သျှမ်းပြည်တောင်ပိုင်း ဖယ်ခုံမြို့တွင် အာဏာသိမ်းစစ်ကောင်စီ မှ လက်နက်ကြီးလက်နက်ငယ်တို့ဖြင့် ရမ်းသမ်း ပစ်ခတ်မှုကြောင့် အမျိုးသမီး တစ်ဦး ကျည်ထိမှန်ခဲ့ပြီး၊ နေအိမ်များ ပျက်စီးခဲ့ကြောင်း သတင်းရှရိသည်။
ယနေ့ (စက်တင်ဘာ ၂၇)ရက်မနက်ပိုင်းတွင် စစ်ကောင်စီမှလက်နက်ကြီး၊ လက်နက်ငယ်ဖြင့် ရမ်းသမ်းပစ်ခတ်သဖြင့် အမျိုးသမီးတစ်ဦး ကျည်ထိမှန်ခဲ့ပြီး၊ နေအိမ်များလည်း လက်နက်ကြီး ထိမှန်ပျက်စီးခဲ့ကြောင်း ဖယ်ခုံ PDF နှင့် ဆက်စပ်သည့် အမျိုးသား တစ်ဦးက သျှမ်းသံတော်ဆင့်ကို ပြောသည်။
“စစ်ကောင်စီတို့က ဖယ်ခုံအဝင် ကုန်းဆုံရွာနဲ့ ကသဲရွာမှာ မိုင်းဆွဲတိုက်ခိုက်ခံရတယ်၊ အဲ့မှာသူတို့လူကလည်း ကျတာများတော့ ရှုံးမဲ မဲတာပေါ့၊ ပြည်သူနေအိမ်ဖက် ရွာဖက်ကို ရမ်းပစ်တော့တာ၊ အိမ်ထဲရှိနေတဲ့ လူမမာ အမျိုးသမီးပေါင်ကို ကျည်ဆံက ထိမှန်သွားတယ်” ဟု အထက်ပါ အမျိုးသားက ပြောသည်။
ယနေ့ စက်တင်ဘာလ ၂၇ ရက်နေ့ နံနက် ၁၀ ခွဲဝန်းကျင်အချိန်တွင် ဖယ်ခုံသို့ အင်အားဖြည့်တင်းဝင်လာသော စစ်ကောင်စီယာဉ်တန်းအား ကရင်နီပူးပေါင်းတပ်ဖွဲ့များမှ ပင်လောင်း-ဖယ်ခုံ လမ်းမ၊ ကုန်းဆုံရွာနှင့် ကသဲရွာ အနီးတွင် ခုခံတိုက်ခိုက်နေပြီး စစ်ကောင်စီတို့ဖက်မှ အနည်းဆုံး ၂၀ ခန့် ထိခိုက်သေဆုံးနိုင်ကြောင်း KNDF မှ သတင်းထုတ်ပြန်သည်။
“ဒီနေ့ မနက် ၁၀ နာရီခွဲကတည်းကနေ ညနေ ၄ နာရီကျော်အချိန်အထိ ပစ်ခတ်သံတွေကြားရပါတယ်၊ နှစ်ဖက်လုံးက လက်နက်ကြီး လက်နက်ငယ်တွေနဲ့ ပစ်ခတ်ကြတာ ဖြစ်တယ်၊ ဒီနေ့မှာ စကစ တွေက အကျများတော့ ရွာတွေဖက်ကို ရမ်းပြီးပစ်လို့ ပြည်သူ အမျိုးသမီးတစ်ဦးနဲ့ နေအိမ်တွေလည်း ပျက်စီးသွားရတယ်” ဟု ဖယ်ခုံဒေသခံ တစ်ဦးက ပြောသည်။
စစ်ကောင်စီတို့သည် အင်အားအများအပြားနှင့် ကရင်နီပူးပေါင်းတပ်ဖွဲ့များကို ထိုးစစ်ဆင် တိုက်ခိုက်နေသော်လည်း ဌာနေပြည်သူ့ကာကွယ်ရေးနှင့် ပူးပေါင်းတပ်ဖွဲ့တို့၏ တန်ပြန်တိုက်ခိုက်မှုကြောင့် ရှေ့ဆက်တိုက်ခိုက်မှု မပြုနိုင်သဖြင့် ကသဲကျေးရွာတွင်း ရှောင်တိမ်းခြင်း မပြုလုပ်နိုင်ခဲ့သည့် ပြည်သူများကို ဖမ်းဆီးရိုက်နက်ခြင်း များပြုလုပ်ခဲ့ကြောင်းလည်း သတင်းသိရသည်။
လက်ရှိတွင်လည်း ဖယ်ခုံမြို့ရှိ အမှတ်(၇)စစ်ဆင်ရေးကွပ်ကဲမှုဌာနချုပ် (စကခ-၇)မှ မိုးဗြဲဖက်သို့ စစ်ကြောင်း ချီတက်သွားသော စစ်သားအင်အား ၂၀၀ ဝန်းကျင်ခန့်တို့သည် ဖယ်ခုံမြို့နှင့် မိုးဗြဲကားရှိ ခေါင်းမိုင်းကျေးရွာ အနီးတွင် မိုးဗြဲ ပြည်သူ့ကာကွယ်ရေးတပ်ဖွဲ့၊ ကရင်နီ ပူးပေါင်းတပ်ဖွဲ့ တို့နှင့် တိုက်ပွဲပြင်းထန်နေကြောင်း သိရသည်။
Leave a Comments