သျှမ်းပြည်မြောက်ပိုင်း ကျောက်မဲမြို့နယ် ဟူးကွက်ကျေးရွာ အရှေ့ဘက်ခြမ်း သဘာဝတောင်ကျ သောက်သုံးရေ ပိုးသတ်ဆေးအနံ့ရနေကြောင်း ဒေသခံများ ပြောပြချက်အရသိရသည်။

ကျောက်မဲမြို့နယ် ဟူးကွက်ကျေးရွာ အရှေ့ဘက်ခြမ်းရှိ သဘာဝ တောင်ကျရေသည် ယမန်နေ့ (အောက်တိုဘာ ၇) မနက် ၉ နာရီမှ စပြီး ရေများအမြှုပ်ထကာ ပိုးသတ်ဆေးနံ့ရနေကြောင်း ဒေသခံများက ပြောသည်။

“ ရေကို လာဖွင့်ကြည့်တော့ အမြှုပ်ထလာတာ။ ပြီးတော့ ပိုးသတ်ဆေးနံ့ အရမ်းနံတယ်။ အခုချိန်ထရနေသေးတယ်။ အဲရေကို သုံးလိုမရသေးဘူး” ဟု ဟူးကွက်ကျေးရွာ ဒေသခံ တစ်ဦးက ပြောသည်။

ထို သဘာဝတောင်ကျရေသည် ကျေးရွာနှင့် (၄) မိုင်လောက်ဝေးပြီး၊ ထိုနေရာမတွင် သျှမ်းပြည်ပြန်လည်ထူးထောင်ရေး ကောင်စီ၊ သျှမ်းပြည်တပ်မတော် (RCSS/SSA) တပ်ဖွဲ့တို့က တပ်ဆွဲထားသည့် နေရာဖြစ်ကြောင်းသိရသည်။

ထိုသို့ ရေအမြှုပ်ထလာခြင်းသည် ဟူးကွက်ကျေးရွာတွင် ယခင်က တခါမျှမဖြစ်ဖူးကြောင်း၊ ဒေသခံများက ဆေးအဆိပ်လာရောက်ခပ်မည်ကို စိုးရိမ်သဖြင့် ထိုရေကို မသောက်သုံးရဲကြောင်း သိရသည်။

“ ကျနော်တို့က ဒီရေကို သောက်တယ်။ ထမင်းချက်တယ်။ အကုန်သုံးတယ်။ ဒီအရှေ့ဘက်ခြမ်းရေက သဘာဝတောင်ကျရေဖြစ်တယ်။သုံးလို့ကောင်းတယ်။ ဒီလိုရေတွေအမြှုပ်ထလာတာ အရင်က တခါမှမဖြစ်ဖူးဘူး။ အခုက ရွာအနောက်ဘက်ကရှိတဲ့ ရေကိုအသုံးပြုနေရတယ် ” ဟု ကျေးရွာခံဒေသတဦးက ပြောသည်။

ယခုလို ရေအမြှုပ်ထလာမှုကြောင့် ကျေးရွာခံ ပြည်သူများက အသက်အန္တာရယ်ထိ ထိခိုက်လာမည်ကို စိုးရိမ်နေကြောင်း သိရသည်။

“ ကြောက်တာပေါ့။ ကံကောင်းလို့ ဘယ်သူမှ မသုံးမိဘူး။ သောက်မိသုံးမိရင် ကျနော်တို့ အသက်အတွက် စိုးရိမ်ရတယ်လေ။ သူတို့ဒီလိုလုပ်တာတော့ မကောင်းဘူး။” ဟု ဒေသခံက ထပ်လောင်းပြောသည်။

ထိုသို့ ရေအမြှုပ်ထ အဆိပ်ခပ်သည့် ကိစ္စနှင့် ပတ်သတ်ပြီး (RCSS/SSA ) မှ မလုပ်ရကြောင်း သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် RCSS ပြောခွင့်ရ ဗိုလ်မှူး စိုင်းခမ်းစံက သျှမ်းသံတော်ဆင့်ကို ပြောသည်။

“ ဒါက မဖြစ်နိုင်ဘူး။ ကျနော်တို့မလုပ်ရဘူး။ ကျနော်တို့ ပေါ်လစီမှာလည်း ဒေသခံပြည်သူတွေကို ဒီလိုလုပ်တာမျိုးမရှိဘူး။” ဟု RCSS ပြောခွင့်ရ ဗိုလ်မှူး စိုင်းခမ်းစံက ပြောသည်။

ဟူးကွက်ကျေးရွာတွင် အရှေ့ဘက်ခြမ်းတွင် RCSS/SSA တို့က တပ်ဆွဲထားပြီး အနောက်ဘက်ခြမ်းတွင် တပ်ပေါင်းစု SSPP , TNLA တို့က တပ်ဆွဲထားကြောင်းသိရသည်။

ဟူးကွက်ကျေးရွာကို တိုက်ပွဲဖြစ်ပွားချိန်တွင် RCSS/SSA တပ်ဖွဲ့က ကျေးရွာခံဒေသများကို အသွားအလာ ပိတ်ပင်ခဲ့ကြောင်းသိရသည်။

ကျောက်မဲမြို့နယ်တွင် ဩဂုတ်လက စပြီး တပ်ပေါင်းစု (SSPP/SSA , TNLA ) နှင့် RCSS/SSA တိုက်ပွဲ များပြင်းထန်ခဲ့ပြီး ဒေသခံပြည်သူမျာက လွတ်မြောက်ရာဒေသတွင် ထွက်ပြေးတိမ်းရှောင်ခဲ့ရကြောင်းသိရသည်။