သျှမ်းပြည်မြောက်ပိုင်း ကျောက်မဲမြို့ နယ် ပန်လင်ကျေးရွာအုပ်စု ပန်လင်ကျေးရွာ ဒေသခံ (၆) ဦးကို တပ်ပေါင်းစု (TNLA ,SSPP/SSA) တို့က အောက်တိုဘာ ၂ ရက်တွင် ဖမ်းဆီးခေါ်ဆောင်သွားကြောင်း စုံစမ်းသိရှိရသည်။
ထိုဖမ်းဆီးခံရသူများသည် ပန်လင်ကျေးရွာ (၆)ဦးသည် ယခင်က သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော်တွင် တာဝန်ထမ်းဆောင်ခဲ့ဖူးသည့် သူများဖြစ်ကြောင်း လက်ရှိမှာ လက်ဖက်ခူးသည့်လုပ်ငန်းကို လုပ်ကိုင်သည့် သူများဖြစ်ကြောင်း ပန်လင်းကျေးရွာမှ အသက် (၄၀)ကျော်ရှိ ဒေသခံ အမျိုးသားတစ်ဦး က သျှမ်းသံတော်ဆင့်ကိုပြောသည်။
“ သူတို့ (၆) ယောက်ကို ဖမ်းဆီးသွားတာ။ သျှမ်းလူမျိုးပါ။ အရင်ကတော့ RCSSမှ တပ်ထွက်လာသူတွေ။ အခုတော့ သူတို့ လက်ဖက်လုပ်ငန်းလုပ်ကြတယ်” ဟု ဒေသခံ အမျိုးသားက ပြောသည်။
တပ်ပေါင်းစုမှ ဖမ်းဆီးသွားသည့် (၆)ဦးတွင် အမျိုးသမီး (၂)ဦး နှင့် အမျိုးသား (၄)ဦးပါဝင်ပြီး၊ ထိုသူများသည် RCSS/SSAတွင် တာဝန်ထမ်းဆောင်ခဲ့ဖူးသူများဖြစ်သဖြင့် RCSS/SSAကို သတင်းပေးဖြစ်မှာ စိုးရိမ်သဖြင့် ခေါ်ဆောင်သွားခြင်းဖြစ်ကြောင်း ဒေသခံ အမျိုးသား က ပြောသည်။
“RCSS ကို သတင်းပေးမှာကို စိုးရိမ်တာကြောင့်လာခေါ်သွားတယ်။ အခုက သူတို့က ဒီရွာပဲ အေးဆေးနေကြပါတယ်။ သူတို့ (တပ်ပေါင်းစု) ဘက်က စိုးရိမ်လို့ပဲ ခေါ်သွားဖြစ်နိုင်တယ်” ဟု ၎င်းက ဆိုသည်။
ပြည်သူများကို ဖမ်းဆီးခေါ်ဆောင်ရာတွင် စစ်တပ်ဖွဲ့ဝင်များကိုသာဖမ်းဆီးကြောင်း၊ သာမန်ပြည်သူများကို ဖမ်းဆီးသည့် ပေါ်လစီမရှိကြောင်း တအာင်း(ပလောင်း) အမျိုးသားလွတ်မြောက်ရေးတပ်မတော် ပြောခွင့်ရ ဗိုလ်မှူးကြီး မိုင်းအိုက်ကျော်က သျှမ်းသံတော်ဆင့်ကို ပြောသည်။
“ ကျနော်တို့က သာမန်ပြည်သူတွေကို ဖမ်းဆီးတာမျိုးမရှိဘူး။ စစ်တပ်ဖွဲ့ဝင်တဲ့သူတွေဆိုရင်တော့ ခေါ်ဆောင်ထား တာရှိတယ်။ သာမန်ရှာစားနေတဲ့သူတွေကို ဖမ်းတာမရှိဘူး” ဟု (TNLA) ပြောခွင့်ရ မိုင်းအိုက်ကျော်က ပြောသည်။
ပန်လင်ကျေးရွာဒေသခံများသည် တပ်ပေါင်းစုအတွက် နေ့စဉ်ထမင်း၊ ဟင်းချက်ပြီးပို့ဆောင်နေရ ကြောင်းသိရသည်။
ထိုသို့ ထမင်း၊ ဟင်းပို့ဆောင်ပေးနေသည့် ပြည်သူ (၂) ဦး ပစ်ခတ်ခံခဲ့ရဖူးကြောင်း သိရသည်။
