သျှမ်းပြည်တောင်ပိုင်း လွိုင်လင်ခရိုင်အတွင်း ယခုရက်ပိုင်း ကိုဗစ်- ၁၉ ပိုးတွေ့လူနာများ ပြန်လည်မြင့်တက် လာသည့်အတွက် အသွားအလာ ကန့်သတ်လိုက်ကြောင်း စုံစမ်းသိရသည်။

ဟိုပုံးကိုရင်လေး ပျံလွန်တော်မှုပြီး စက်တင်ဘာ (၂)ရက်တွင် ဈာပနာပွဲပြုလုပ်ပြီးနောက် ပင်လုံမြို့နှင့် လွိုင်လင်မြို့တို့မှ မြို့ပေါ်ရပ်ကွက် များတွင် နေထိုင်ကြသည့် ကားသမားများ အပြင် ကျေးရွာဘက်မှလည်း ပိုးတွေ့လူနားများ တွေ့ရှိမှု များပြားလာကြောင်း ဒေသခံ ပြည်သူတစ်ဦးက သျှမ်းသံတော်ဆင့်ကို ပြောသည်။

“ဒီဘက်က ပအိုဝ်းတွေကလည်း ဟိုပုံးကိုရင်လေး ဈာပနာပွဲကို သွားကြတာများတယ်လေ၊ အဲ့ပွဲက အပြီးကျနော်တို့ မြို့နဲ့ ပင်လုံက ပိုးတွေ့လူနာများလာတယ်၊ အစကလွိုင်လင်နဲ့ တောင်ကြီး၊ ပင်လုံနဲ့ တောင်ကြီး တို့ကို ကားမောင်း တဲ့ ကားသမားတွေကနေပိုးတွေ့ များလာတာ၊ အခုဆို ရွာဘက်မှာလည်း ပိုးတွေ့တွေ များလာတယ်” ဟု လွိုင်လင်မြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယမန်နေ့ အောက်တိုဘာလ ၆ ရက်နေ့ တစ်ရက်တည်းအတွင်းတွင် လွိုင်လင်မြို့နယ်အတွင်း ကိုဗစ် – ၁၉ သံသယလူနာ ၁၀၀ ကျော်ကို စစ်ဆေးရာ ၄၂ ဦးတွင် ကိုဗစ် – ၁၉ ပိုးတွေ့ရှိရပြီး ပင်လုံမြို့မှ အရှေ့တိုက် နောင်လိုက်ကျေးရွာတွင်လည်း ဘဏ်ဝန်ထမ်း အပါအဝင် ၄ ဦးကို ကိုဗစ် – ၁၉ တွေ့ရှိရကြောင်း ဒေသခံတစ်ဦး ကသျှမ်းသံတော်ဆင့်ကို ပြောသည်။

“ ပိုးတွေ့လူနာတွေ ပြန်များလာလို့ ဆိုင်တချို့လည်း ပိတ်ထားပြီ၊ ဒါက လာစစ်တဲ့သူတွေထဲက တွေ့ရတဲ့ ပိုးတွေ့ ပမာဏပေါ့၊ တချို့ကတွေက ဖျားနာကြတယ်၊ အနံ့ပျောက် ကြတယ်၊ ဒါပေမဲ့ သူတို့ လာမစစ်ကြဘူး၊ ပြောရရင် တချို့က ဟိုပုံးကိုရင်လေးရဲ့ အပြောကို ယုံကြည်ကြတုန်းပဲ၊ ရွာဖက်မှာဆို အိမ်မှာပဲ ကြိတ်ကုကြတာများတယ်၊ အဲ့ကြောင့်အခုဆို သွားလာမှုတွေကိုလည်း တင်းကြပ်ထားတယ်” ဟု လွိုင်လင်မြို့နေ ဒေသခံတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် လွိုင်လင်မြို့နှင့် ပင်လုံမြို့တွင်း ထပ်တိုးတွေ့ရှိလာသည့် ပိုးတွေ့လူနာများသည် ဟိုပုံးကိုရင်လေး ဈာပနာပွဲကို သွားရောက်ခဲ့သူများ ဖြစ်ကြကြောင်းသိရသည်။

တောင်ကြီးသို့ ကားမောင်းသည့် ကားသမားများနှင့် ၎င်းတို့ကို ထိတွေ့ပက်သက်မှုရှိခဲ့သည့် သူများက ပိုးတွေ့ခဲ့ခြင်းဖြစ်ရာ ဈေးဆိုင်တချို့တို့သည် တောင်ကြီးပြန်ကားသမားနှင့် ဟိုပုံးကိုရင်လေး ဈာပနာပွဲကို သွားခဲ့သူများကို လက်ခံ ရောင်းချ ပေးခြင်း များလည်း မပြုလုပ်တော့သည့်အတွက် ဒေသတွင်း စိတ်ဝမ်းကွဲမှုများ ဖြစ်ပေါ်လာနိုင်သည့်အတွက် စိုးရိမ်ရကြောင်းလည်း ဒေသခံများက ပြောသည်။