိရသည်။
“သေနတ်သံတွေက ၆ နာရီခွဲကတည်းက စကြားရတယ်၊ နောက်တော့ ပေါ်လိုက်ပျောက်လိုက်နဲ့ ၉ နာရီကျော် လောက်တော့ သေနတ်သံတွေရော လက်နက်ကြီးသံတွေရာ ကြားရတယ်၊ စစ်ကောင်စီတွေက PDF တွေကို ပစ်ရုံတင်မကဘူး၊ မြို့နဲ့ အနီးကရွာနားတွေထိပါ လက်နက်ကြီးတွေနဲ့ လှမ်းပစ်တာ၊ အပျက်အစီးလည်း များတယ်၊ ဒီရက်ပိုင်းအတွင်း နေအိမ်ပျက်စီးတာ တော်တော်များတယ်၊ မနေ့ညက ဘုရားကျောင်း အသစ်လည်း ပျက်တယ်” ဟု ဒေသခံ တစ်ဦးက ပြောသည်။
စစ်ကောင်စီတို့သည် နေ့ခင်းပိုင်းတွင် ဖယ်ခုံဘက်မှ တိုက်ပွဲဖြစ်ပွားခဲ့ပြီးနောက် ညနေပိုင်းအချိန်တွင် စစ်အင်အား အများအပြားဖြင့် ဖယ်ခုံမှ ကယားပြည် ဒီးမော့ဆိုဘက်သို့ ချီတက်လာပြီး ဒေသခံပြည်သူ့ကာကွယ်ရေးတပ်များနှင့် ထိပ်တိုက်တွေ့ကာ တိုက်ပွဲဖြစ်ပွားခဲ့ကြောင်း၊ အဆိုပါ ထိပ်တိုက် တိုက်ခိုက်မှုအတွင်း နှစ်ဖက် ထိခိုက်ဆုံးရှုံးမှုကိုတော့ မသိရသေးပါ။
Leave a Comments