ကယားပြည်(ကရင်နီပြည်)အတွင်းရှိ ဒီးမော့ဆို စစ်ဘေးရှောင်စခန်းတစ်ခုတွင် စစ်ဘေးရှောင်များနှင့် ကျန်းမာရေးစောင့်ရှောက်မှုပေးနေသည့် ဆေးအကူစေတနာ့ဝန်ထမ်း ၂ ဦး ကိုဗစ် – ၁၉ ကူးစက်ခံနေရကြောင်း သတင်းရရှိသည်။

ပြီးခဲ့သည့် အောက်တိုဘာလ ၁၀ ရက်နေ့မှ စတင်ပြီး စစ်ဘေးရှောင် (၁၀၀)ကျော်ရှိနေသည့် ဒီးမော့ဆိုမှ စစ်ဘေးရှောင် စခန်းတစ်ခုတွင် ကိုဗစ် – ၁၉ ကူးစက်ခံနေရသည့် စစ်ဘေးရှောင် ၂၀ ကျော်ရှိပြီး လက်ရှိတွင် ဖျားနာကာ အနံ့ ပျောက်နေသည့် လူများလည်း များပြားနေကြောင်း သတင်းသိရသည်။

“အရင်တုန်းကတော့ ဒီစခန်းမှာ စစ်ဘေးရှောင်နေတဲ့ သူတွေက ပိုများတယ်၊ တချို့က သူတို့ဘက် တိုက်ပွဲငြိမ်လို့ ပြန်သွားတာလည်းရှိနေတော့ အခုမှာ (၁၀၀)ကျော်ပဲ ရှိနေတယ်၊ အဲ့ (၁၀၀) ကျော်မှာ (၂၀)ကျော်က ကိုဗစ် – ၁၉ ဖြစ်နေတယ်၊ တချို့ကလည်း ဖျားနေတယ်၊ တချို့က အနံ့ပျောက်နေတယ်” ဟု အဆိုပါ စစ်ဘေးရှောင်စခန်းကို ကူညီချိတ်ဆက်ပေးနေသည့် လူငယ်တစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် အောက်တိုဘာလ မတိုင်ခင်တွင် အဆိုပါ စစ်ဘေးရှောင်စခန်းအတွင်း ကျန်းမာရေးစောင့် ရှောက်မှုများပေးနေသည့် ဆေးအကူဝန်ထမ်းများ ရှိနေသော်လည်း လက်ရှိတွင် အဆိုပါ ဆေးအကူဝန်ထမ်းများလည်း ကိုဗစ် – ၁၉ ကူးစက်ခံနေရသည့်အတွက် စစ်ဘေးရှောင်စခန်းအတွက် ကျန်းမာရေးလိုအပ်ချက်များ ရှိနေသည့်အပြင် စားရေးသောက်ရေးအတွက်လည်း ခက်ခဲနေကြောင်း သတင်းသိရသည်။

“စစ်ဘေးရှောင်စခန်းဆိုတော့ နေထိုင်စားသောက်ရေးတွေက အဓိက ခက်ခဲနေတယ်၊ ခုက ကိုဗစ် ဖြစ်နေတဲ့သူတွေလည်း ရှိလာတော့ ကျန်းမာရေးအတွက်ရော စားရေးသောက်ရေးရော ခက်ခဲလာတယ်၊ ထောက်ပံ့အလှူပစ္စည်းတွေ ပေးပို့ဖို့ဆိုတာလည်း မလွယ်ဘူး၊ လမ်းမှာ စစ်ကောင်စီက အစစ်ဆေးကြမ်းတယ်၊ ဖမ်းဆီးသတ်ဖြတ်နေတာတွေလည်း အားလုံးသိကြမှာပါ” ဟု တောင်ကြီးမြို့နေ ပရဟိတ လူငယ်တစ်ဦးက သျှမ်းသံတော်ဆင့်ကို ပြောသည်။

လက်ရှိတွင် အဆိုပါ စစ်ဘေးရှောင်စခန်းမှ နေရပ်မပြန်နိုင်သေးသည့် ပြည်သူများသည် တောထဲသို့ မြစ်သွားရှာပြီး စားသောက်ရေးကို ဖြေရှင်းနေရကြောင်း သိရသည်။