စစ်ဘေးရှောင်များနှင့် ပြည်သူ့ကာကွယ်ရေးတပ်ဖွဲ့ PDF များအတွက် KPay နှင့် အလှူကောက်ခံမှုများ ပြုလုပ်နေသည့် လူငယ်များတချို့ Kpay အကောင့်ပိတ်ခံရပြီး ဖမ်းဆီးခံနေရကြောင်း စုံစမ်းသိရှိရသည်။

ပြီးခဲ့သည့် အောက်တိုဘာလ ၉ ရက်နေ့ ည ၁၀ ခွဲဝန်းကျင်အချိန်ခန့်တွင် တောင်ကြီးမြို့ ၊ညောင်ဖြူစခန်း (မြေဖြူ) ရပ်ကွက်၊ Cherry Queen Hotel ရှေ့တွင် နေထိုင်သည့် မောင်မင်းခန့်အောင်၏ နေအိမ်ကို အိမ်စီးကား ၆ စီး နှင့် အရပ်ဝတ်ရဲ၊ စစ်ကောင်စီတပ်သားအင်အားအများအပြားတို့က ဝင်ရောက်ဖမ်းဆီးခဲ့ကြောင်း သတင်းရရှိသည်။

“ဒလန်က သတင်းပေးတာလား၊ ဒါမှမဟုတ် KBZ ကနေ ကိုယ်ရေးအချက်အလက်တွေကို နောက်ယောင်ခံ လိုက် တာလားတော့မပြောတတ်ဘူး၊ သူ့ကိုအိမ်မှာလာဖမ်းတဲ့ညက စစ်သားနဲ့ ရဲလည်းတော်တော်များတယ်၊ သူ့ကိုယ်ပိုင်ငွေကိုလည်း ယူသွားတယ်၊ အိမ်ပေါ်မှာတင် အရိုက်ခံထားရတယ်လို့လည်း ကျနော်ကြားရတယ်” ဟု မောင်မင်းခန့်အောင်နှင့်လနီးစပ်သူတစ်ဦးက သျှမ်းသံတော်ဆင့်ကို ပြောသည်။

ဖမ်းဆီးခံရသူ မောင်မင်းခန့်အောင်သည် ၎င်း၏ လူမှုကွန်ရက်စာမျက်နှာမှ တစ်ဆင့် စစ်ဘေးရှောင်များအတွက် အလှူငွေကောက်ခံခြင်းများ ပြုလုပ်နေပြီး အဖမ်းမခံရခင် ရက်ပိုင်းအလိုတွင် အလှူငွေ ကောက်ခံသည့် Kpay အကောင့်ပိတ်ခံရပြီး စစ်ကောင်စီတို့မှ ခြေရာခံလိုက်နိုင်ခဲ့ကြောင်းလည်း သတင်းသိရသည်။

“ပြောရရင် Kpay ကနေ အလှူငွေကောက်တာလောက်တော့ ပြသနာမရှိပါဘူး၊ အားလုံးက ယုံအောင် ပုံနဲ့ တင်ရတော့ စစ်ဘေးရှောင်ကိုလှူတယ်ဆိုရင်လည်း စစ်ဘေးရှောင်ပုံ၊ PDF ကိုလှူတယ်ဆိုလည်း PDF ပုံပါမှ သူများက စိတ်ဝင်စားတာကိုး၊ အဲ့ဒါတာတွေက ကျနော်တို့ အတွက်ကတော့ မကောင်းဘူး” ဟု မောင်မင်းခန့်အောင် နည်းတူ အလှူငွေကောက်ခံ ကူညီနေသည့် လူငယ်တစ်ဦးက သျှမ်းသံတောင်ဆင့်ကို ပြောသည်။

ထို့နည်းတူ ပြီးခဲ့သည့် အောက်တိုဘာလ ၃ ရက်နေ့တွင် လည်း ဌာနေပြည်သူ့ကာကွယ်ရေးတပ်ဖွဲ့နှင့် စစ်ဘေးရှောင်များအတွက် အလှူငွေကောက်ခံ ကူညီနေပေးနေသည်ဟု စွပ်စွဲချက်များဖြင့် တောင်ကြီး ဆေးတက္ကသိုလ်မှ ကျောင်းသူတစ်ဦးလည်း ၎င်း၏ နေအိမ်တွင် စစ်ကောင်စီတို့၏ အင်အားသုံး အကြမ်းဖက် ဖမ်းဆီးမှုကို ခံခဲ့ရသည်။

စစ်ကောင်စီမှ နိုင်ငံတော်အာဏာသိမ်းပြီးနောက်ပိုင်းတွင် လူငယ်တော်တော်များများကို စစ်အာဏာရှင် ဖြုတ်ချ ရေးတွင် ပါဝင်နေသူများဟု စွပ်စွဲပြီး ဖမ်းဆီးနေသည့် အပြင် တချို့သောလူငယ်များကိုလည်း နိုင်ငံတော်အစိုး ရက အကြမ်းဖက်အဖွဲ့ဟု သတ်မှတ်ထားသည့် အဖွဲ့ကို ငွေကြေး ထောက်ပံ့ခြင်း ဆိုင်ရာ လုပ်ငန်းများ လုပ်ပါက တရားစွဲဆိုခံရသည့် ပုဒ်မဖြစ်သည့် ပုဒ်မ ၅၀ (ည) ဖြင့် တရားစွဲဆိုပြီး ဖမ်းဆီးနေမှုများလည်း ရှိနေသည်။