သျှမ်းပြည်တောင်ပိုင်း ပင်လောင်းမြို့နယ်တွင် ကိုဗစ်- ၁၉ ကာကွယ်ဆေးထိုးပြီးနောက်ပိုင်း သေဆုံးသူ( ၃) ဦး ရှိနေကြောင်း စုံစမ်းသိရှိရသည်။
ပင်လောင်းမြို့ အရှေ့ဘက် ရပ်ကွက်တွင် စက်တင်ဘာ လလယ်က စတင်ပြီး ကိုဗစ် ၁၉ ကာကွယ်ဆေးထိုးပြီးသူများ (၂) ရက်ကြာတွင် သေဆုံးသွားကြောင်း၊ လက်ရှိတွင် သေဆုံးသူ (၃) ဦးလောက်ရှိနေပြီးဖြစ်ကြောင်း သိရသည်။
ထိုသေဆုံးသွားသူများသည် အသက်ကြီးသူများဖြစ်ပြီး ရောဂါအခံရှိသူများ ဖြစ်ကြောင်း သိရသည်။
“ သေသွားတာရှိတယ်။ သူတို့တွေက အသက်ကြီးတဲ့သူဖြစ်တယ်။ ၆၀ လောက်ရှိပြီ။ ရောဂါအခံလည်းရှိတဲ့ သူတွေ။ ဒါမဲ့ သူတို့က ကိုဗစ် ၁၉ ကာကွယ်ဆေးထိုးပြီး (၂) ရက်နေပြီးတော့ သေသွားတယ်။ ဘာကြောင့်သေလည်းတော့ သေချာပြောလို့မရသေးဘူး။ ဒါမဲ့ ကာကွယ်ဆေးထိုးပြီးနောက်ပိုင်း သေတာ။ ကျမသိရသလောက်တော့ (၃) ယောက်လောက်ရှိနေပြီး ” ဟု ပင်လောင်းမြို့ ဒေသခံ ကိုယ်တွေ့ကြုံရသူက ပြောသည်။
ပင်လောင်းမြို့နယ် ကျေးရွာဘက်တွင် ကိုဗစ် -၁၉ ပိုးကူးစက်သူမြင့်တက်လာကြောင်း၊ ထိုကိစ္စနှင့်ပတ်သတ်ပြီး တာဝန်ရှိသူများ သတင်းဖုံးကွယ်ရန် ကြိုးစားနေလျက်ရှိကြောင်းသိရသည်။
ပင်လောင်းမြို့နယ်တွင်း ကိုဗစ် -၁၉ မြင့်တက်လာရခြင်းသည် ပြီးခဲ့သည့် စက်တင်ဘာ (၂) ရက်နေ့က ဟိုပုံးကိုရင်းလေး ဈာပနပွဲကို သွားလာပြီးပြန်လာသူများမှ တဆင့် ပြန်ပွားလာကြောင်းသိရသည်။
“ ရွာကဖြစ်တယ်ဆိုတော့ သူတို့သတင်းဖုံးချင်နေတာ။ ဟိုပုံးကိုရင်းလေး ဈာပနာသွားလာပြီးနောက် သေတဲ့သူများ လာတယ်။ သေတဲ့သူကလည်း ရောဂါအခံရှိသူနဲ့ ကာကွယ်ဆေးထိုးပြီးတာသူတွေဖြစ်တယ်လို့ပြောတယ်။ အခုက ရွာတွေဘက်မှာ ပေးမဝင်တော့ဘူး” ဟု ပင်လောင်းမြို့ ပရဟိတ လုပ်ကူးပေးနေသည့် သူက ပြောသည်။
ပင်လောင်းမြို့ ကျေးရွာဘက်တွင် ကိုဗစ် -၁၉ မြင့်တက်လာသော်လည်း ရွာသူကြီးများက ရွာတွင်း ပေးမဝင်ဘဲ သာမာန်တုတ်ကွေးတာ ဖြစ်ကြောင်း ပရဟိတ အဖွဲ့များကို ပြန်ပြောဆိုခဲ့ကြောင်း သိရသည်။
“ ရွာသူကြီးတွေက ရွာထဲ ပေးမဝင်ကြဘူး။ သာမာန်တုတ်ကွေးဖြစ်တယ်ဆိုပြီး ကြိတ်ကုနေကြတာလား မသိဘူး။ ဆေးဖြန်းအဖွဲ့တွေ ရဲတွေလာလည်း ရွာထဲပေးမဝင်ဘူး။ ဟိုပုံးကိုရင်လေး ဈာပနာသွားလာပြီးတော့ ကိုဗစ် ရောဂါက အရမ်းထနေတယ်။ ရေဦးရွာနားကဆို အိမ်စေ့တိုင်းက ဖြစ်ချင်နေပြီး။” ဟု အမည်မဖော်လိုသည့် ပရဟိတ အဖွဲ့ဝင် တစ်ဦးက ပြောသည်။
ပင်လောင်းမြို့နယ်တွင် လက်ရှိကိုဗစ် -၁၉ မြင့်တက်နေသည့် ကျေးရွာသည် ရေဦးနှင့် ဆောင်းပြောင်း ကျေးရွာများ ဖြစ်ကြောင်း သိရသည်။
ပင်လောင်းမြို့တွင် ကိုဗစ်- ၁၉ ပိုးမြင့်တက်လာမှုကြောင့် လက်ရှိအချိန်တွင် ပိုးတွေ့လူနာ နှင့် သေဆုံးသူ မည်မျှရှိကြောင်းကို မသိရှိရတော့ ကြောင်း သိရသည်။
