သျှမ်းပြည်တောင်ပိုင်း မိုင်းကိုင်မြို့အတွင်း တိုက်ပွဲဖြစ်ပွားသောကြောင့် ဒေသခံ ရွာသား (၄) ဦး လက်နက်ကြီး ထိမှန်ခဲ့ကြောင်း စုံစမ်းသိရှိရသည်။
ယနေ့ စက်တင်ဘာ (၄) ရက် ညနေ ၅ နာရီခန့်က ပန်ကေတုကျေးရွာအုပ်စု ကုန်းပေါင်းရွာမှ ဒေသခံ (၄) ဦး လက်နက်ကြီး ထိမှန်ပြီး မိုင်းကိုင်ပြည်သူ့ဆေးရုံသို့ ပို့ဆောင်နေကြောင်း စုံစမ်းသိရှိရသည်။
“သူတို့နေတဲ့ ရွာ(ကုန်းပေါင်း) မှာ လက်နက်ကြီး လာကျပြီး ဒေသခံ (၄) ဦး ထိသွားတယ်။ ကုန်းပေါင်းက ဒေသခံတွေ ခုထိ ထွက်ပြေးနေရတယ်” ဟု ပန်ကေတု မှ ဒေသခံတ တစ်ဦး က သျှမ်းသံတော်ဆင့် ကိုပြောသည်။
လက်နက်ကြီးထိမှန်သည့် (၄)ဦးမှာ အမျိုးသား (၁)ဦး ၊ အမျိုးသမီး (၁)ဦးနှင့် ကလေး (၂)ဦးဖြစ်ကြောင်းသိရသည်။
“အမျိုးသားက ဝမ်းဗိုက်မှာ ထိပြီး။ အမျိုးသမီး တစ်ဦးက ခြေထောက်မှာ တစ်ယောက်ထိတယ်။ ကလေး (၂) ယောက်က လက်တွေမှာ ထိမိတယ်”ဟု ပန်ကေတုကျေးရွာက ဒေသခံ တစ်ဦး ကပြောသည်။
ကုန်းပေါင်းကျေးရွာနှင့် ကုန်းလိုင်းကျေးရွာမှ ထွက်ပြေးလာသည့် ဒေသခံ ခန့်မှန်းခြေ (၈၀၀)နီးပါးရှိပြီး၊ ထိုစစ်ရှောင်မျာသည် ပန်ကေတုရှိ စစ်ရှောင်စခန်းများသို့ ထွက်ပြေးလာကြပြီး၊ စစ်ရှောင်များအတွက် စားနပ်ရိက္ခာနှင့် နေရာထိုင်ခင်းအရေးပေါ်လိုအပ်နေကြောင်းသိရသည်။
“ စစ်ရှောင်တွေက ဘုန်းကြီးကျောင်းထဲပြည့်သွားပြီ၊ အခု စစ်ရှောင် တွေ ခန့်မှန်းခြေ (၈၀၀)နီးပါးရှိတော့ နေဖို့အမိုးအကာတွေ အစားအသောက်တွေ အရေးပေါ်လိုနေတယ်” ဟု စစ်ရှောင်ကူညီပေးနေသူ တစ်ဦးက ပြောသည်။
တိုက်ပွဲကြောင့် ကုန်းပေါင်းကျေးရွာအတွင်းသို့ လက်နက်ကြီး (၂)လုံးကျကြောင်းသိရသည်။
အောက်တိုဘာ (၃) ရက်နေ့ထိ ပန်ကေတုကျေးရွာတွင် ရှိသည့် စစ်ရှောင်များ စာရင်း (၂၂၃၃) ဦးရှိပြီး လက်ရှိ ကုန်းပေါင်းကျေးရွာနှင့် ကုန်းလိုင်းကျေးရွာ မှ ဒေသခံများသည် ပန်ကေတုစစ်ရှောင်စခန်းသို့ ထွက်ပြေးလာကြကြောင်း သိရှိရသည်။
Leave a Comments