သျှမ်းပြည်မြောက်ပိုင်း လားရှိုးမြို့ ရပ်ကွက် ၁၂ နမ့်လောင်းရေကြီးမှုကြောင့် ရေနှင့်မျောပါသွားသည့် ကားအတွင်းမှ ကားသမားအား ယနေ့မနက်အထိ အဖွဲ့အစည်းအသီးသီးမှ လားရှိုးလူငယ်များစုပေါင်းကာ ရှာဖွေမှုပြုနေသော်လည်းရှာမတွေ့သေးကြောင်းသိရသည်။
ဇူလိုင်လ ၂၈ ရက်ညပိုင်းက မိုးသည်းထန်စွာရွာသွန်းမှုကြောင့် မြောင်းရေလျှံတက်ကာရေစီးသန်ချိန် ၁၂ ရပ်ကွက်သား စိုင်းငြိမ်းကျော်ဦးသည် တားမြစ်ထားသည့်ဧရိယာအတွင်းရှိ တံတားတခုအားဖြတ်မောင်းနှင်ရာ ချောင်းရေနှင့်အတူ လူရော ကားပါ မျောပါသွားကြောင်း ၊ ယနေ့အထိ ကူညီရှာဖွေရေး အဖွဲ့များက ရှာဖွေမှုပြုနေသော်လည်း ရှာမတွေ့သေးကြောင်းသိရှိရသည်။
“အဲ့နားကလူတွေတားနေတဲ့အကြားက သူကကားမှန်တံခါးတွေပိတ်ပြီးဖြတ်မောင်းတာ၊ တံတား အလွန်သူ့ကားစက်ရပ်သွားပေမယ့်မလွှတ်ဘူး။ ရေတအားသန်တော့ ကားရောလူပါရေနဲ့မျောပါသွားတယ်။ ရပ်ကွက် ၁၂ နယ်မြေ ၁၉ မန်ဆူသျှမ်းကျောင်း အနောက်ဘက် နမ့်လောင်းချောင်းတံတားကနေကျသွားတာ ။ သူ့ကားရေနဲ့မျောပါသွားတုန်းက သူ့မိန်းမဆီကိုသူ ဖုန်းဆက် သေး တယ်လို့တောင်ပြောတယ်။ သူ့ကားကိုတော့ရှာတွေ့ပြီ။ လူတော့မတွေ့သေးဘူး ”- ဟု လားရှိုးမြို့နေ နန်းဟွမ် က ပြောသည်။
ကားနှင့်အတူ မျောပါသွားသည့် ရပ်ကွက် ၁၂ သား အသက် ၃၀ ခန့်ရှိ စိုင်းငြိမ်းကျော်ဦး(ခ) ချိုချိုအား လားရှှိုးမြို့ရှိ Myanmar Rescue ၊ ကောင်းဆာ ပရဟိတအဖွဲ့၊ မြန်မာနိုင်ငံကြက်ခြေနီအသင်း၊ ဝေဠုကျော်ဖောင်ဒေးရှင်း အဖွဲ့များ အင်အား ရ ဖွဲ့ခန့်အပြင် စေတနာအလျောက်ပါ၀င်လာသည့် လားရှှိုးဒေသခံလူငယ်များ စုပေါင်းကာ ရှာဖွေမှုပြုလုပ်နေကြောင်း သိရသည်။
“ကားကတော့ မနေ့ကမနက်ဆယ်ထုတ်ပြီ။ လူကိုမတွေ့သေးဘူး။ မနေ့ကထက်ပိုများတယ်လူအင်အားက ။ မနေ့ကနေ့လည်ပိုင်း ဒီလောက်ရေမများဘူး။ မနေ့ညနဲ့ ဒီမနက် မိုးထပ်ရွာတော့ ရေထပ်ကြီးနေတယ်။ ကုန်းပိုင်းမှာရှိတဲ့ ရပ်ကွက် ၅၊ ၃၊ ၄၊ ၂၊ ၆၊ ရ ၊ ၈၊ ၁၂ တို့ဘက်ကနေ ရေတွေချောင်းထဲကိုစီးဝင်တာကြောင့်ရေတက်တာ။ ပုံမှန်ဆိုအဲ့ဒီချောင်းက ရေသိပ်မများဘူး။ မိုးရွာတော့ရေလျှံတက်တာ တံတားထက်ခြေသလုံးလောက်မြင့်နေတာရေက ။ ” – ဟု စေတနာအလျောက် ကူညီကယ်ဆယ်ရေးအဖွဲ့နှင့်အတူ လိုက်ပါရှာဖွေသော လားရှိုးဒေသခံ စိုင်းလွယ် က ပြောသည်။
ရေနှင့်အတူ မျောပါသူမှာ လက်ရှိတွင် ဇနီးနှင့် သမီး ၂ ဦးကျန်ရစ်ခဲ့ကြောင်းသိရသည်။ နမ့်လောင်းချောင်းသည် အထက်ပိုင်းမှစီးဆင်းလာကာ ၀မ့်လောင်းတွင် နမ့်သျှိုနှင့်ပေါင်းပြီး အေဒီတွင် နမ့်ယောဝ်ချောင်းအတွင်းစီးဝင်ကြောင်း၊ ထိုမှတဆင့် နမ္မတူမြစ်အတွင်းသို့စီးဝင်ကြောင်း သိရသည်။
