မုံးကိုးမြို့နယ် တိုက်ပွဲများဆက်လက်ဖြစ် စစ်ကောင်စီဘက် စစ်ကူအင်အားချီတက်

0

သျှမ်းပြည်မြောက်ပိုင်း မူဆယ်ခရိုင် မုံးကိုးမြို့နယ် ဖောင်းဆိုင်ဘက်တွင် တိုက်ပွဲများ ဆက်လက်ပြင်းထန်နေပြီး စစ်ကောင်စီတို့မှ စစ်ကူအင်အား အများအပြား ဆက်လက်ချီတက်နေကြောင်း စုံစမ်းသိရသည်။

ယမန်နေ့( အောက်တိုဘာ ၇ )ရက် ညပိုင်းအချိန်မှ စတင်ကာ မုံးကိုးမြို့နယ် ဖောင်းဆိုင်ကျေးရွာတွင် ဖြစ်ပွားသည့် အာဏာသိမ်းစစ်ကောင်စီတပ်ဖွဲ့နှင့် ကိုးကန့်တပ်မတော် (MNDAA) တို့ တိုက်ပွဲသည် ယနေ့ အောက်တိုဘာလ ၈ ရက်နေ့ အာရုဏ်ဦးချိန်အထိ ပြင်းထန်နေကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။

“မနေ့က ကိုးကန့်တပ်က ဖောင်းဆိုင်ဖက် ရွာနီးကို နေရာယူပြီးတော့ စစ်ကောင်စီနဲ့တိုက်တယ်၊ ည ဦးပိုင်းအထိ ပစ်ခတ်သံတွေကြားရတုန်းပဲ၊ ဒီနေ့တော့ မိုးတောင်မလင်းသေးဘူး ပစ်ခတ်သံတွေ စကြားရတာ၊ စစ်ကောင်စီ တွေက မုံးကိုးဘက်မှာလည်းတိုက်တယ်၊ ဖောင်းဆိုင်ဘက်မှာလည်းသူတို့က နေရာယူပြီးတော့ ကိုးကန့်တွေကို ပစ်တာ၊ လက်နက်ကြီးရော လက်နက်ငယ်ရော သေနတ်သံတွေရော ကြားရတယ်” ဟု ဖောင်းဆိုင်ရွာဒေသခံ တစ်ဦးက သျှမ်းသံတော်ဆင့်ကို ပြောသည်။

ယမန်နေ့ (အောက်တိုဘာ ၇ )ရက်တွင် ပန်ဆိုင်းမြို့နယ်ဘက်၌ ညနေ ၅ နာရီဝန်းကျင်မှ ၈နာရီကျော် သည်အထိ စစ်ကောင်စီနဲ့ ကိုးကန့် တပ်မတော် (MNDAA) တို့သည် နမ့်တာဘတ်ကျေးရွာအနီးတွင်လည်း တိုက်ပွဲ ဖြစ်ပွားခဲ့ကြောင်း နမ့်တာဘတ် ဒေသခံတစ်ဦးက သျှမ်းသံတော်ဆင့်ကို ပြောသည်။

“ကျနော်တို့ရွာနားမှာပဲတိုက်ပွဲဖြစ်ပွားတာ၊ နှစ်ဖက်ကအချင်းချင်းပစ်တဲ့ ယမ်းငွေ့တွေရော မီးလျှံတွေရော လှမ်း မြင်ရတယ်။ မိုင်း ပေါက်သံတွေ လည်းကြားတယ်။ လက်နက်ငယ်ရောပဲ။ တစ်ခါတစ်ခါ သေနတ်ကျည်ဆန်တွေက ရွာနားဖက်တောင်လာကျသေးတယ်” ဟု နမ့်တာဘတ်ဒေသခံတစ်ဦးက သျှမ်းသံတော်ဆင့်ကို ပြောသည်။

ယနေ့ (အောက်တိုဘာ ၈ )ရက် မနက် ၄ နာရီဝန်းကျင်အချိန် တိုက်ပွဲသံများ စထွက်ပေါ်ကာစတွင် စစ်ကောင်စီဘက်က စစ်ကား ၁၀ စီးခန့်နှင့် အင်အား ၂၀၀ နီးပါးခန့်သည် အင်အားထပ်ဖြည့်ဖို့ ပန်ဆိုင်းမှ မုံးကိုးမြို့ဘက်သို့ ဦးတည်သွားတာ တွေ့ရှိရကြောင်းလည်း သတင်းသိရသည်။

မူဆယ်ခရိုင် မုံးကိုးမြို့နယ်အတွင်းတွင် ပြီးခဲ့သည့် ဇူလိုင်လဆန်းပိုင်းကတည်းက စစ်ကောင်စီနှင့် ကိုးကန့်တပ်မတော်တို့က တိုက်ပွဲစတင် ဖြစ်ပွားခဲ့ပြီး တိုက်ပွဲကြောင့် ဒေသခံ ပြည်သူ ၂၀၀၀ ကျော် စစ်ဘေး တိမ်းရှောင်ထွက်ပြေးနေရပြီး တိုက်ပွဲက ဒီထက်ကြာရှည်ပြီး ပြင်းထန်လာမည်ကို ဒေသခံများက စိုးရိမ်နေကြ ကြောင်းသိရသည်။

Leave a Comments