သျှမ်းပြည် တောင်ကြီးမြို့ ဆေးတက္ကသိုလ်မှ ပထမနှစ် ကျောင်းသူ မကြယ်စင်လင်းလက် ကို စစ်ကောင်စီတို့က အကြမ်းဖက်ဖမ်းဆီးခေါ်ဆောင်သွားပြီး ပုဒ်မ ၅၀ (ည) ဖြင့် အမှုဖွင့် တရားစွဲဆိုထားကြောင်း စုံစမ်းသိရှိရသည်။
တောင်ကြီးမြို့သို့ ကျောင်းလာတက်ပြီး စစ်အာဏာသိမ်းမှုနှင့် ကိုဗစ် – ၁၉ ရောဂါအခြေအနေကြောင့် နေအိမ်သို့ ပြန်နေသည့် တောင်ကြီးမြို့ ဆေးတက္ကသိုလ်မှ ပထမနှစ် ကျောင်းသူ မကြယ်စင်လင်းလက် သည် ပြီးခဲ့သည့် အောက်တိုဘာလ ၃ ရက်နေ့တွင် ချောက်မြို့ရှိ သူမ၏နေအိမ်၌ စစ်ကောင်စီတို့၏ အင်အား သုံးပြီး မတရားဖမ်းဆီးမှုကို ခံခဲ့ရကြောင်းသိရသည်။
“သူက (မကြယ်စင်လင်းလက်) ကတောင်ကြီးမှာ ဆေးကျောင်းလာတက်တယ်၊ ပထမနှစ် (Foundation year) ကျောင်းသူပါ၊ နွေဦးတော်လှန်ရေးတုန်းက ဆန္ဒထွက်ပြတာပဲရှိတာပါ၊ နောက်တော့ သူ့မြို့ကို သူပြန်သွားတယ်၊ ကျမတို့လည်း အဆက်အသွယ်ပြတ်သွားတာ၊ အခုတော့ သူ့ကိုဖမ်းဆီးသွားပြီးမှ ပုဒ်မ ၅၀ (ည) နဲ့ တရားစွဲထား တယ်လို့ ကြားတယ်” ဟု မကြယ်စင်လင်းလက်နှင့် ခင်မင်သူ တစ်ဦးက သျှမ်းသံတော်ဆင့်ကို ပြောသည်။
စစ်ကောင်စီတို့မှ မကြယ်စင်လင်းလက်ကို တရားစွဲဆိုခံထားသည့် အကြမ်းဖက်တိုက်ဖျက်ရေး ပုဒ်မ ၅၀ (ည) သည် နိုင်ငံတော်အစိုးရက အကြမ်းဖက်အဖွဲ့ဟု သတ်မှတ်ထားသည့် အဖွဲ့ကို ငွေကြေး ထောက်ပံ့ခြင်း ဆိုင်ရာ လုပ်ငန်းများ လုပ်ပါက တရားစွဲဆိုခံရသည့် ပုဒ်မ ဖြစ်ပြီး ပြစ်မှု ထင်ရှားသည်ဟု တရားရုံး ဆုံးဖြတ်ပါက ပြစ်ဒဏ် အဖြစ် ထောင်ဒဏ် တသက်နှင့် ငွေဒဏ် ကျခံ ရမည့် ပုဒ်မ ဖြစ်ကြောင်းလည်း သိရသည်။
လက်ရှိတွင် စစ်ကောင်စီတို့ အောက်တိုဘာလ ၃ ရက်နေ့ကတည်းက ဖမ်းဆီးထားသည့် မကြယ်စင်လင်းလက် သည် မိသားစုနှင့် အဆက်အသွယ်မရရှိကြောင်း တောင်ကြီးဆေးတက္ကသိုလ် ကြားကာလ ယာယီ တက္ကသိုလ် ကောင်စီကလည်း ယနေ့ အောက်တိုဘာလ ၈ ရက်နေ့နေ့တွင် သတင်းထုတ်ပြန်ထားပါသည်။
မကြယ်စင်လင်းလတ် မတရားဖမ်းဆီးခံရမှုအပေါ် စစ်ကောင်စီကို အမြစ်ပြတ်သည် အထိ ပိုမိုကြိုးစား တွန်းလှန် တိုက်ပွဲ ဝင်နိုင်ရန်အတွက် ပြည်သူတစ်ရပ်လုံးကို တိုက်တွန်းနိုးဆော်လိုကြောင်းလည်း တောင်ကြီးဆေး တက္ကသိုလ် ကြားကာလ ယာယီ တက္ကသိုလ် ကောင်စီ၏ ထုတ်ပြန်ချက်တွင် ပါရှိသည်။
စစ်တပ်မှ နိုင်ငံတော် အာဏာသိမ်းပြီးနောက်ပိုင်းတွင် ရပ်ကွက်နှင့် မြို့ရွာများအတွင်း သောင်းကျန်းနေသော လူဆိုးသူခိုးဓါးပြများကို နှိမ်နှင်းခြင်း မရှိသော်လည်း လူငယ်တော်တော်များကို နွေဦးတော်လှန်ရေးနှင့် အာဏာရှင် ဖြုတ်ချရေး လှုပ်ရှားမှုများတွင် ပါဝင်သည်ဟူသည့် အကြောင်းပြချက်ဖြင့် စစ်ကောင်စီတို့က အင်အားသုံး ဖမ်းဆီးမှုများ ပြုလုပ်နေကြောင်းသိရသည်။
