သျှမ်းပြည်မြောက်ပိုင်း လားရှိုးခရိုင် မိုင်းရယ်မြို့နယ် အတွင်း လောင်းကစားရုံတစ်ခု လာရောက်ဖွင့်လှစ်မည့် သတင်းထွက်ပေါ်လာသည့် အပေါ် ဒေသခံများ စိုးရိမ်နေကြောင်း သတင်းရရှိသည်။
ပြီးခဲ့သည့် တစ်ပတ်ခန့်တွင် မိုင်းရယ်မြို့ အမှတ် ၁ ရပ်ကွက်အတွင်းတွင် တခြားမြို့ မှ လာသော အဖွဲ့အစည်း တစ်ခုသည် မိုင်းရယ်မြို့အတွင်းတွင် လေးကောင်ဂျင်ဝိုင်း၊ ဖဲဝိုင်းနှင့် တခြားသော လောင်းကစားဆိုင်ရာ လုပ်ငန်းများကို လာရောက်ဖွင့်လှစ်မည်ဆိုသည့် သတင်း ကြားရကြောင်း မိုင်းရယ်မြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“သူတို့အဖွဲ့က လားရှိုးမှာလည်း ဖွင့်ထားတယ်တဲ့၊ အခုတော့ မိုင်းရယ်မြို့ထဲမှာ လာဖွင့်ဖို့ စီစဉ်နေတယ်လို့ ကြားရတယ်၊ အာဏာပိုင်တွေနဲ့လည်း ညှိပြီးပြီတဲ့၊ ဒါပေမဲ့ ရပ်ကွက်ဖက်က လက်မခံသေးဘူး၊ အဲ့ကြောင့် ဆိုင်ခန်းနေရာနဲ့ ပစ္စည်းထားဖို့နေရာပဲချသေးတာ၊ ဖွင့်တော့ မဖွင့်သေးဘူး” ဟု အမည် မဖော်လိုသည့် မိုင်းရယ်မြို့နေ အမျိုးသားတစ်ဦးက သျှမ်းသံတော်ဆင့်ကို ပြောသည်။
ယခုလို နိုင်ငံရေး မကောင်းသည့် ကာလနှင့် ပြည်သူများ စားဝတ်နေရေးအတွက် ကြိုးစားရုန်းကန်နေရ ချိန်တွင် ယင်းကဲ့သို့ လောင်းကစားဖွင့်ခြင်းသည် မဖြစ်သင့်ကြောင်းလည်း အမှတ် ၁ ရပ်ကွက်မှ ရပ်မိ ရပ်ဖ တစ်ဦးကလည်း သျှမ်းသံတော်ဆင့်ကို ပြောသည်။
“ဒီလို နိုင်ငံရေး မကောင်းတဲ့ အချိန်မှာ လောင်းကစားဝိုင်း ထပ်ရှိအုံးမယ် ဆိုရင်တော့ မလွယ်ကူတော့ပါဘူး၊ ရှိလာရင် မသွားဘူးဆိုတာ ပြောလို့ ရနိုင်တာ မဟုတ်ဘူး၊ လောင်းတာ ရှိရင် လျော်ရတာလည်း ရှိလာမယ်၊ အဲ့ကနေ ခိုးတာ လုတာကနေ မူးယစ်ဆေးဝါးအဆင့်ထိ ရောက်နိုင်တယ်၊ အဲ့ကြောင့် အာဏာပိုင်တွေ အနေနဲ့ ဒီလောင်းကစားဝိုင်းဖွင့်မယ့် ကိစ္စကို ပြင်းပြင်းထန်ထန် တားမြစ်သင့်တယ်” ဟု ၎င်းက ဆိုသည်။
အဆိုပါ မိုင်းရယ်မြို့နယ်အတွင်း လောင်းကစားဝိုင်းဖွင့်လှစ်မည့် သတင်း ကိစ္စနှင့် ပက်သက်ပြီး မိုင်းရယ်မြို့ ၏ မြို့နယ်ကောင်စီ အဖွဲ့ဝင် ဦးစိုင်းအောင်ညွှန့်ကို ဆက်သွယ်မေးမြန်းရာ ယင်းအကြောင်းအရာ များကို မသိရှိရကြောင်း သျှမ်းသံတော်ဆင့်ကို ပြောသည်။
“ကျနော်တို့ မသိရပါဘူး၊ ဒီကိစ္စမျိုးက ရှိလာခဲ့ရင်လည်း ကျနော်တို့ခွင့်ပြုမှာမဟုတ်ဘူး၊ ကောလဟာလဘဲ ဖြစ်မှာပါ၊ အခုချိန်ထိတော့ ကျနော်တို့ဖက်က သဘောတူ သိရှိထားရတာ မရှိသေးဘူး” ဟု မိုင်းရယ်မြို့ မြို့နယ် ကောင်စီအဖွဲ့ဝင် ဦးစိုင်းအောင်ညွှန့်က သျှမ်းသံတော်ဆင့်ကို ပြောသည်။
မိုင်းရယ်မြို့အတွင်းတွင် ယခင်ကာလများ၌ လောင်းကစားဝိုင်းများသည် ဘုရားပွဲနှင့် ရာသီပွဲတော်များ၌သာ ရှိလေ့ရှိပြီး ယခု စစ်ကောင်စီမှ နိုင်ငံတော် အာဏာသိမ်းပြီးနောက်ပိုင်း လူနေရပ်ကွက်များအတွင်း ဖွင့်လှစ်ရင် ကြိုးစားနေခြင်း ဖြစ်ကြောင်းလည်း သိရသည်။
Leave a Comments