သျှမ်းပြည် တောင်ပိုင်း ညောင်ရွှေမြို့မှ ကုန်ခြောက်များတင်လာသည့် ကားသမားတစ်ဦးကို စစ်ကောင်စီ တို့က သေနတ်ဖြင့် ပစ်သတ်လိုက်ကြောင်း စုံစမ်းသတင်းသိရသည်။
ဖြစ်စဉ်မှာယမန်နေ့ စက်တင်ဘာလ ၃၀ ရက်နေ့ ညနေ ၄ နာရီဝန်းကျင်တွင် ညောင်ရွှေမြို့မှ ကုန်ခြောက်များ နှင့် ပြောင်းဆန်တစ်ချို့ တင်ဆောင်လာသည့် ကားသည် စံကားကျေးရွာအနီးရှိ စစ်ကောင်စီတပ် နှင့် ထိပ်တိုက်တွေ့ပြီး တားမြစ်စစ်ဆေးမှုပြုလုပ်သည်ကို ကားသမားများက ကြောက်လန့်ကာ ထွက်ပြေးသဖြင့် သေနတ်ဖြင့် ပစ်သတ်လိုက်ကြောင်း သိရသည်။
“ကားသမားက ကုန်ခြောက်နဲ့ ပြောင်းတွေတင်လာတာ၊ စံကားမြို့အနီးက ထီရီကျေးရွာမှာ စကစတွေနဲ့ တွေ့ပြီး သူတို့က တားစစ်တယ်၊ ကားသမားက ကြောက်ပြီးတော့ မောင်းထွက်ပြေးတာ အဲ့ကြောင့် စကစတွေက သေနတ်နဲ့ ပစ်သတ်လိုက်တာတဲ့၊ ကျနော်တို့ကနေ သေနတ်သံ ၅ ချက်ထက်မနည်း ကြားရတယ်” ဟု ထီရီကျေးရွာနေ ပြည်သူတစ်ဦးက သျှမ်းသံတော်ဆင့်ကို ပြောသည်။
အဆိုပါကားသမားသည် ညောင်ရွှေမြို့မှ လာသည် ဟုသာ သိရပြီး ၎င်း၏ နာမည် နှင့်နေရပ်လိပ်စာများကို မသိရသေးကြောင်း၊ စစ်ကောင်စီတို့ ပစ်သတ်လိုက်သည့် ၎င်း၏ ရုပ်အလောင်းကို စစ်ကောင်စီတို့က စံကားမြို့ရှိ တိုက်နယ်ဆေးရုံသို့ လာရောက်ပို့ဆောင်ကြောင်းလည်း
“မနေ့က ၅ နာရီကျော်ဝန်းကျင်မှာ စံကားဆေးရုံကို သေနတ်ဒဏ်ရာတွေနဲ့ အလောင်းတစ်လောင်းရောက်လာ ပါတယ်၊ ရင်ခွဲရုံကိုပို့ဖို့ ဆိုပြီးတော့ စစ်ကောင်စီတွေက ပြောတယ်၊ ဆေးရုံမှတ်တမ်းတင်ထားဖို့ ဘာကြောင့် သေဆုံးခဲ့ရလဲဆိုပြီး မေးတော့ စစ်ကောင်စီတွေက မပြောလို့ ဆေးရုံကလဲ လက်မခံဘူး”ဟု စံကားတိုက်နယ် ဆေးရုံ အသိုင်းအဝိုင်းမှ ပြည်သူတစ်ဦးက သျှမ်းသံတော်ဆင့်ကိုပြောသည်။
လက်ရှိတွင် အဆိုပါ ကားသမား၏ ရုပ်အလောင်းကို စစ်ကောင်စီတို့က ညောင်ရွှေပြည်သူဆေးရုံသို့ ပို့ဆောင် ထားကြောင်းလည်း သတင်းများထွက်ပေါ်နေပြီး အဆိုပါ ကားသမား၏ နေရပ်လိပ်စာနှင့် အမည်များကို ဆက်လက်စုံစမ်းနေလျက်ရှိသည်။
အဆိုပါ ကားသမားပစ်ခတ်ခံရသည့် စံကားကျေးရွာ အနီးမှ ထီရီကျေးရွာသည် ပြီးခဲ့သည့် လ အတွင်းတွင် စစ်ကောင်စီ တပ်ဖွဲ့နှင့် ဒေသခံပြည်သူ့ကာကွယ်ရေးတပ်ဖွဲ့များ ထိတွေ့တိုက်ခိုက်မှုများဖြစ်ပွားခဲ့သည့် နေရာဖြစ်ပြီး လက်ရှိအချိန်ထိ စစ်ကောင်စီတို့က ၎င်းတို့၏ အင်အားများကို ဖြန့်ကျက်နေရာယူထား ကြောင်းလည်း သတင်းသိရသည်။
