မြန်မာနိုင်ငံတွင် စစ်တပ်က အာဏာသိမ်းပြီး (၈) လကြာမြင့်ပြီးနောက်ပိုင်း အခြေခံစားသောက်ကုန်များ၊ ကုန်ပစ္စည်းများ ဈေးနှုန်းများ အဆမတန်မြင့်တက်လာသည့်အတွက် ပြည်သူများ အခက်အခဲများစွာ ရင်ဆိုင်ကြုံတွေ့ နေရ ကြောင်း စုံစမ်းသိရှိရသည်။

သျှမ်းပြည်တွင် လက်ရှိမှာ အခြေခံစားသောက်ကုန်များကို ခက်ခဲစွာ ဝယ်ယူနေရသည့်အပြင် ကုန်ဈေးနှုန်းများလည်း အဆမတန်မြင့်တက်နေမှုကြောင့် ပြည်သူများချွေတာသုံးစွဲနေရကြောင်း သျှမ်းတောင် ပင်လုံမြို့နေ အသက် ၂၀ ကျော် အမျိုးသမီး က သျှမ်းသံတော်ဆင့်ကို ပြောသည်။

“ အကုန်တက်တယ်။ ဆီဆိုလည်း အရင်က တဗူးကြီးကို ၂၅၀၀ ပေးဝယ်ရတာ။ အခုက ၃၅၀၀ ရှိတယ်။ အခြေခံစားသောက်ကုန်တွေ အကုန်တက်တယ်။ အခုက အိမ်မှာရှိတာကိုဘဲ ချွေးတာပြီးစားသောက်နေရတာ။ “ ဟု ပင်လုံမြို့ ဒေသခံတဦးက ပြောသည်။

လက်ရှိတွင် အာဏာသိမ်းစစ်ကောင်စီလက်ထက်တွင် ကုန်ပစ္စည်းများ၊ အခြေခံစားသောက်ကုန်များအားလုံးသည် ၃ ဆ အထိ ဈေးနှုန်းမြင့်တက်လာသဖြင့် ကုန်စုံရောင်းသည့် သူများသည် ကုန်ပစ္စည်းများကို တင်သွင်းမှု မရှိတော့ကြောင်း လင်းခေးမြို့ ဈေးသည်တစ်ဦး က သျှမ်းသံတော်ဆင့်ကို ပြောသည်။

“ အခုက ဈေးကတော့ အကုန်ကြီးနေတော့တာပဲ။ ဘာမှ ဈေးပေါတာ မရှိဘူး။ ၃ ဆလောက်တက်သွားတယ်။ စက်သုံးဆီတောင်း အပြေးအလွှား ဝယ်နေကြရတယ်။ ကျမဆိုလည်း အခုဆို ကုန်ပစ္စည်းတွေတောင် အများကြီး မတင်တော့ဘူး” ဟု လင်းခေးမြို့ ဒေသခံတဦးက ပြောသည်။

သွင်းကုန်များကို ပြည်ပနိုင်ငံဖြစ်သည့် ထိုင်းနှင့် တရုတ်နိုင်ငံထုတ်ပစ္စည်းများကို အားကိုးနေရသည့် မြန်မာနိုင်ငံသည် စစ်အာဏာသိမ်းယူပြီးနောက်ပိုင်းတွင် မြန်မာငွေ တန်ဖိုးကျဆင်းလာသည့်အတွက် အစစအရာရာ ကုန်ပစ္စည်းများ ဈေးတက်လာသည်။

ကုန်ဈေးနှုန်းမြင့်လာသည့် အပြင် ကိုဗစ် ၁၉ ကာလဖြစ်သောကြောင့် ပြည်သူအများအပြားက အလုပ်အကိုင် မရှိသော်ကြောင့် စားဝတ်နေရေးအတွက် ခက်ခဲမှုရှိနေကြောင်းသိရသည်။

“ အခုက ကိုဗစ် ကာလဖြစ်နေတယ်။ ပြီးတော့ အလုပ်အကိုင်မရှိဘူး။ ပုံမှန်အလုပ်တောင်မလုပ်ရတော့ဘူး။ ကုန်ပစ္စည်းတွေကပါ ဈေးတွေကကြီးနေတော့ ကျနော်တို့ စားဝတ်နေရေးက ပိုပြီးခက်ခဲလာတယ်။ ကလေးကိုတောင်း မုန့်ဖိုး နေ့စဉ်မပေးနိုင်တော့ဘူး” ဟု လဲချားမြို့ ကလေး ဖခင်တဦးက သျှမ်းသံတေ်ာဆင့်ကို ပြောသည်။

မြန်မာနိုင်ငံတွင် စစ်အာဏာသိမ်းယူမှုကြောင့် ကုန်ပစ္စည်း၊ အခြေခံစားသောက်ကုန်များ၊ စက်သုံးဆီများ ဆက်လက် ဈေးနှုန်းမြင့်တက်နေလျက်ရှိကြောင်းသိရသည်။

မြန်မာနိုင်ငံတွင် တရိပ်ရိပ်တက်လာသည့် ကုန်းဈေးနှုန်းများကြောင့် ပြည်သူများလည်း နေ့စဉ်း စားဝတ်နေရေးအတွက် စိုးရိမ်ပူပန်နေကြောင်း သိရသည်။