တရုတ်- မြန်မာနယ်စပ် မူဆယ်ခရိုင် ကျင်ဆန်ကျော့ တွင် တအာင်း အမျိုးသားလွတ်မြောက်ရေး တပ်မတော် (TNLA) နှင့် စစ်ကောင်စီလက်အောက်ခံ ရဲတပ်ဖွဲ့ဝင်များက တိုက်ပွဲဖြစ်ပွားခဲ့ပြီး ရဲတပ်ဖွဲ့တစ်ဦး သေဆုံး သွားကြောင်း သတင်းရရှိသည်။
ယမန့်နေ့ အောက်တိုဘာ (၃) ည (၇) နာရီဝန်ကျင်းတွင် ကျင်ဆန်ကျော့ ဆဲဗင်း ဟွာကျင်း ဓာတ်ဆီဆိုင် ပတ်ဝန်းကျင်တွင် တိုက်ပွဲဖြစ်ပွားခဲ့ကြောင်း သိရသည်။
“ တအာင်း(ပလောင်း) နဲ့ ရဲတပ်ဖွဲ့ဝင်တွေ တိုက်ပွဲဖြစ်တာ။ ရဲဘက်က တစ်ဦးသေသွားတယ်လို့ပြောတယ်။ ဘာလို့တိုက်ပွဲ ဖြစ်လဲတော့ မသိရဘူး။ မနေ့ကတော့ အဲဘက်မှာ သေနတ်သံတွေ ကြားနေရတယ် ” ဟု ကျင်ဆန်ကျော့တွင် နေသည့် အမျိုးသားတဦးက ပြောသည်။
စစ်ကောင်စီတပ်သားများသည် စစ်ဝတ်စုံမဝတ်ဆင်ဘဲ ရဲဝတ်စုံ လှဲဝတ်ကာ လက်နက်ကိုင်ပြီး လမ်းသွားလမ်းလာ ပြည်သူများကိုလည်း ပိုက်ဆံကောက်ယူနေလျက်ရှိကြောင်း ဒေသခံများက ပြောသည်။
“ သူတို့က ပြည်သူတွေ အနိုင်ကျင့်တယ်။ လမ်းသွားလမ်းလာ အဲလိုသူတွေကို ပိုက်ဆံကောက်တာယူတာ၊ တောင်းတာရှိတယ်။ သူတို့တွေက စစ်သားတွေဘဲတဲ့။ ရဲဝတ်စုံကိုလှဲဝတ်ထားတဲ့သူတွေဖြစ်တယ်” ဟု ကျင်းစန်းကျော့ ဒေသခံ တဦးက ပြောသည်။
လက်ရှိကာလအတွင်း TNLA သည် ကျင်ဆန်ကျော့ဘက်တွင် တပ်စခန်းလာရောက်ချနေလျက်ရှိကြောင်း ဒေသခံများ ကပြောသည်။
“ သူတို့ (TNLA) ဒီဘက်ကို ရောက်နေတာ။ ဒီဘက်မှာ တပ်စခန်းကို လာချမယ်လို့ ပြောတာကြားတယ်” ဟု ထို အနီးပတ်ဝန်ကျင် တွေနေထိုင်သူက ပြောသည်။
ထိုကိစ္စနှင့်ပတ်သတ်ပြီး TNLA မှပြောခွင့်ရပုဂ္ဂိုလ် ဗိုလ်မှူးမိုင်းအိုက်ကျော်ကို သျှမ်းသံတော်ဆင့်မှ အကြိမ်ကြိမ် ဆက်သွယ်ခဲ့သော်လည်း မရရှိခဲ့ပေ။
သျှမ်းမြောက် မူဆယ်ခရိုင် အတွင်း ကိုးကန့်တပ် (MNDAA)၊ သျှမ်းပြည်တိုးတက်ရေးပါတီ (SSPP/SSA)၊ TNLA ၊ KIA နှင့် စစ်ကောင်စီတို့ လှုပ်ရှားသွားလာနေသည့် နေရာဖြစ်သည်။
Leave a Comments