သျှမ်းပြည်တွင် ကျောက်မီးသွေးများထွက်ရှိသဖြင့် ကျောက်မီးသွေးကို အသုံးပြုပြီး ခေတ်မီနည်းပညာများဖြင့် စနစ်တကျ ထုတ်ပါက ပတ်ဝန်းကျင် ထိခိုက်မှုနည်းပါးစေပြီး လျှပ်စစ်ဓာတ်အားထုတ်ယူရမည် ဟု စစ်ကောင်စီ ခေါင်းဆောင် ဗိုလ်ချုပ်မှူးကြီး မင်းအောင်လှိုင် က ပြောကြားလိုက်သည်။
ထိုပြောကြားမှုသည် ယမန်နေ့ (အောက်တိုဘာ ၁)ရက် တွင် သျှမ်းပြည်တောင်ကြီးမြို့ သို့ရောက်ရှိနေစဉ် စစ်ကောင်စီ လက်အောက်ခံ သျှမ်းပြည်အစိုးရ အဖွဲ့ဝင်များနှင့် တွေ့ဆုံစဉ်ပြောကြားခဲ့ခြင်းဖြစ်သည်။
သျှမ်းပြည် အတွင်း ရေအားလျှပ်စစ်ထုတ်လုပ်နိုင်သည့် သံလွင်မြစ်နှင့် အခြား အရင်းအမြစ် များစွာ ရှိကြောင်း၊ အလားတူ ကျောက်မီးသွေးများ ထွက်ရှိသဖြင့် ကျောက်မီးသွေး အသုံးပြု၍ ခေတ်မီ နည်းပညာများဖြင့် စနစ်တကျ ထုတ်လုပ်နိုင်ပါက ပတ်ဝန်းကျင် ထိခိုက်မှုကို နည်းပါးစေပြီး လျှပ်စစ်ဓာတ်အား ထုတ်ယူ၍ ရကြောင်း စစ်ကောင်စီ ခေါင်းဆောင်က ပြောခဲ့သည်။
တောင်ပေါ်ဒေသ ဖြစ်သည့်အတွက်လည်း လေအားလျှပ်စစ်ဓာတ်အားများ ထုတ်ယူ၍ ရကြောင်း၊ ထို့ကြောင့် လျှပ်စစ်ဓာတ်အားများ ထုတ်လုပ်နိုင်ရေးအတွက် ရှိပြီးသား အရင်းအမြစ်များကို အသုံးချနိုင်ခြင်းဖြင့် ပြည်နယ်အတွက် အကျိုးရှိမည် ဖြစ်ကြောင်း၊ လျှပ်စစ် ဓာတ်အားများ လုံလောက်စွာ ရရှိခြင်းဖြင့် ဖွံ့ဖြိုတိုးတက်မှုများအား များစွာ အထောက်အကူ ပြုစေမည် ဖြစ်ကြောင်း စစ်ကောင်စီ ဥက္ကဌ က ဆိုသည်။
ထို့အပြင် ဓနုကိုယ်ပိုင်အုပ်ချုပ်ခွင့်ရ ဒေသတွင် လျှပ်စစ်ဓာတ်အား လုံလောက်စွာ ရရှိရေး အတွက် Bio Gas အသုံးပြု၍ လျှပ်စစ်ဓာတ်အား ထုတ်လုပ်နိုင်ရေး အတွက်လည်း နည်းလမ်း ရှာဖွေဆောင်ရွက်ရန် လိုကြောင်း ထပ်လောင်းပြောဆိုခဲ့သည်။
သျှမ်းပြည် အတွင်း ကျောက်မီးသွေး ထုတ်လုပ်မှု သံလွင်မြစ်နှင့် အခြား အရင်းအမြစ်ကို အခြေခံပြီး လျှပ်စစ်ဓာတ်အားထုတ်လုပ်မှုကို သျှမ်းပြည်လူထု သာမက မြန်မာပြည်သူများက အစဉ်တစိုက် ကန့်ကွက်ခဲ့သည်။
Leave a Comments