၁၂ ရက်အတွင်း သျှမ်းပြည်နယ်တွင် စစ်ဘေးရှောင်ဒုက္ခသည် ၂၈၀၀ ကျော်ရှိကြောင်း ကမ္ဘာ့ကုလသမဂ္ဂလူသားချင်းစာနာထောက်ထားမှုဆိုင်ရာ ညှိနှိုင်းရေးအဖွဲ့ UN OCHA က ပြောဆိုလိုက်ပါသည်။

ဇူလိုင်လ ၂၆ ရက်နေ့ အစီရင်ခံစာတွင် ဇူလိုင်လ ၉ ရက်နေ့မှ ၂၃ ရက်နေ့အထိ ၁၂ ရက် အတောအတွင်း သျှမ်းပြည်မြောက်ပိုင်း နမ္မတူမြို့နယ်၊ နမ့်ခမ်းမြို့နယ်၊သျှမ်းပြည်တောင်ပိုင်း မိုင်းကိုင်၊ကျေးသီးမြို့နယ်တို့တွင် စစ်ဘေးရှောင်လူထု စုစုပေါင်း ၂၈၀၀ ကျော်ရှိကြောင်း UN OCHA က ထုတ်ပြန်ပြောဆိုလိုက်သည်။

အစိုးရတပ်မတော်နဲ့ RCSS/SSA ကြား၊ TNLA နဲ့ RCSS/SSA တို့ကြားတိုက်ပွဲတွေကြောင့် စစ်ဘေး ရှောင်ကြတာဖြစ်တယ်။ ဒီစစ်ဘေးရှောင် တွေက အရင်ကတည်းကရှိရင်းစွဲတွေမဟုတ်ဘူး။ ဒီအတော အတွင်းမှာမှ အသစ်ရောက်လာတဲ့ စစ်ဘေးရှောင်အသစ်တွေဖြစ်တယ် – ဟု ကြေငြာချက်တွင်ပါရှိသည်။

စစ်ဘေးရှောင်အများစုမှာ ဘုန်းတော်ကြီးကျောင်းနှင့် ခရိယာန်ဘုရားကျောင်းများတွင် ခိုလှုံခဲ့ကြသည်။ လယ်ယာမြေဆင်းချိန်ဖြစ်သဖြင့် စစ်ဘေးရှောင်များမှာ ပစ်ခတ်သံငြိမ်သွားသည်နှင့် နေရပ်သို့ အမြန်ဆုံး ပြန်သွားကြသည်။

ဒီလထဲမှာ သျှမ်းပြည်မြောက်ပိုင်းရောတောင်ပိုင်းရော တိုက်ပွဲတွေဆက်တိုက်ဖြစ်နေတယ်။ စစ်ဘေးရှောင် လူထုအများအပြား နေရပ်ကနေစွန့်ခွါကြရတဲ့အပြင်၊ တင်းမာနေတဲ့ စစ်ရေးတွေကြောင့် တိုက်ပွဲတွေ ပိုမိုကြီးထွားလာမှာကိုစိုးရိမ်နေကြတယ်။ တိုက်ပွဲတွေရပ်တန့်ဖို့ ဒေသခံလူထုရော ရဟန်းသံဃာတွေပါ တောင်းဆို လာ ကြတာကိုတွေ့ရပါတယ် ၊ စိတ်ရင်းစေတနာမှန်နဲ့ အဘက်ဘက်လက်တွဲလုပ်ဆောင်မှသာ ဒီစစ်ပွဲ တွေရပ်တန့်နိုင်မှာ – ဟု ကျားခေါင်းပါတီ ပြောခွင့်ရ စိုင်းလိတ်က သျှမ်းသံတော်ဆင့်အားပြောသည်။

UNOCHA ၏အစီရင်ခံစာတွင် ၂၀၁၈ ဇန်နဝါရီလမှ ယခု ဇူလိုင်လအထိ သျှမ်းပြည်တွင်း စစ်ဘေးရှောင်ရ သည့်လူထု ၆၅၀၀ ကျော်ရှိပြီး ကချင်ပြည်နယ်တွင် စစ်ဘေးရှောင်လူထု ၆၈၀၀ ရှိကြောင်း ပါရှိပါသည်။