သျှမ်းပြည်တောင်ပိုင်း မိုင်းကိုင်မြို့နယ်အတွင်းတွင် ယနေ့(အောက်တိုဘာ ၄)ရက် မနက်ပိုင်း မှ စတင်ကာ လက်နက်ကြီးသံများ ဆက်ကြားနေရသဖြင့် စစ်ရှောင် (၃၀၀၀)ကျော် နေရပ်မပြန်နိုင်သေးကြောင်း စုံစမ်းသိရသည်။

အောက်တိုဘာ (၄) ရက် မနက်ပိုင်းတွင် မိုင်းကိုင်မြို့နယ် ဟမ်းငိုင်းကျေးရွာ တွင် ယနေ့ (အောက်တိုဘာ ၄)ရက် မနက်ပိုင်းမှ စတင်ကာ နေ့လယ်ပိုင်းထိ လက်နက်ကြီးသံများ ဆက်လက်ကြားနေရသေးကြောင်း ကုန်းစုံဘုန်းကြီးကျောင်း ရောက်ရှိနေသည့် စစ်ရှောင် တစ်ဦးထံမှ စုံစမ်းသိရှိရသည်။

“အခုထက်ထိ ကုန်းစုံဘုန်းကြီးကျောင်းကနေ လက်နက်ကြီးသံတွေကြားနေရတယ်။ လက်နက်သံတွေ ဆက်တိုက်ကြားနေရတဲ့အတွက် နေရပ်မပြန်နိုင်သေးဘူး ” ဟု ကုန်းစုံဘုန်းကြီးကျောင်း က စစ်ရှောင် တစ်ဦး က သျှမ်းသံတော်ဆင့် ကိုပြောသည်။

မိုင်းကိုင်မြို့နယ် ပန်ကေတုကျေးရွာအုပ်စုမှာ စစ်ရှောင် (၂၂၃၃) ဦး နှင့် ဟမ်းငိုင်းကျေးရွာအုပ်စု (၉၀၀) ကျော် နှင့် လွယ်လိုင်ဘုန်းကြီးကျောင်း (၃၀) ကျော် ရှိထားကြောင်း စုံစမ်းသိရှိရသည်။

“စစ်ရှောင်တွေက မပြန်ရဲသေးဘူး။ ၂ ဖက်တပ် စစ်ရေးတင်းမာမှုတွေ ရှိနေတယ်လို့ပြောတယ်။ စစ်ရှောင်တွေလည်း နေ့တိုင်း နီးပါး ရောက်လာတာတွေရှိတယ်” ဟု စစ်ရှောင်ကူညီပေးသည့် ကော်မတီဝင် တစ်ဦး က ပြောသည်။

စက်တင်ဘာ (၁၄) ရက်နေ့ ကစတင်ပြီး မိုင်းကိုင်မြို့နယ် ဟိုခဲကျေးရွာအုပ်စုအတွင်း သျှမ်းတပ် (၂) တပ် တိုက်ပွဲ ပြင်းထန်သဖြင့် ဒေသခံများ နေရပ်သို့ ထွက်ပြေးတိမ်းရှောင်ခဲ့ရပြီး လက်ရှိချိန်ထိ မပြန်နိုင်သေးကြောင်း သိရှိရသည်။

သျှမ်းတောင် မိုင်းကိုင်မြို့နယ်အတွင်း ဖြစ်ပွားနေသည့် တိုက်ပွဲကိစ္စနှင့် ပတ်သက်ပြီး သျှမ်းတပ် (၂) တပ် အချင်းချင်း ညှိနှိုင်းဆွေးနွေးရန် အဆင်မပြေသည့်အကြောင်း၊ တဖက်ကို တဖက် အပြန်အလှန် လက်မခံသဖြင့် တွေ့ဆုံရန် မဖြစ်နိုင်ကြောင်း ထုတ်ပြန်စာထုတ်ကြသည်။

စစ်ရေး ပဋိပက္ခများ ဖြေရှင်းရန် မိမိတို့က ရှမ်းပြည်တိုးတက်ရေးပါတီ၊ရှမ်းပြည်တပ်မတော် (SSPP/SSA)၏ ဥက္ကဌ ဖြစ်သည့် ဗိုလ်ချုပ်ကြီး ပန်ဖ ထံသို့ စားရေးသားညှိနှိုင်းခဲ့သော်လည်း (SSPP/SSA) ဘက်မှ အကြောင်းပြန်ကြားခြင်း မရှိခဲ့ဘဲ တိုက်ပွဲများ တနေ့တခြား ပိုမိုပြင်းထန်လာကာ နှစ်ဖက်တပ်ဖွဲ့ဝင်များ ဒဏ်ရာရကျဆုံးနေရသည့်အပေါ် အထူးဝမ်းနည်း ကြေကွဲမိကြောင်း RCSS/SSA က အောက်တိုဘာ (၁) ရက်နေ့က ထုတ်ပြန်ခဲ့သည်။

“၂ ဖက်တပ် တွေ့ဆုံညှိနှိုင်းဆွေးနွေးရင် အကောင်းဆုံးပဲ။ကျနော်တို့ သျှမ်းပြည်သား အချင်းချင်း ပြန်တိုက်တာက ကျနော်တို့တောင် ရှုံးနေပြီ။ တစ်ဖက်ကလည်း ပြည်သူတွေက ဘယ်သူူ့ကို သွားအားကိုးမလဲ” RCSS ၏ပြောရေးဆိုခွင့်ရှိသူ စိုင်းခမ်းစံ က ထုတ်ပြန်ချက် နှင့် ပတ်သက်ပြီး သျှမ်းသံတော်ဆင့် ကိုပြောသည်။

ဆက်လက်ပြီး SSPP/SSA ဘက်မှလည်း ဗိုလ်ချုပ် စဝ်ပန်ဖထံသို့ RCSS မှ ပေးပို့သော စာအား SSPP/SSA မှ ပြန်လည် အကြောင်းကြားခြင်းမရှိဟု ဆိုသည်မှာ လုံးဝမမှန်ကန်ကြောင်း SSPP/SSA မှ အောက်တိုဘာ (၃)ရက်တွင် ထုတ်ပြန်ခဲ့သည်။

RCSS/SSA နှင့် SSPP/SSA ဖြစ်ပွားနေသည့် ပဋိပက္ခများကို ငြိမ်းချမ်းစွာ ဖြေရှင်းရန် SSPP/SSA မှ နှစ်ပေါင်းများစွာ အဆင့်ဆင့် ညှိနှိုင်းခဲ့သော်လည်းRCSS မှ သဘောတူညီချက်များပျက်ကွက်ခဲ့သည်ဟုလည်း SSPP/SSAထုတ်ပြန်ခဲ့သည်။

SSPP/SSA မှ ပြောရေးဆိုခွင့်ရှိသူများကို သျှမ်းသံတော်ဆင့်မှ အကြိမ်ကြိမ် ဆက်သွယ်ပေမယ့် မရခဲ့ပေ။