သျှမ်းပြည် အရှေ့ပိုင်း တာချီလိတ်မြို့တွင်းတွင် စစ်ကောင်စီလုံခြုံရေး တိုးမြှင့်ချ ထားသော်လည်း လုယက်ခိုးယူမှု တစ်နေ့ထက်တစ်နေ့ ပိုမိုများပြားလာကြောင်း ဒေသခံများ၏ ပြောကြားချက်အရ သိရသည်။
နယ်စပ်မြို့ဖြစ်သည့် တာချီလိတ်တွင် ဆိုင်ကယ်ခိုးယူခံရမှုဖြစ်ပွားလေ့ရှိပြီး လက်ရှိတွင် ဓါးဖြင့်ထောက်ပြီး ပိုက်ဆံနှင့် ဆိုင်ကယ် လုယုများသည်လည်း ပြည်သူများ မကြာခဏ ဖြစ်ပွားကြောင်း တာချီလိတ် မယ်ခေါင်ရပ်ကွက် ဒေသခံတစ်ဦးက သျှမ်းသံတော်ဆင့်ကို ပြောသည်။
“အခုဆို သူခိုးတွေက ပစ္စည်းတွေကိုခိုးတာပဲမဟုတ်ဘူး၊ လုပါလုလာတယ်၊ ခြောက်လက်မဓါးနဲ့ ဈေးထဲရပ်ကွက် ထဲပါလာလုတယ်၊ ဟို မနေ့ကဆို ဆိုင်မှာခေါက်ဆွဲစားနေတဲ့ အမျိုးသမီး လည်မြိုကို ဓါးထောက်ပြီးတော့ ပိုက်ဆံ အိတ်လုယူသွားတယ်၊ ဒါက နေ့ခင်းကြီးပဲနော်၊ သူခိုးတွေက ဓါးပြလိုဖြစ်လာပြီ၊ ဘာအကြောက်အရွံ့မှ မရှိတော့ ဘူး” ဟု မယ်ခေါင်ရပ်ကွက် အမျိုးသားတစ်ဦး က ပြောသည်။
စစ်တပ်မှ နိုင်ငံတော်အာဏာသိမ်းပြီးနောက်ပိုင်း တာချီလိတ်မြို့တွင်းတွင် လုံခြုံရေး အများအပြားချထားသော် လည်း ဆိုင်ကယ်ခိုးယူမှုကို ဖမ်းဆီးရမိသည့် သတင်းများလည်း မကြားရသည့်အပြင် နေ့ခင်းပိုင်း အချိန်များတွင်ပါ ခိုးမှုများ ရှိလာသည့်အတွက် ဒေသခံပြည်သူများ၏ အသက်အန္တရာယ်အတွက်ပါ စိုးရိမ်ရသည့် အဆင့်ထိ ရောက်ရှိနေကြောင်း ဒေသခံများက ပြောဆိုကြသည်။
“ရဲတွေ၊ စစ်သားတွေက မြို့ထဲရပ်ကွက်ထဲမှာ လုံခြုံရေးချထားတာပဲ၊ ဒါပေမဲ့ သူတို့က သူတို့ဖမ်းချင်တဲ့သူကိုပဲ သူတို့ဖမ်းတာ၊ သူခိုး ဓါးပြတွေ ဒီလောက်သောင်းကျန်းနေတာ သူတို့က ဘာမှမလုပ်ပေးဘူး၊ လူငယ်တွေကိုကျ တော့ ဖမ်းကြတယ်၊ ရပ်ကွက်လုံခြုံရေး မြို့ရွာလုံခြုံရေးအတွက်လုပ်ဆောင်ပေးမယ်ဆိုတာ မရှိဘူး” ဟု ပါဆတ်ရပ်ကွက်နေ အမျိုးသားတစ်ဦးက ဆိုသည်။
တာချီလိတ်မြို့တွင်းရှိ စစ်သားနှင့် ရဲသားတို့သည် လုံခြုံရေးများနေသော်လည်း ဆိုင်ကယ်ခိုးမှုများနှင့် ပြည်သူ့ အသက်အန္တရာယ်ပြုသည်အထိ လုပ်ဆောင်နေကြသော တရားခံများကို စုံစမ်းဖမ်းဆီးခြင်းများ မရှိသော်လည်း အာဏာသိမ်းမှုကိုဆန့်ကျင်သူဟု သံသယရှိသူများအား ရှာဖွေဖမ်းဆီးခြင်းကိုမူ တစိုက်မတ်မတ် ဆောင်ရွက်နေကြသည်။
